a[Gag 6:5-8]
b[Gag 7: 6-24]
c[Gag 18:20-19:25]
d[Ena da Godigo Bidi Mu dao.]

Luke 17

(Matyu 18:6-7, 21-22; Mak 9:42)

Te Jisasgo aga wali asobo bagebolo te po wali, “Te haniani dwai sę ebo kolesaga mu elalubo. Tiali goli, dwai sę ebo sunumi dayabo bidi nosali moni dene mu saibao. Aga te tobage sę eidali weyu, augwaligo aga magede moni masigi bonogo kęyu, te bidi te tamu ąį tomoba sąyu, aga tede isigi sogo da, teda te usu igi dao. Aga te tiwai isibaso, tama dwasianu dene saibao. Me ma, te bidi bidiyu, agai e nogi meni yai we bidi me deli te dwai sę ebo kolesaga tomoba gegeyu egi sogo da, teda agai te dwai sę mu egi dao. Te dwai sę eyu da, tama nosali Godigo agabolo moni dene mu mawaibao. Duga digi tobade te koneama, tonaluiąo, dwai sę edugio menio, bugagia bidiąo,” wali.

“Te kisalubo bidi agai nagede dwai sę ebaso da, teda nago agabolo ‘Te dwai sę igio’ wao. Tama olama, te dwai sę yali bidi aga homu begelebaso, agai yali dwai sę nago sela sąyao. Tama agai nagede dwai sę elama, tama nosali ‘Te ena nagede dwai sę yalide, te ena hobede ebao’ nageba wagasu da, teda nago aga yali dwai sę sela sąyao. Te bidi deli sogode te tiwai sę me badu nogo a naga olama, me badu nogo si ebaso da, teda nago aga yali dwai sę tigidali sela sąyao, wei ponogio,” Jisasgo te po wali.

Te po sela pabo bidi augwaligo Genuai Bidi Jisasbolo te po wali, “Dena homu kolesaga nageba muani digi, da usube. Da tau sao, dena homu kolesaga tigidali nageba mumainu. Te tiwai munama, te usu yaibao,” te po wali. Tama te Genuai Bidi Jisas agai augwalibolo te po wali, “Edao. Dagego kolesaga enaba mu dąų wabo sę te dwasianunu kemeni ge tiwai dwasianu elalugi sogo da, teda e gasa nigo dagego wabo po odigi da. Dagego e gasa niba ‘Nage naga pedali dabe tǫdu gudama, tama te tamu ąįba pelama, naga digi teba buligi pao’ obaso da, teda te nigo te po odaibao, teba buligi paibao,” wali.

Jisasgo te po me wali, “Dage tomode bidi me deli agai sę ebo bidi elaluyu, tama te sę ebo bidi agai te gi tǫ elebo sę ebo da, ma te kibu sipsip tonalubo dao. Tama te sę ebo bidi te sę silama, tama beba asobo si, nago agabolo ‘Naga nai polo tuao’ wabo dawe? Menio. Me ma, nago agabolo te po waibao, ‘Eno tubo nai nogeao. Nai nogeama, tama tubo nai mabo ugwa gulama, tama eno nai ena magasu, tau siyu, tiao. Tama nosali naga nai tuagameo,’ te po waibao. Te sę ebo bidi agai genuai bidigo nage te sę yao wabo po odoyu, te sę ebaso da, te genuai bidi agai nage usu da wabowe? Meni. 10 Te dage dali yaligiama, ‘Te sę yao’ po olama, tama te sę dagego silibo si, te po wao, ‘Da da, sę ebo bage naga dao. Dabolo dage usu da po olamuo. Dago nogode muani sę naga dago yalio,’ te po wao,” Jisasgo te po wali.

Jisasgo oiyabe gasi sai bidi nogo si sese ma ilali

11 Te Jisas te moni taun Jerusalemba pabo ma gagalama, te Samaria tǫ me, Galili tǫ me te bulu si tomo te dąįba pali. 12 Tama aga dwasianu be nani tomoba pai hagede, te oiyabe gasi sai bidi nogo sigo aga sunumide suali. Tama te oiyabe gasi sai bage digibulu gana dolaluali. 13 Tede dolalubadi, augwaligo i wali, “Jisas, Genuai Bidi, nago da homu dene eyu, da tau mao,” wali. 14 Tama Jisasgo augwali sulama, tama agai augwalibolo te po wali, “Dage piąo, te pris bidi dabe pageba piąo. Te bageba pelama, duga tigi augwalibolo waseligi piąo,” te po wali. Tama odama, te oiyabe gasi sai bidi dabe pabo gagalali. Augwali pebelayu subadi, augwa tigi sese ma yali suali, tomode. 15 Tama augwa tigi sese ma yali sulama, tama bidi me deli aga geasa pelama, i bomona wali, aga Godigo nogi ugwaba siyu, Jisas pageba ma asali. 16 Tama Jisasgo sągą pagede aga kidu pogulama, nage usu da weyu, “Nage dwagi yai bidi mu dao,” wali. Te gasi meni yani, sese ma yali bidi da, te Samaria bulu bidi dao, Juda hani isąwai bidi.

17 Te Jisas agai te we bidi dabebolo te po hanalu wali, “Eno te oiyabe gasi sai bage nogo si sese ma ilali. Tama te bidi me badu menadewe? 18 E Juda hani isąwai bidi naga agaduba geasa aselama, Godibolo nage usu dao wagasali. Te eno sese ma ilali Juda dabe augwali magi baso nage usu da wagasobewe?” 19 Tama Jisasgo te nage usu dao wagasali bidibolo te po wali, “Nago naga homu kolesaga tigidali enaba mubaso, teda nago tigi sese ma yali dao. Tama tibaso, hodaloyu, naga beba pao,” wali.

Godigo we bidi tonalubo sogo asaibao

(Matyu 24:23-28, 37-41)

20 Te Farisi hani bidi me badu augwaligo Jisas hanalu weyu, te po wali, “Te Godigo we bidi tonalubo sogo nisu asogowe?” wali. Tama Jisasgo te po wei ponani, “Te Godigo we bidi tonalubo sogo asobo sunumi te bidigo polo konegobeo, bidigo gedugo susiąbo nai dao. 21 Godigo we bidi tonalubo sę dage tomode pedalubo te gagalai dao. Tama bidi dabe augwaligo ‘Ede pedelali’ ma ‘Ude pedelali’ po wagomeo,” Jisasgo te po wali.

22 Te Jisasgo aga wali asobo bidi dabebolo te po wai, “Ena da Godigo Bidi Mu da. Te nosali sogode dagego ena deli sogo ma sue hagede, tiali goli dagego ena sugobeo. 23 Tama bidi dabe augwaligo geda muyu, dagebolo ‘Aga ede bidibao’ ma ‘Aga ude bidibao’ po augwaligo waibao. Tama dage augwali wali pigimio, sugi pigimio. Augwaligo wabo po odogimio. Dage kone dao. 24 Te be sele eyu, te dagalude moni ula eyu ebo dao. Tama te tiwai Godigo Bidi Mu ma asobo sogo hania te tiwai yaibao,” wali.

25 “Tiali goli, hasia ena e tǫde bidibadi, te megi bidibo we bidi augwaligo enabolo dene hauwa menama, ena sela sąwaibao, tudiba muaibao. 26 Ena da Godigo Bidi Mu dao. Tama ena pelama, tama ma asobo sogode, te tǫde bidibo we bidi augwali te polobadu bidali bidi Noa aga tǫde bidali sogo bidali we bidigo yali sę tiwai yaibao. a  27 We bidi dabe augwaligo te sogo God homu isąyu, nai tuyu, wę ma tuyu, bidali. Augwa we kęyu, we ma mayu, bidali. Tama augwali te tiwai bidibadi yaide, te bidi Noa te moni geba tomoba peyu, tama te moni ąį polo asiyu, te węgo te we bidi tigidali eleyu yali. b  28 Ena e tǫba ma asobo si, te polobadu bidali bidi me aga nogi Lot, aga tǫde bidali sogo me tiwai yaibao. We bidi augwaligo God homu isayu, nai tuyu, wę dabe tuyu, bidali. Augwaligo haniani nai dobuyu, gide haniani nai buluyu, be dabe sę eyu, bidali. Augwaligo God tama homu isayu, bidali. 29 Tiali goli, te bidi Lot aga te be nani nogi Sodom taga pabo sogode, te moni sia dabe me, bogoli ebo posolo masigi dabe me, dagaludu tulali, te Sodom bulu we bidi tigidali ela muani. c  30 Te tiwai pedelaibao, nosali, ena e tǫba ma asobo sogode. d  31 Tama te sogode niwai bidi aga be pedude bidiyu, agai doado bage be tomode munalubaso, tama aga sai hagede aba tǫba dulama, be tomoba pelamuo. Me ma, aga gide bidibo bidi me, aga bede muani doado bage sai hagede ma geasa pelamuo. 32 Te polobadu bidali bidi Lot aga we, tede koneao, te yaligia yabuo. Te we aga beba ma tonaluyu, isali.”

33 “Niwai bidi aga e tǫde bidibo sogo aga tobade aga digi sese yai da homu eyu da, teda dowaibao. Me ma, niwai bidi ena tobade aga tǫde bidibo sogo sia sobaso da, teda nosali ma bidaibao. 34 Eno dagebolo obao, te Godigo tagala palai bidi ma asobo sogo hulide te bidi si be saide pila mubadi yaide, me naga oda siyu, me naga tagalaibao, te ensel dabe augwaligo. 35 Te sogo ulade me, we si tubo nai sisilubadi yaide, me naga oda siyu, me tagalaibao,” Jisasgo te po wali. 36 [“Bidi si gide bididubadi yaide, me naga oda siyu, me tagalaibao,” Jisasgo te po wali.] 37 Tama Jisasgo aga wali po simanama, aga wali asobo bagego aga hanalu wali, “Genuai Bidi, te sę yaibao wali menade yaibawe?” wali. Jisasgo augwalibolo te po begelai po weyu, te po wali, “Te ba kemodage dabe augwali te isali tigi munalubo madiba sisinaibao,” wali.

Copyright information for `MPS