Luke 13

Te Jisas agai po obadi yaide, hasia asisąwai we bidi me pageba asali. Tama augwaligo Jisasbolo te po wali, “Te Galili tǫ we bidi me badu augwa sipsip kibu ela munama, Godibolo ofa olo mobadi yaide, tama te moni gavman tobolu bidi nogi Pailat agai po olama, gasa bidi dabego te we bidi ela muai. Tama ela munama, agai augwaligo kaneme me, te sipsip kibu kaneme me si taluali, tamadi,” augwaligo te po wali. Tama te po odama, Jisasgo augwalibolo te po wei ponani, “Te Galili tǫ we bidi augwali te tiwai isibaso, tama dagego homu augwaligo yali dwai sę te gasa Galili tǫde bidibo we bidigo yali dwai sę aiyaba elaluali, dagego te homu ebawe? Te tebeo. Eno dolo dagebolo obao, duga dwai sę ebo kolesaga tagalasiąbaso, teda dage me isaibao.”

“Te bulu nogi Siloam, tede moni bobobage sigi be degasa pai. Tama te sigi be degeyu yaide, we bidi hauwa te 18 elalio, augwali mu isali. Te be degali po dagego polo odali. Tama dagego e homu yali bogo, te Jerusalem be nani we bidi me badu augwaligo dwai sę dwasianu yali, tialima te sigi be degeyu elali we bidi augwali dwai dwai sę mu yali. Dagego te homu yali bogo. Te tebeo. Eno dagebolo e po obao, duga dwai sę ebo kolesaga tagalasiąbaso, teda dage me isaibao,” Jisasgo te po wali.

Jisasgo nedu duba po digi po begelama pusali

Te po olama, Jisasgo augwalibolo e po digi po pusali. Agai te po wali, “Bidi mego agai wain gide ni haga elaluali. Tama nosali te bidigo te ni du walaliwe naga suagasali. Tialima, haga du walobeo. Du walisiąbaso, agai te gi sę ebo bidibolo te po wali, ‘Edao. Kibu be selade ena e haga du suagasidu geani. Tiali goli, du walobeo. E ni gelao. E nigo te tǫ ili magi baso olo sabo dawe?’ Tama olama, te gi sę ebo bidigo te po wei ponani, ‘Genuai bidi, meo, e ni haga elalumainao. Kibu be delide elalumainu yaibao. Te kibu be tomode eno e ni haga pagede tǫ diganama, te tǫ ili mabo nai munama, tama taga paibao. Tama nosali, du walobaso, usu da. Tiali goli e ni haga walisiąbaso, eno gelaibao,’ te gi sę ebo bidigo te po wali,” Jisasgo te po wai.

Te Sabat sogode Jisasgo te tudi basia sali we usu ma ilalio

10 Te Sabat sogo mede Jisas te Juda dabego bomo yai po ola mabo be tomoba pelama, te we bidi dabebolo Godigo po ola mani. 11 Tama agai wabo po odali we bidi bidali tomode te tudi basia sali we bidali. Te dwai kauwa bidi mego te we dąų olama, te dwai gasi te we tigide munama elalubadi, tama te kibu be hauwa 18 te tama kibu bede te we tudi basia selama elaluali, te aga bugagia dolo ma dolalugobeo. 12 Tama Jisasgo te we sulama, agai te webolo i dwasianu weyu, asao wali. Tama te we asobo si da, Jisasgo te po wali, “We, nagede te elalubo gasi te silali dao, nage olo bidao,” wali. 13 Te Jisas agai nogo si te tudi basia selama te sugą sali wego tigide mubaso, tama polo tama te we tudi debela palu bugagia dolugulualio. Tama te wego Godigo nogi ugaba sali.

14 Te Juda dabego bomo yai po ola mabo be tobolu bidi agai sębę yali, Jisasgo te gasi yai we Sabat sogode dwagi yai ma ilalide. Tama tibaso, te tobolu bidigo te we bidibolo te po wali, “Nogo a naga bidama, e badu nogo deli sogo dago sę ebo usu da. Tama te sogode e bidigo pageba asiąo, agai dagego gasi sia somainu. Tialima, Sabat sogode asigimio,” wali.

15 Te Genuai Bidi Jisasgo te tobolu bidibolo te po wei ponani, “Dage magi ebo bidi dawe? Dagego po mobo mabo da, tiali goli duga po mobo mabo te dagego tibo po dali weyu, te wabo po wali pabo meni. Te dagego wabo po me te ebo kolesaga me deli tigi tiwai si me elalubeo. Te Sabat sogode, dage tigidaligo te duga kibu hos me, te kau kibu me muani madi pelama, te wę tumainu, te duga augwali muani pesage tagalama, te węba odasa pabo da, te Sabat sogode tiaibao. Tama te sę ebo si, dage moni homu ebo meni dao. 16 Me ma, e we da, te polobadu genuai bidi Abrahamgo hani we da. Tama e we te dwai kauwa bidi Satango dąų wali, kibu be hauwa 18 bidali. Eno e we tau salio, e we bugagia sese bidimainu sana palalio. Dwagi yai sę yalio. Eno dwai sę ebeo. Dagego homugo te eno dwai sę yalio, te homu ebawe? Te menio,” Jisasgo te po wali. 17 Tama Jisasgo wali wei ponani po te boi bidi dabe kone palama, tama augwaligo geda muani po me koneama, augwali hale yali. Tiali goli, te we bidi tigidali augwaligo Jisasgo bomai sę yali sulama, augwaligo dwagi yai homu mu yali.

Tubo nai ge mastet dwasianunu tede te po digi po begelama wali

(Matyu 13:31-33; Mak 4:30-32)

18 Te Jisasgo te we bidibolo e nai mastetde po digi po weyu, te po wali, “Te Godigo we bidi tonalubo sę, te magi sę tiwai dawe? Mena sę agai ebo sę tiwai dawe? 19 Godigo we bidi tonalubo sę te tubo nai nogi mastet ge tiwai dao. Te mastet ge da, te kemeni ge sabi si dao, dwasianunu mu dao. Tama bidi mego te mastet ge selama, agai gide tela yali. Tama te nai wai tedelama, te koliali. Koliama, te genuai holama, te ni tiwai pedelali. Tama te ba dabe augwa be te ni nologode sę yani,” Jisasgo te po wali.

Jisasgo te bret bo dabode po digi po elasa pusali po

(Matyu 13:33)

20 Te Jisasgo po wadolama weyu, te po ma hanalu wali, “Te Godigo we bidi tonalubo sę te mena sę tiwai dawe? 21 Godigo we bidi tonalubo sę te tubo nai nogi bret bo dabo nai yis tiwai da. We mego te yis selama, tama tubo plaua hauwa selama, te yis dali plaua dali si taluali. Tama taluama, te plaua tigidali bo dalio,” Jisasgo te po wali.

Jisasgo te po weyu, dage te dwasianu sunumi tomoba paibao po wali

(Matyu 7:13-14, 21-23)

22 Te Jisas te Jerusalem be naniba pabo ma gagalali. Tama peyu, tomode dwasianu be nani dabeba saboloyu, tama agai te we bidi dabebolo Godigo po ola mani. 23 Tama ebadi yaide, bidi mego aga hanalu wali, “Genuai Bidi, te Godigo ma sabo we bidi nisu nagawe? Hauwa ma sogowe? Deli deli ma sogowe?” wali. 24 Te Jisasgo te we bidibolo te po wali, “Te be tų dwasianu goli, dage bomo elama, te sunumi tomoba piąo. Magi baso meni. Eno dagebolo obao. We bidi hauwa Godigo we bidi tonalubo madigi tomoba pai hagede, ebadi, tiali goli te augwali usu egobeo. 25 Tama te be page bidi hodaluama, te be sunumi palia sai madigi, tama dage te be mesalode bulu badu dolalueibao. Tama dolalubadi, dagego te be sunumiba bego bego wabo gagalama eyu, te po waibao, ‘Genuai Bidi, tų dayao, da tomoba asaio.’ Tiali goli, agai dagebolo te po wei ponaibao, ‘Dage menadu asaiwe, eno konebeo. Dage eno konebeo.’ 26 Tama te sogo dagego e po wabo gagalaibao, ‘Woo, dago nage dali nai tuyu, wę tuyu yali. Nago dago be nanide da po ola mani,’ waibao. 27 Tiali goli, te be page bidigo dagebolo te po waibao, ‘Eno dagebolo obao, dage menadu asaiwe, eno konebeo. Dage piąo, dage tigidali dwai dwai sę ebo bage, dage enade gedao,’ waibao 28 Tama olama, dage tede bidiyu, te polobadu bidali bidi dabe te Abraham me, Aisak me, Jekop me, te Godigo po ola mabo profet bidi dabe me, augwali tigidali Godigo we bidi tonalubo madigi tomode bidibo dagego sueibao. Tiali goli, dage te bulu badu bidaibao. Dage bulu badu bidibaso, dage hwa waibao, duga kele gąųgo ma halua tueibao, te duga sębę ebaso tieibao. 29 Tama we bidi augwali te giliga asobo badu me, te giliga dega sabo badu me, te not bogo badu me, te saut bogo badu me, te tigidali bulu badu we bidi augwali deliba aselama, Godigo we bidi tonalubo madigi tomoba pelama, nai tueibao. 30 Suao. Me badu bidi megi te nosali sabi badu mu bidali bidi dabe da, te polasa pabo bidi yaibao. Me ma, megi me badu polasa pabo bidi goli, nosali te menio, te nosali tudi badu bidibo bage yaibao,” Jisasgo te po wali.

Jisasgo te Jerusalemde bidali we bidi godolo mu yali

(Matyu 23:37-39)

31 Te Jisasgo te we bidi dabebolo te po obadi yaide, te Farisi sibi bidi me badu aga pageba asai. Tama augwaligo agabolo te po wali, “Te genuai gavman bidi nogi Herot agai nage isilai hagede homu ebao. Tama tibaso, nage e bulu taga pelama, pao,” te Farisi bidi dabe augwaligo te po wali.

32 Tama Jisasgo augwalibolo te po wali, “Dage pelama, te bidi muma sabo te dwai uni yowi tiwai bidi Herot pageba pao, agabolo te po wao, ‘Edao, eno te dwai kauwa bidi sela sąyu, te gasi yai we bidi dwagi yai ma ilibao, megi me, do me, te sę yaibao. Tama duba eno sę siminaibao.’ Agabolo te po wao. 33 Tiali goli, eno pabo tų megi me, do me, duba me ena wali paibao. Magi baso meni. Godigo po ola mabo bidi me deli te gasa bulude isibaso da, te dwali. Tede isilamuo. Jerusalemde isigi sogo da, teda usu igi da. 34 Aua, dage Jerusalem bage dao. God agai po ola mabo bidi dabe dageba tagala palali. Tialima, dagego augwali ela muani, te masigi dabe sąyu, eleyu yali. Tama hauwa sogo eno homugo eno dage deliba sisinai hagede, pagia somainu, te ba kakaruk kimi aga gou dabe bogo dologode munama, bogogo bea sabo ąǫ tiwai. Tiali goli dagego hagelabo wali. 35 Edao! Megi dagego bidibo be nani Godigo tagalali, olo elalubao. Tama eno dagebolo obao, nosali dagego ena ma sugobeo. Dagego ena susiąma bidu, hauwa sogo sia saibao. Tama sia selama, nosali me dagego ‘Dago te Godigo nogide asobo bidigo nogi ugwaba sao’ wabo si, teda dagego ena ma sueibao,” Jisasgo te po wali.

Copyright information for `MPS