a[1 Sto 24:10]
b[Nam 6:3]
c[Mal 4:5-6]
d[Dan 8:16; 9:21]
e[2 Sml 7:12, 13, 16; Ais 9:7]
f[Gag 18:14]
g[Gag 17:7; 1 Sml 2:1-10]
h[Mal 3:1]
i[Ais 9:2]

Luke 1

Lukgo Tiofilusbolo asęnama mawai po

Genuai bidi Tiofilus, polobadu te bidi hauwa augwaligo te Godigo polobadu da tomode yali sę po asębo homu eyu bugagia sina wai dao.

Augwaligo te sę gagalobo te gedugo suali bidi dabego po siyu wali pai dao. Te gedugo suali bidi dabe augwaligo te po pupusu bilai dao. Tama tibaso, eno me te po naga asęnama, nagebolo tolainu te ebao. Hauwa sogo mu te sę pagede eno te sę gedugo suali bidi dabebolo hanalu wai dao. Megi eno bugagia dodolama, te asęyu te ebao. Tialima, deli po naga tama dao. Tama nago polobadu augwaligo nagebolo ola mani po mu yai daba homu emainu, eno te po ma te asęna tolobao.

Enselgo Sekaraiabolo Jon ame naibao wali

Te bidi nogi Herot te Juda bagego gavman tobolu bidi bidibadi, polobadu Israel hani augwa pris bidi me nogi Sekaraia bididualio. Agai hani sibi nogi Abiya sibi da, te hanide pris bidai bidi dao. Te Sekaraiago Aron hani sibi we nogi Elisabet sai. Te Aron hani sibi me te pris sę ebo hani bidi bidai. a  Te bidi Sekaraia dali aga we dali si te God gedude dolasa bidiyu, te God tonaludubadi, te augwali sigo dwai sę me ebeo. Augwa si Godigo bomo yai po tigidali wali pidu digi, te Genuai Bidigo po dabe me tigidali wali palio, tama augwali sigo dwai sę me ebeo. Tiali goli augwali si wai menio. Te we Elisabet aga haliga dąų wai. Te Elisabet dali Sekaraia dali augwali si monu dabe mosi dabe eyu, wai ame nabo usu meni yai.

Te Sekaraia aga dali deli sę ebo bage sęba asaialio, te Moni Lotu Beba, te Sekaraia aga pągą wali bodolude, te sęde dagalali. Tama tibaso, Sekaraia agai aga pris sę eyu, tama aga te denami yai nai siago ulubo sę egi palio, Godigo gesabidide. Te ebo sę page da, te Godibolo gedu haluasa po pusubo tiwai. Tama tibaso, aga te Moni Lotu Be tempel tomoba pelama, tama te denami yai nai siago uludubadi, we bidi te bulu badu tonaludu, augwaligo Godibolo gedu haluasa po weyu bidali.

11 Tebadi yaide, Godigo ensel bidi me deli dulama, te denami yai hano holobo pesage doloba polo badu dolalubo suali. 12 Tama Sekaraiago Godigo ensel bidi dolalubo sulama, moni noma sali, wi yali. 13 Tiali goli, te enselgo agabolo te po wali, “Sekaraia, nage wi tagalao. Te Godigo nago agabolo hanalu wali po odalio. Naga we Elisabetgo nago ogwa me deli ame naibao. 14 Nago te ogwa nogi Jon poao. Aga ame nabo si, dage si me gasa we bidi hauwa me bugai homu naga yaibao. Magi baso meni. 15 Godigo gesabidide agai nogi genuai elaluaibao. Agai diluai wę dabe tulamuo. Te Jon aga ame nabo sogo gagalama, Godigo Dwagi Yai Mobo Bidi aga dali bidaibao. b  16 Te Jon agai te Israel we bidi dabe hauwa te God augwa Genuai Bidiba ma begasa asao po wabo bidi dao. 17 Agai te Godigo po polobadu pusa mawai bidi Elaijago yali sę me, bomo me tigidali selama, Genuai Bidi nosali asaibao obaso, te Jon aga polasa paibao. Agai te aya dabego homu hasegelama, wai bǫų hobede emai yaibao. Me agai te po sela sąbo bidi dabego homu hasegelama, augwali doloba pai bidigo homu somai yaibao. Agai bidi hauwa sisi elama elaludu, Genuai Bidi asabo tonalu mai yaibao. Tama tibaso, te we bidi augwaligo te Jonde bugai homu mu yaibao,” te ensel bidigo te po wali. c 

18 Te po olama, Sekaraiago te ensel bidibolo hanalu te po walio, “Te eno we me, ena me, te da si mosi dabe monu dabe yai dao. Mena tama ma nago te po eno mu dao wagowe?” 19 Tama ensel bidigo te po wei ponoyu te po wai, “Ena nogi Gebriel dao. Ena God gesabidide dolalubo dao. God aga digi ena tagala palama, nagebolo dwagi yai po pusigi pa tobo obaso, nagebolo te po pusagasiyu te obao. d  20 Nago odao. Nago eno wali po mu dao homu isąbaso da, nago pedauwali dagana saibao. Dagana selama, nago po me wasiąbadi, eno po tų sisu pabo bodolude nage doloa paibao. Te eno po tų sisu pao wali bodolude te sę yaibao,” ensel bidigo te po wali.

21 Te gasagi yai nai pedalobaso, Sekaraiago u be tomode tonalubadi, te we bidigo aga magi yaliwe homu yali, aga magi baso gesegebawe homu yali. 22 Tama nosali aga buluba asama, po wabo usu ebeo. Agai nogogo naga bagi ela bilali. Tama augwaligo te tama tebo sulama, “U be tomode magi nai sualiwe namao,” wali.

23 Te Sekaraia aga sę silabo bodoluba yagasobaso, aga buluba soali. 24 Tama nosali aga we Elisabet haliga yalio. Aga bede dualalubadi, polua a naga palio. 25 Elisabet agai te po wai, “Te Genuai Bidigo ena olo dali tau selama, isabo magade eno wai saibao. Tama tialigo we bidi gesabidide ena hale yai goli, megi agai te hale sela sąwai dao,” Elisabet agai te po wali.

Ensel bidigo Mariabolo Jisas ame naibao po walio

26 Te we Elisabet haliga elama, polua a naga olama, me badu nogo deli wagisu, tama Godigo te ensel bidi nogi Gebriel te bulu me nogi Nasaretba pao walio. 27 Gesi wegi me te bidi Josepbolo noma po wai, te wegi nogi Maria dao, “Te wegi pageba po pusigi pao,” te Godigo te enselbolo te tama po wali. 28 Te bidi Josep te Devitgo hani bidi dao. Tama te ensel bidi Gebriel te Maria pageba pelama, “Giligade dao,” te po wali. “Genuai Bidigo nage megi hobede yalio, nage bugai homu yabo sę yalio. Aga nage dali bidibao,” wali.

29 Te wegi Mariago te po odobo si, aga homu tųą palio. Agai homugo e bidigo magi po nama wabowe, te homu yali. 30 Tama te ensel bidigo Mariabolo “Nage wi egio,” te po wali. “Godigo nage dali dwagi yai homu ebao. 31 Edao! Nage haliga yaibao. Nage haliga elama, ogwa tega paibao. Te ogwa nogi nago Jisas poao. Aga genuai bidi bidaibao. 32 Tama Godigo te po waibao, ‘Aga nogi Genuai Godigo Ogwa dao,’ waibao. Godigo aga genuai bidi nigilaibao, aga nǫų Devitgo yali gilama. e  33 Te tigidali sogo Jekopgo hanigo genuai bidi bidaibao. Aga te we bidi sesemane sogo tonaluaibao,” te enselgo te po wali. 34 Tama Mariago enselbolo te po hanalu wali, “Ena bidigo we menio. Tama magi ilama, tama tiwaibawe?” 35 Tama te ensel mobo bidigo po wei ponoyu, te po walio, “Te Godigo Mobo Bidi asama, tama agai bomogo nage mesegalueibao. Tama tibaso, nago tega pabo wai nogi Godigo nogi poaibao, ‘Dwai sę isąbo ogwa dao,’ waibao, ‘Te Godigo Ogwa dao,’ waibao. 36 Edao. Naga be bidi we Elisabet mosi dabe mu bidai goli, agai ogwa haliga elalubao. Polobadu augwaligo te wego wai ame nogobeo wai dao. Tiali goli, megi aga haliga elalubadi, polua a naga olama, me badu nogo deli polo pai dao. 37 Godigo me isiąwai sę me menio,” te ensel bidigo te po wali. f  38 Tama Mariago te po wali, enselbolo, “E. Ena Genuai Bidi agai sę ebo we dao. Eno homugo nago enabolo wali po tų sisu pomai yaiba,” te po wali. Tama te enselgo Maria taga palio.

Mariago Elisabet sugi pali

39 Te tamadi ganama, ensel dali po miani elalubadi, Maria aga Judia hanude bulu du meba palio. 40 Teba sabolama, aga Sekaraiago beba sabolama, Elisabetbolo “Giligade dao” wali. 41 Tama Mariago “Giligade dao” wali po obadi, Elisabetgo haligade elaluali wai mobodo yalio. Te Godigo Dwagi Yai Mobogo Elisabet beasagasalio. 42 Tama Elisabetgo midigi sali, Mariabolo dagą olama, te po wai, “Te Godigo nage dali dwagi yai homu mu ebe yabao, gasa we dabe aiyaba elalualio. Nago uda haliga elalubo ogwago me tama naga te waibao, olo bidi dabe aiyaba elaluaibao. 43 Godigo ena te moni dwagi yai sę magi baso maniwe, te eno Genuai Bidi aga idago ena suagasali. Te ena genuai we menio. 44 Edao! Nago enabolo ‘Giligade dao’ wabo odama, eno haligade elalubo waigo dwagi yai homu eyu, mobodo yalio. 45 Genuai Bidigo nagebolo wali poba nago homu begi pai yabao. Tama teyu, nage bugai homu mu te ebao. Nosali Genuai Bidigo yaibao wali sę tų sisu paibao,” Elisabetgo te po wali.

Mariago wali tęąbi po

46 Te Mariago te po wali, “Eno homugo da Genuai Bidigo nogi ugwaba sobao. 47 Tama eno nomago ena tau sabo Godibolo bugai homu mu ebao. Te ena agai sę ebo we da. 48 Tiali ena da, olo bage da. Tama agai ena kegeda pabo menio. Te megi me, nosali me bidibo we bidigo Godigo enabolo bugai homu mani po naga ola paibao. Magi baso meni. 49 Moni Bomai Godigo enabolo te genuai sę yali pode te obe dao. Agai nogi gasagi yai mu tedali dao. 50 Te God agai po tų sisu pabo we bidibolo agai olo tau sabo sę me, te iba bidada pabo bidigo ogwago ogwa dabego me, agai po tų sisu pidubaso da, agai tama tede piduabo tolai dao. Agai nogogo bomai sę yai dao. 51 Po sela sąyu augwaligo augwa nogi kegenanu ebo bage agai augwali besela sąwai dao. 52 Agai gavman tobolu bidi dabe aiyaba elaluama, te nogi meni yai bidi nogi ugwaba sabo dao. 53 Agai te nasi ebo bidi dwagi yai naigo tabi pągąlobo dao. Agai te sibage hauwa mubo bidi olo dali gudula palobo dao. 54 Polobadu mu Godigo dago nǫų dabebolo bodolu mawani. Tama megi agai bodolu tų sisu pobao. Da Israel dabe agai sę ebo we bidi dabe dao, tama megi agai da tau magasalio. 55 God agai dago nǫų dabebolo te po wali, ‘Te eno Abraham hobede eyu, te aga hani me, ibaba ame nabo ogwa me, tama naga tede paibao.’ Tama te wali po agai kegeda pabeo,” Mariago te po wali. g 

56 Te Maria Elisabet dali bidibadi, polua sela bidama da, tama nosali aga buluba ma pali.

Elisabetgo Jon tega pali

57 Te Elisabet agai wai tega pabo bodolu asobaso, te agai ogwa tega pai dao. 58 Aga hani dabe me, te deli bulu bage me tigidaligo Godigo Elisabet aga olo dali tau sali po odama, tigidali Elisabet dali bugai homu ela silai dao.

59 Te Sarere deli silama, tama augwaligo te ogwa tigiwali togwagasali, te tebo Juda dabego polobadu tama tolai sę dao. Tama augwaligo homugo “Agai aya nogi Sekaraia ma poaibao,” te po wali. 60 Tiali goli te ogwa aga idago po weyu,” Te egobeo. Dago e wai nogi Jon poaibao,” te po wali. 61 Tama augwaligo te po weyu,” Te naga deli hani bagede te tiwai nogi nago awa dabede me, hai dabede me tiwai nogi elalubo menio,” te po wali. 62 Augwaligo nogogo bagi eyu, Sekaraiabolo “E wai nogi de poaibawe?” te po wali.

63 Tama Sekaraia agai nogogo bagi eyu, “Te buku asębo nai me sesao,” olama, tama agai e tama asęanio, “Agai nogi Jon dao.” 64 Tama augwaligo homu tųą palio. Polo tama Sekaraia agai po wabo ma usu yalio. Tama agai hamena ma usu yali. 65 Te po weyu, agai Godigo nogi ugwaba sali. Tama augwa deli bulu bidi dabe me wi kisu dali. Augwali tigidaligo te po ola silama, pomo mu yalio, te Judia dabego bulu bageba me bulu agebele me. 66 Augwaligo te po odobo si, monu pomo mu ebaso, augwaligo te po wali, “Te wai nosali mena tama tiwai wai bidigowe?” wali. Genuai Bidigo bomo aga dali bidibo augwaligo koneanio.

Sekaraiago wali tęąbi po

67 Godigo Tedali Mobo Bidigo Sekaraia beasagaso baso, te Godigo po pusuyu, te po walio, 68 “Dena Genuai Bidi Israel dabego God nogi kegenaninao. Agai aga we bidi da tau sagasalio. 69 Tilama, agai da ma abelai dao. Polobadu aga sę yali bidi Devitgo eda dadalo asali hanide bomai bidi me deli pedelama, te bidi Godigo da ma sabo bidi nigilai dao. 70 Polobadu agai po pusa mani bidi dabego waligia te yaliao. 71 God agai polobadu agai da boi bidigo nogode ma saibao wali po te sabao, te da dali dwai homu ebo bidigo nogode me agai da sali. 72 Agai dago wąį dabe moni hobede eyu, tau saibao wali bidi te asalio. Tama agai polobadu bodolu mani aga me konealubao. 73 Agai dago wąį Abrahambolo bomai bodolu mu mawai dao. Tama megi agai polobadu yaibao waligia yainu te ebao. Boi bidigo nogode agai da ma sainu ebao wai. 74 Tama agai sę dago dąų olama, tulama, wi egobeo. 75 Da e tǫde bidibo sogo dago dwai sę isąma, dolo tųdu pelama, agai sę inao. Tama aga gesabidide da dolasa bilinao,” Sekaraiago te po wali. 76 Agai te po me Jonde wali, “Eno ogwa, ‘Nage nosali Moni Godigo po pusa mabo bidi mu dao,’ Godigo te po waibao. Nage bolo polasa paidigi Genuai Bidi nosali asaibao. Nage polasa pelama, aga asobo tų sisi ela muaibao. h  77 Agai we bidibolo nago po ola menama, konealueibao. Agai augwaligo dwai sę dabe sela sąnama, augwali ma sai hagede ebao homu yaibao. 78 Dago God da dali hobede mu elama, agai e tama tiwaibao. Te dagalu be posobo ula elalubo e tǫba dabolo tagala palaibao. 79 Tama te hulide bidalubo bageba ula ilimainu, me isabo pąde elalubo bage me, te bage tau somainu tiwaibao. Agai da te dwagi yai homude bilibo tųdu pabo po agai dabolo mobo ola mawaibao,” Sekaraiago te po wali. i 

80 Nosali e wai Jon genuai elama, te aga noma bidi me bomo yai pedalumainu ilali. Tama aga te we bidi meni yai bulude bidali. Tama nosali aga te Israel we bidigo gesabidiba hanilagaselama, bidali.

Copyright information for `MPS