a[1 Kin 10:4-7; 2 Sto 9:3-6]

Luke 12

Jisasgo dage ugwadu homugo tibo po wabo te Farisi bidi dabe gagayabuo po wali

(Matyu 10:26-27)

Te sę ebadi yaide, te umabo tausen we bidi Jisas pageba mu odogwa sagaselama, augwa hasi ma agaga bilalubo ąǫ yalio. Tama Jisasgo hasia bolo aga wali bilibo bidi dabebolo te po wali, “Dage te Farisi bage te ugwadu homugo tibo po wabo bidi dabego ebogia yabuo. Dage te tiwai gagaidali weyu, bugagia dilasa bidiąo. Bidi mego bret nigibo sogo, tomoba dwasianu bomonobo nai mubo dao. Tama nosali te bret boma pabo dao. Te Farisi dabego ugwadu homugo po wabo sę, te dwai sę dage tomoba asiyu da, dage tomode genia paibao, te bret bo dai tiwai yaibao. Magi magi nai tigidali mesegaluali, te daiba hania hanilaibao. Tigidali mesegalubo po me konea sialibao. Magi po me dagego hulide wali, te po ulade odaibao. Dage mego te bidi meni yai be tomode bidu, te hulide te oloba pomu po olama dua digi wali po, te bidi mebago te be peduba holama, hai olama waibao,” Jisasgo te po wali.

Bidigo te God delide naga wi yao po wali

(Matyu 10:28-31)

Te Jisasgo po ma wadolama weyu te po wali, “Eno abagi dedeo, eno dagebolo te tiwai po obe dao. Te bidi dabe augwaligo dage te olo tigi busi bulu elebaso, wi elamuo. Te nosali augwaligo magi sę me isiąyu, te dagego noma bidi me isiligobeo. Te eno po hanilama, dage dali obe dao. Te dagego mena bidide wi yaibawe? Te dagego wi yabo bidi dagebolo eno ola mawaibao. Te God dali dagego wi iyąo. Te Godigo bidi elama, te noma bidi dali siaba sąbo bomo agai usu yaibao. Eno mu tama dagebolo obe dao. God dali naga wi iyąo,” wali.

“Te dagego koneiąo, te dwasianu a naga banu dabe te bidi dabego te nogeai mone ge 2 toea sigo te banu sabo meniwe? Tiali goli, Godigo te tiwai dwasianu banu deli me te homu kone me gegeda palogobeo. Tama te ba dabe diluai bage meni goli, Godigo augwali konealubo dao. Te dage bidi dabe da, te genuai diluai bage dao. Godigo duga tobolu nisi dabe tigidali nedama, konea silai elalubo dao. Tama tibaso, God agai dage bugagia tonalubaso, dage gasa bidide wi egimio,” Jisasgo te po wali.

Dago bidi sabode Jisasgo nogi wabo hale egio

(Matyu 10:32-33 12:32 10:19-20)

Jisasgo te po ma wadolali, “Eno dagebolo obe dao. Bidi sabode bidibadi ‘Ao, ena da te Jisas wali pabo bidi dao’ wabo bidi, te bidi Godigo Bidi Mu eno dagalude Godigo ensel dabe sabode eno te po waibao, ‘Ao, te bidi ena wali asobo bidi dao.’ Tialima, bidi sabode ‘Woo, ena Jisas wali pabo bidi menio’ wabo bidi, te Godigo tagala palai bidi eno me dagalude Godigo ensel dabe sabode eno te bidide ‘Woo, te ena wali asobo bidi menio,’ waibao. 10 Bidi mego Godigo Bidi Mu dali dwai posobo po obaso da, Godigo te bidigo dwai posobo po wali te agai homu kone isiąyu gegeda palu tagalubo usu yaibao. Tialima, bidi mego Godigo Dwagi Yai Mobo Bidide dwai posobo po obaso da, Godigo te dwai po wali sela sąbo usu egobeo. 11 Dagego Godigo po pusubaso, augwaligo dage te Juda dabego bomo yai po ola mabo beba odasa selama, po tų ela mawainu eyu, ma te gavman tobolu bidigo gesabidide me po tų ela mawainu ebaso da, eno mena po obaso, te ena sana pabo po wagowe te homu eyu, te nago moni homu egimio. Magi baso menio. 12 Te sogo tama te Godigo Dwagi Yai Mobo Bidigo nago wabo po ola mawaibao, te nage tau sai hagede tiaibao,” Jisasgo te po wali.

Jisasgo te nai doado bage hauwa munalubo te umawai bidibolo po digi po elasa soali po wali

13 Te bidi sabode bidi mego te po wali, “Po ola mabo bidi, eno amabolo dena aya isu dabolo taga pali nai duga si te doado bage buga siao po wao.” 14 Jisasgo wei ponoyu, te po wali, “Bidi mego te nai bugulabo bomo enabolo mabe, te nai bugulabo eno usu egobeo. Te eno sę menio.” 15 Te we bidi dabebolo agai te po wali, “Dua dao, duga tobage nai yogo idali weyu. Nai hauwa mu mubo te bidi geswai bidibo menio. Nai hauwa mu mubo te bidi te aga bidibo ula sabo te usu menio,” wali.

16 Te Jisasgo te po digi po pusali, “Nai hauwa mubo bidi mego tǫde nai bugagia holama hauwa walobo gi me deli elaluali. 17 Aga homude te po wabo gagalali, ‘Ena gide holali nai muabo pesage dabe usu egobeo. Eno magi yagawe? 18 Eno te ebao,’ agai te po weyu, aga homugo tiali, ‘Eno gide ebo nai me, olo dwagi yai nai me muai hagede te eno hasia nai mudali be dabe hųginama, genuai be ma sę yaibao,’ te homu yai. 19 ‘Ena digi enabolo ma te po waibao, “Kisu bidi dao, ena homugo mu tuali, te nai dabe kibu be hauwade sę ela pali nai munalubao. Te tiali ena sę ebo tagalama, nai tuyu, ąį tuyu, elama, bugai homu eyu bidao.” Eno te po enabolo ma waibao,’ agai te homu yai. 20 Tiali goli, Godigo te bidibolo te po wali, ‘Nage da, mu umawai bidi dao. Megi hulide tama nage isaibao. Nage isaide, mena bidigo naga tobade yogwaluali nai dabe tigidali saibawe?’” Jisasgo te po wali. 21 Jisasgo te po silu, te po wali, “Te da e tǫde bidi dabego augwa tobade nai umabo selama, sabobo ąǫ te ebao. Tiali goli, Godigo gedude augwali te magi nai meni yai bidi bidaibao. Te nai dabe agade me elalugobeo,” Jisasgo te po wali.

Godiba homu tialubo kolesaga po wali

(Matyu 6:25-34)

22 Jisasgo aga wali bilibo bage dabebolo te po wali, “Tama tibaso, eno dagebolo te tama po obao, dagego te po begelama pusali pode te homu hauwa elama, te tigi tau sabo nai tulama bidabo te naiba homu dogia pigio, ‘Te mena nai tugowe?’ Te dagego tigi tau sabo sęde homu hauwa dogia pelama, te po wagio, ‘Te dago mena ugwa dabe gudugowe?’ te homu me dogia pigio. 23 Tubo nai da, sęgę menio. Tialima, bidi bidibo ula elalubode te sęgę elalubao. Gudabo ugwa dabede da, sęgę menio. Tialima, duga bidibo tigi elalubo da, te sęgę te ebao. 24 Te ba dabe suao. Augwaligo nai me bulama, nogogo sabe dao. Augwa tubo nai muabo be me meni dao. Tialima, Godigo augwali gesebo dao. Ba dabe da sęgę menio. Dage bidi da, sęgę ebaso, Godigo tubo nai mawaibao. 25 Dage bidi mego moni homu ela pabogo aga isabo bodolu didigili pabo usu egowe? Menio. Dagego te tama homu eyu da bugagia bidada piduaiba te homu ebo usu egobeo. 26 Te dagego te tama tiwai dwasianu sęnu me yabo usu isąbaso da, teda magi baso dagego te gasa me me naide moni homu ebawe? 27 Te bulu wel noswai duduli walobo dagego suiąo. Augwaligo sę dene bomo elama, augwa au ebo menio. Augwaligo te ugwa dabe me nigibeo. Tiali goli, te eno dagebolo obe dao. Te polobadu bidali king bidi nogi Solomongo te nai hauwa mu muani bidi agai aga tigide me te ugwa wiegi wiegi yai au yali goli, te e noswai dabe duduligo yali augo te Solomongo au yali aiyaba elaluali. a  28 Te noswai dabe Godigo aulubo dao. Te noswai dabe megi tama elalubo nago suali goli, te do da sasia pelama, te bidi dabego togolama, isiba ulaibao. Te olo noswai tiwai da, te Godigo aulubo da. Dage we bidi dabego homu dwasianu mu Godiba te begi pobao. God agai dagebolo ugwa maiabogo te noswai aulubo aiyaba elaluaibao. 29 Te dagego moni homu elama, te da tuabo mena nai dabe tueibawe, ma dago te mena ąį dabe tugowe, te homu ebo dao. Dagego te tama homu elama, te nai gegegimio. 30 Te God wali pisąbo te tǫde we bidi hani dabe tigidaligo te tama tebo moni homu elama, tigidali sogo gegebo dao. Dagego homugo tuabo homu ebo nai da, te duga Ayago agai dage maiabo homu konealubao. 31 Te nai dabe gegegebo tagalama, Godigo we bidi tonalubo sę wali bugagia pobaso da, ta nago homugo tubo nai me, ugwa me God agai mawaibao,” Jisasgo te po wali.

32 Jisasgo po ma wadolama, “Te dage ena dali bilibo bidi dabe, dage te dwasianu hani sipsip tiwai dao. Te dage wi egimio. Magi baso meni. Duga Ayago dagebolo po weyu, te aga dagego king bidibao po olama, Godigo dagebolo te we bidi tonalubo sę mawainu, dwagi yai homu elalubao. 33 Duga munalubo nai dabe tigidali gasa bidibolo menama, mone ge selama, nai meni yai we bidibolo maiąo. Dagego tama tiyu da, ta duga wiegi yai nai dabe dagalude muiąo. Tama tede te nai me dologobeo, bidi mego wi sogobeo, mano dabego me tugobeo. 34 Duga homu me duga te wiegi yai nai dabe munalubo digi elaluaibao,” Jisasgo te po wali.

Te wiegi yai sę ebo bidi dabe dabego sisi elalubo po

35 Jisasgo te po wali, “Magi magi nai asobo tonalu, sisi elaluao. Duga ugwa dabe hagana selama, te kukulu dąų walama, te lam sole udulama tolalu, sisi elaluiąo. 36 Sę ebo bidi dabego augwa genuai bidi we kębo digi pai asobo tonaluali yaligia iyąo. Te genuai bidi sabalu, tųba bego bego wabo si, polo tama tų dawai dao. 37 Te genuai bidi asu suagasali, te sę ebo bidi dabe te godege pisąma, te gedu dila pai bomonama bididubadi yaide, augwa genuai bidigo suagasobaso da, teda te sę ebo bidi dabe da dwagi yai homu pemene mu yaibao. Eno dagebolo obe dao, te genuai bidi agai digi te sę ebo bidi dabego sę ebogia, aga ugwa haganama, te kukulu dąų walama, ‘Dage dua yao’ olama, tubo nai augwalibolo mawaibao. 38 Te genuai bidi huli tomode me, ma be posabo magade te ba gogolo po hasia sogo obadi me, te aga asabo konesiąbaso, te augwali sisi elasa bidibadi yaide, aga te huli tomode me, ma be posabo magade me aga asobo si, te augwali dwagi yai pemene mu yaibao. Tama te po konealu iyąo. 39 Dagego te sę homu kone palao. Te be page bidigo te nai wi sabo bidi te mena sogo asobo te konegi sogo da, te da tonalubadi, te nai wi sabo bidi aga be aluama, te be tomoba asobo sulama gogolama tagaligi menio. Te tonalubadi ebaso, te nai wi sagasigi menio. 40 Ena da Godigo Bidi Mu dao. Dagego ena ma asabo bodolu konesąbaso da, dage me olo sisi tama elalu yao,” Jisasgo te po wali.

Genuai Bidigo homu tialubo wiegi yai sę bidi ma homu tiąlusiąbo dwai sę bidi te po olama wali

(Matyu 24:45-51)

41 Te Pitago Jisasbolo hanalu te po wali, “Genuai Bidi, nago te wali po digi po dabolo naga obawe, ma tigidali bagego me odomainu waliwe?” te hanalubo po tama Pitago wali. 42 Tama Genuai Bidigo wei ponoyu, te po wali, “Te eno te kolesaga elama, dwagi yai sę ebo bidibolo obao. Aga genuai bidigo te bidi te sę tigidali tonaluabo genuai bidi me ma nigilaibao. Te bidi te gasa sę ebo we bidi dabe nai dobayabo sogo dobayabo genuai bidi me nigilaibao. 43 Te sę ebo bidigo aga genuai bidigo mani sę idubadi yaide, aga genuai bidigo ma suagasobaso, te sę ebo bidi dwagi yai homu mu yaibao. 44 Eno dagebolo mu tama obe dao, te genuai bidigo aga te sę bugagia ebo bidi genuai bidi agai nai dabe tonaluabo bidi nigilaibao. 45 Tialima, te sę ebo bidigo aga homude te tama homu yali, ‘Eno genuai bidi polobadu pai goli, gesege ebo’ olama, agai te gasa sę ebo bidi dabe me, gasa sę ebo we dabe me elu yali, tama agai nai hauwa tubadi, te bomai ąį me hauwa tuyu elama, te aga tobolu gęǫ elama, te esela pai bidi tiwai eyu, te tama sę idubadi da, 46 me sogo te sę ebo bidi agai gegeda pelama, te agai konesąbo sogo me, te genuai bidi asama, te genuai bidigo te sę ebo bidi hwągo todogolama, denelege milama, muaibao. Tama agai te bidi te po odisąbo bidigo pesageba muaiba.”

47 “Te sę ebo bidi me aga genuai bidigo sę ya po wai goli, sisi elama, ya wali sę isąwai bidi, te genuai bidigo te sę bidi bįgo dwaigila mu elaibao. 48 Me ma, gasa sę ebo bidibolo aga genuai bidigo ya wali sę agai bugagia konesąnama, aga te bįgo elabo homu yabo sęba usu nama ebaso da, teda te sę ebo bidi te bigo te yalawagia dua digi elaibao. Te genuai nai mu sali bidigo te genuai nai wei ma ponabo sę yabo te elalubao,” Jisasgo te po wali. “Te we bidi augwaligo nai hauwa te bidi me deli te bidigo nogoba muaeibaso da, teda augwaligo te bidibolo te genuai nai mu wei ponabo te genuai te elalubao,” Jisasgo te po wali

We bidi bugulubo bidi Jisas dao

(Matyu 10:34-36)

49 Te Jisasgo po ma wadolali, “E tǫba sia nogagasu, ena asai dao. Tiabo homu eno polobadu yai dao. 50 Baptais sabode te ąįgo eno tigi siminibo tiwai, te nosali dene me eno tigi siminaibao. Eno baptais sabo gilama te ena dene sabo sę elalubao. Te dene siminasąbadi yaide, ena dwai homu mu ebao. 51 Dagego homugo eno e tǫba te tigidali we bidi dwagi yai homu ilagasali waliwe? Dagebolo eno mu po obao, te menio. Eno da te we bidi bugulagasu ena asai dao. 52 Tama we bidi bugulama, te tiwai me badu e badu bidaibao, me badu u badu bidaibao. Megi dąį elama, deli bede a naga bidai yabaso da, bugulama, selago te me si dali boi bidi eyu, te me sigo te me sela bage dali boi bidi eyu yaibao. Aya dabego augwa ogwa dali dwai homu eyu yaibao. 53 Ogwa dabego me augwa aya dali dwai homu yaibao. Ida dabego me augwa wegi dali dwai homu yaibao. Wegi dabego me augwa ida dali dwai homu yaibao. Ida dabego me augwa ogwago we dali dwai homu yaibao. Tama ogwago we dabego me augwa auwa dali dwai homu yaibao,” Jisasgo te po wali.

Jisasgo te po weyu, te megi pedalubo sę bodolu page koneao po wali

(Matyu 16:2-3)

54 Jisasgo te we bidi dabebolo te po wali, “Sia ge pabo badu dagalu sisili ela sobaso da, ‘Tulubage tulaibao,’ dagego te po polo wabo da, tama nosali tulubage tulubo dao. 55 Tama me badu habu badu wali asobaso da, ‘Teda te giliga nanobo moni posolo yaibao,’ duga tama wabo dao. Tama moni posolo ebo dao. 56 Dage ugwadu homugo po wabo mu umawai bage mu dao. Duga tǫgo me dagalugo me ebo sę sulama, konebo goli dao. Magi baso megi e ebo sę page dagego konebewe?” Jisasgo te po wali.

Nage po tų ilibo bidi dali polo po dodolao wali

(Matyu 5:25-26)

57 Jisasgo te po ma wadolali, “Magi baso dagego te mena kolesaga te doloba pai te dwagi yai kolesaga dawe, te homu elama dagalobo meniwe? 58 Bidi mego nago dwai sę yali olama, nage po tų ebo pesageba odasa pobadi yaide, te bidi dali dage si te sunumidu pobadi yaide te po tų bugagia dodolao. Meni baso da, nage po tų ebo bidi pageba kekasa pelama, te bidigo nage enesigi bidigo nogoba muaibao. Augwaligo nage kalabuside muaibao. 59 Eno nagebolo te po dolo mu tama obe dao, te po tų abelisąbaso, nage kalabus bede bididubadi yaide, te nageba dąį ilali monego nage te kalabus bede abelama simanisiąbadi yaide, nage munu me te bulu dią soagobeo,” Jisasgo te po wali.

Copyright information for `MPS