a[Nam 18:14]
b[Nam 18:21; Bom 14:22-29]

Leviticus 27

Te we bidi augwaligo nai meba te Godiba mani te nai dabego bomai po

Genuai Bidigo po Mosesbolo weyu, te Israel dabebolo te tiwai po walao wali, “Te bidi me deli aga po dąų waliyu, te aga enaba mawaibao, ma gasa bidi me we te enabolo mawaibao wai baso da, teda agai te dąų wali po usu nainogo te monego te bidi ma we hasegelainogo eyu, te mone meba pris bidiba mao,” te po wai. “Te we bidi dabe ma abelabo dąį ilali mone e tiwai elalubao. Te kibu be 20 dąį elama, te kibu be bidi sese sela 60 igi pali bidi, augwaligo te mone 500 kina tama monego hasegeliyu abelao. Te wego kibu be bidi sese delide dąį elama te bidi sese selaba dąį igi pali we da, te mone 300 kinago abelao. Te bidi kibu be a nagade dąį elama te kibu be bidi sese deliba usu nani bidi da, te mone 200 kinago abelao. Te we kibu be a naga dąį elama te kibu be bidi sese deliba usu nani we da, te mone 100 kinago abelao,” te po wai. “Te wai ogwago polua delidu te kibu be a naga usu nani wai da, te mone 50 kinago hasegeliyu abelao. Te wegi te polua delidu te nogo a naga kibu beba usu nani wegi da te mone 30 kinago abelao,” wali. “Te kibu be bidi sese sela 60 yali bidi, te 150 kina monego abelao. Te kibu be bidi sese sela 60 yali we da, te 100 kina monego hasegeliyu abelao,” te po wai dao.

“Te tiwai mone muabo po dąų wali bidigo, te aga digi aga ma abelabo mone ma aga abagi abelabo mone me meni baso da, teda te bidi prisba pao. Te prisgo te bidigo mone aiyaba dulama, te prisgo homugo aga muabo homu ebo mone usu nama mueibao,” wali.

“Te bidigo te kibu me deli ena Genuai Bidiba ofa yaibao po dąų wai baso, agai te tobage kibu dabe eno dagebolo ofa yao po wabo kibugo te ofa yao. Te dagego ofa ebo kibu tigidali te eno nai mu dao. 10 Tama te bidigo te wiegi yai kibu hasegelama, te dwai kibugo ofa igio. Agai te kibu dwai hasegelama, te wiegi yai kibu ofa igio. Tialima, agai hasegelibaso da, teda te kibu si dali si te ena, Genuai Bidigo dao. 11 Te bidi me agai enabolo te wiegi yai isąwai kibu me deli agai enabolo ofa yabo usu meni baso da, teda agai te prisba selasa pao,” wali. 12 “Prisgo te kibu wiegi yai yaliwe ma dwaliwe sulama, agai te mone dąį ilaibao. Tama te mone nogi tagalama, gasa mone dąį me iligio. 13 Te bidigo te kibu ma abelabo homu ebaso da, teda agai te mone meba dali te prisgo dąį ilali mone dali sesao. Te prisgo 5 kina dąį ilibaso da, teda agai te mone 6 kinago abelao. Ma, prisgo te mone 10 kina po obaso da, agai te mone 12 kina mobaso usu dao,” wai dao.

14 “Te bidi me deligo aga be ena Genuai Bidiba maiabo homu ebaso da, teda prisgo te be wiegi yai ma dwai yabowe naga suao, agai digi te bego mone dąį ilao, te prisgo dąį ilali mone me hasegeligio. 15 Tama ena Genuai Bidiba te be mani bidigo, te nosali aga be ma abelabo homu ebaso da, teda agai te bego mone usu nama mayu, te gasa me badu dali daganama mao. Te prisgo te bego mone 100 kina dąį ilai baso da, teda te bidigo 120 kina mao. Agai te mone prisba menama, te aga be ma sobaso te usu dao,” wali.

16 “Te bidi me deligo agai tǫ pedai enaba mobaso da, teda prisgo te nisu naga te nai wai bali te tǫde bulugowe naga te osola suao. Te augwaligo te sęgę bidi sese deli 20 kilogram bali bulabo tǫ usu yai baso da, teda te tǫgo mone 100 kina usu dao. 17 Tama agai enabolo te mani tǫ te nai dabe wei ma ponabo kibu be yagasobode te hasia wabo kibu bede mobaso da, teda te mone te tiwai elalumainao, te me hasegelamo dao. 18 Tialima, agai enabolo mabo tǫ te kibu be meba nosali wabo te genuai kibu be wabo sogo mobaso da, teda prisgo nisu naga kibu be elalubadi yai baso te nedao, te nai dabe wei ma ponabo kibu be nisu naga elalubo koneainogo tiao, tama agai te tǫgo mone aiyaba togaibao. 19 Te tǫ enabolo te mani bidi, te aga tǫ ma abelainogo ebaso da, teda agai te monego abelemainao. Te mone prisgo 100 kina dąį ilai baso da, teda te bidigo 120 kina mao. Agai te mone prisba menama, te aga tǫ ma somainogo emainao. 20 Te hasia bolo agai te tǫ ena Genuai Bidiba abelesąma, tama agai te tǫ gasa bidiba mawai baso da, teda nosali aga digi ma abelainogo ebaso, usu me egobe dao. 21 Tama te nai dabe wei ma ponobo kibu be pedalubo sogo, teda te tǫ abelali bidigo enabolo ma mao. Tama te tǫ ena tǫ sesemane sogo elalua paibao, te we bidi augwalide habu selaibao. Te eno pris augwaliba naga mawaibao,” te po walio.

22 “Te tǫ me deli bidigo abelai, te aga wąį nǫų dabego tǫ menio, agai te tǫ ena Genuai Bidiba mobaso da, 23 teda te nai dabe wei ma mabo te nisu naga kibu be elalubowe naga te prisgo neda suao. Tama agai mena tama kibu be elalubo usu nama te tǫde mone dąį ilao, te side naga dolo te bidigo te prisgo tǫba mone mao. Tama te mone da ena Genuai Bidigo nai dao. 24 Tialima, te nai dabe wei ma ponobo kibu bede, te tǫ sali bidigo te tǫ aga ayaba wei ponama dolo mao,” wali.

25 “Dagego te eno megi po wali tigidali naigo mone dolo neda suao,” te po wai.

26 “Te dagego ofa me deli enaba maiabo homu ebaso da, teda dagego te tigidali kibu me gasa nai dabego te podolali nai dabe me sigio, magi baso meni, te eno nai da po walio. Tagalao, te bulmakau ma sipsipgo te gomunai wai dabe, tigidali te eno dao. 27 Tialima, te kibugo gomunai wai dabe te kibu dabego eno gedude me wiegi yai meni baso da, teda duga ma abelagameo. Te prisgo 10 kina dąį ilibaso da, teda dagego agabolo 12 kina mao. Tama bidigo te kibu me abelesąbo homu ebaso da, teda prisgo gasa bidigo abelemainogo elama, te prisgo dąį ilali mone usu nama abelao.”

28 “Tialima, te bidi me deligo te nai me deli ena Genuai Bidi dolo dąį mu ilali naigo, te gasa sę me igio olama, habu selai baso da, teda agai te nai gasa bidigo abelemainogo me igio, te aga digi me te pris dabede ma abelamuo. Te tagalao, agai bidi me deli, ma we me deli, ma kibu me deli, ma te aga wąį nǫų dabede sali tǫ me deli yai baso da, teda sesemane sogo te ena Genuai Bidigo nai naga elalueibao.” Te po wali. a  29 “Odao. Te agai bidi ma we enabolo sa muyu dąį ilai baso tagalao, teda agai ma abelainu ebo usu egobeo. Mu meni. Dagego te tiwai mani bidi ma we ela muyu naga yao.”

30 “Te gide pedalubo nai tigidali, te nai wit wai ma ni du wai da, dagego te nogo si badu dobolama, te me deli badu ena Genuai Bidiba mao. Te nogo si wali nai dagego tubo habu mu selaibao. Te enaduba deligo nai naga dao. b  31 Te bidi me deligo te naigo meba abelainogo ebaso da, teda agai abelemainao. Te naide mone 5 kina yai baso da, teda agai 6 kinago hasegeliyu abelama, te pris dabeba mao. 32 Te nogo si bulmakau me sipsip dabe elalubaso, te me deli eno dao. Dagego te kibu dabe tigidali wasilama, te augwali nedelama, tama te nogo si wali tigidali enabolo mao. 33 Te nogo si wali kibu wiegi yai ma dwai baso me tagalao, dagego me hasegeligio. Tialima, dagego hasegelibaso da, teda te nogo si wali kibu dali te hasegelali dali saibao, te si dali si eno nai dao, te dagego ma abelamo dao,” wali.

34 Te po dabe dali te bomai po me Genuai Bidigo Mosesbolo te Sainai bulu dude mawai. Tama agai te po weyu, te Israel dabe augwaligo tigidali wali piyąo po wai dao.

Copyright information for `MPS