Leviticus 3

God dali deli haliga ebo ofa yabo po

Te Godigo Mosesbolo walama, te Israel dabebolo te tiwai po wao po wai, “Te bidi me deligo Genuai Bidi dali deli haliga ebo ofa yainogo, te agai kibu bulmakau ofa yainogo ebaso da, teda agai te kau kibu omai ma so kau kibu te wiegi yai mu aga tigide dwai keni kenigo dolisąwai selama, ofa ebaso, usu dao. Te Godigo te Israel dabe dali deliba sisinibo Ugwa Be sunumiba asama, tama te bidigo nogo te kibu kau toboluba muyu bolo elama, te nosali agai te ela muao. Te pris dabe, augwali te Arongo hani dabe, augwaligo te alta bogo me si me si badu te kau kibu kaneme sąsągą bilao. Te bidigo te kau kibu delage me badu selama te Genuai Bidiba mayu te pris dabego ofa tiwai ulumainao. Agai te haligade ili dabe sao, tama te si wabo kibu homu dali te ili me te polalubo dini homu te wiegi yai me badu sao. Agai te namba wan homu me te namba tu homu si dali te sobadi yao. Tama pris dabego te nai dabe te altaba siaba tigidali ulama dela silibo ofa dali ulao. Tama Genuai Bidigo te ofa ebo denami odama te aga godolo elama bugai haliga tede yaibao,” wali.

“Te bidi me deligo te sipsip kibu ma meme kibu selama, te Genuai Bidi dali deli haliga ebo ofa yabo homu ebaso da, teda agai te omai kibu sipsip ma so kibu sipsip, ma te meme kibu omai ma so kibu meme somainao. Tiali goli, agai te kibu sipsip ma kibu meme te wiegi yai mu te keni kenigo tigi me dolisąwai sobaso da, te usu dao. Te bidigo te sipsip kibu wai me deli ofa yai hagede eyu da, teda agai Genuai Bidigo gedude selasa asao. Tama agai nogo te sipsip kibu toboluba muyu bolo elama, tama nosali agai sipsip kibu te Godigo Ugwa Be gesabidi badu pąde ela mubaso usu dao. Tama pris dabego te kibu kaneme te alta bogo me si me si badu sąsągą bilao,” po wai dao. “Silama da, teda te bidigo te kibu sipsip delage me badu selama, te Genuai Bidiba mao, te pris dabego te ofa tiwai ulaibao. Agai te sipsip ili tigidali me, te danu badu elalubo genuai ili me sobadi yao. Agai te danu te tudi dili pageba mu togogiluao. Tama agai te haligade ili elalubo tigidali sao. 10 Tama agai te si wabo hobuludu te ili dali sobadi, te sipsipgo wiegi yai te namba wan wabo homu lewa me sao. Te namba wan lewa homu, me namba tu homu lewa dali tama sabo usu dao. 11 Tama prisgo te nai dabe te alta sai daiba ulao, te Genuai Bidiba ofa tiwai dao.”

12 “Bidi me deligo te kibu meme ofa yainogo eyu da, agai te Genuai Bidigo geduba selasa pao,” wali. 13 “Tama agai te meme kibu toboluba nogo muyu bolo elama, tama agai te meme kibu te Genuai Bidigo Be sunumi pąde ela muao. Tialima, te pris dabego te kibu kaneme te alta bogo me si me si badu sąsągą bilao,” po wai. 14 “Te bidigo te kibu meme delage meba selama, te Genuai Bidiba mao, te pris dabego ofa tiwai emainao. Agai te haligade elalubo ili dabe tigidali sao, 15 te namba tu homu lewa dali te ili dabe me te namba wan homu lewa wiegi yai me sao. Agai te namba wan homu lewa me namba tu homu lewa dali sobaso, te usu dao. 16 Tialima, prisgo te nai dabe selama, te alta sia daiba munama, te ofa tiwai yao, te Genuai Bidigo homu godolo elama, bugai homu yaibao. Te ili tigidali Genuai Bidigo naga dao. 17 Te dage Israelgo te kibu ili ma kaneme munu me tugio. Habu mu dao. Dage me te nosali pedalubo hani wąį dabego te bomai po sesemane wali pidubadi geao. Te dage menaba bidigi pali bulude me te bomai po tagaligio, dagego te bomai po wali pao,” te po wai dao.

Copyright information for `MPS