a[Ais 40:3-5]

Luke 3

Te we bidi baptais mabo bidi Jon agai Godigo po pusali

(Matyu 3:1-12; Mak 1:1-8; Jon 1:19-28)

Te Sekaraiago ogwa Jon te bidi meni yai bulude bidibadi, Godigo agai po agabolo konelali. Tama te sogo tr gavman genuai tobolu bidi me nogi Taiberius, me sogo Sisar wabo da, agai sę gagalali kibu be nogo si olama, me sągą sese silali. Bidi me nogi Pontias, me sogo Pailat wabo, te Judia bulude aga gavman tobolu bidi bidai dao. Me Herot aga Galili tǫde gavman tobolu bidi bidali. Aga ama Filip te bulu me nogi Ituria dali Trakonitis dali si tonaluali. Bidi me nogi Lisanias agai te bulu me nogi Abilene tonaluali. Te sogo te pris bidigo tobolu bage nogi Anas dali Kaiafas dali si bidibadi dao. Godigo po Jonbolo ola mobaso, Jon aga te pabo ąį nogi Jordan sesege bulu dabeba pali. Agai te bulu we bidi dabebolo po pusuyu, tama te po wali, “Dagego dwai sę eboba tudi ilama, dage tigidali baptais sao, tama Godigo dagego dwai sę yali gegeda palomainu,” tama po pusudu geani. Jongo yali sę te Godigo po pusali profet bidi Aisaiago polobadu bukude asęani yaligia te ebao. Aisaiago te polobadu bukude asęyu, tama te po wai dao, “Te bidi me deligo bidi meni yai bulu tomode i udubao, ‘Genuai Bidi asobo tų geselao. Aga bilabo tų dolo mu nigao. Tigidali odogo dabe mu pągąnao. Tigidali bobiabi dabe du dabe kigila palao. Gagila bilai tų dabe me dolo ma dodolao. Tigidali we bidigo Godigo olo hobede elama, tau sabo kolesaga augwa gedugo sueibao,’” te Aisaiago te po polobadu asęai dao. a 

Tama we bidi hauwa mu Jon agai augwali baptais momainu Jon aga pageba beasagasali. “Dage dwai hasamani dabe,” agai augwalibolo te po wali. “Godigo dage dali yabo sębęde dage sana pagameo po tego dagebolo waliwe? Dagego dwagi yai sę ebo sulama, dagego dwai sę dabe tudiba sąwai yabao po waibao, te gasa bidigo te po waibao. ‘Abraham da dago wąį mu da, dago dwai sę meni,’ te homu ebo gagali igimio. Eno dagebolo megi mu po tama obe dao. Godigo e elewi dabego Abrahamgo bulai wąį hani sibi nigilabo homu eyu da, te agai tegi dao. Ni gelabo bidigo te ni tigide sae ilama, te sae nide hwą munalubaso da, te ni tamadi tama gelaibao homu yaibao. Ni dabe du gesego walisiąwani ni dabe da, gelama, isiba sąwaibao. Dage te tobage sae ilali ni tiwai dao,” Jongo te po wai.

10 Te bagego agabolo hanalu wali, “Dago megi magi sę egowe?” 11 Jon agai te poba wei ponoyu, te po wali, “Holobo ugwa si munalubo bidigo me deli te holobo ugwa meni yai bidibolo mao. Me tubo nai munalubo bidigo me te meni yai bidibolo dobayao,” Jongo te po wali.

12 Takis sesa bilibo bidi dabe me badu Jon pageba te baptais sainu asama, hanalu wali, “Po ola mabo bidi, dago magi yagawe?” wali. 13 “Te takis mone sa wali gilama dolo tama naga weli pelama siyu, te dagego homugo edelama obanu sigi pigimio,” Jongo te po wali.

14 Enesigi bidi dabe me badu Jon pageba asama, hanalu wali, “Da da, magi yaliwe? Dago da magi egowe?” Jongo augwalibolo te po wali, “Dagego gasa bidigo mone bomo elama, sigimio, me tibo po tų elama, sigimio. Duga mabo mone deli naga sabo homu elasa siąo,” wali.

15 Te we bidigo bugai homu mu hodolali. Augwaligo homugo Jon te Godigo we bidi tau somai hagede sa muani bidi Krais yaliwe homu yali. 16 Tama tibaso, Jongo augwali tigidalibolo te po wali, “Eno dage da ąįgo naga baptais mobao. Tiali goli ena ela holai bidi deli nosali asobao. Eno agai sągą nadoba pedabo me usu me egobe. Tama te bidi agai te Godigo Tedali Mobo Bidi dage me badubolo mawaibao, te baptais mabo tiwai. Agai dage me badubolo sia mawaibao, te baptais mabo tiwai. 17 Nai dagalobo bidi aga savol selama, tubo nai wit ge dali sabea dali si dagalaibao. Tilama, aga te nai ge naga aga beba muyu, sabea naga te siaba muaibao. Tama te nosali asobo bidi agai te we bidi dagalu me te hasi yaibao, augwali me badu agai te sula sisąbo siaba mawaibao,” Jongo te po wali.

18 Te hauwa sogo haniani tųdu Jongo dwagi yai poba asiąo nama, te Godigo po pusubo sogo agai mobo maduali, te we bidibolo, dwai ebo kolesaga hasegelemai hagede Jongo tama odualio. 19 Tiali goli, Jongo pogo gavman tobolu bidi Herot guni pagede mu ela paludali. Te magi baso menio. Aga amago we Herodias aga dagala selama, me hauwa sogo dwai dwai sę mu iduali. 20 Tama Herot aga Jon kalabusiba ma muanigo Herot agadi dwai sę tomoba mu togwa pai dao.

Jongo Jisas baptais mani

(Matyu 3:13-17; Mak 1:9-11)

21 Te Jongo tigidali we bidi baptais menama, tama nosali agai Jisas me baptais mani. Tama baptais selama, Godibolo po odubadi yaide, dagalu tomode si buga pali. 22 Tama Godigo Tedali Mobo Bidi dagaludu dulali. Te Godigo Mobo Noma Bidi ba hi tiwai aga toboluba dugayagasali. Dagalu badu i weyu, te po wali, “Nage eno homu kęąlubo Ogwa mu dao. Eno nage dali dwagi yai homu elalubao,” te po wai.

Jisas aga nǫųgo nogi dabe e dao

(Matyu 1:1-17)

23 Te bidi Jisas agai kibu be bidi sese deli olama, me bidigo nogo si wagi sobadi, te 30 yia wabode aga sę ebo gagalalio. Tigidali we bidigo homugo Jisas Josepgo ogwa daba homu yali. Tama Josep aga aya Heli. Heli aga aya Matat, Matat aga aya Livai. 24 Livai aga aya Melki, Melki aga aya Janai, Janai aga aya Josep. 25 Josep aga aya Matatias, Matatias aga aya Amos. Amos aga aya Nehum, Nehum aga aya Esli, Esli aga aya Nagai. 26 Nagai aga aya Mat, Mat aga aya Matatias, Matatias aga aya Semen, Semen aga aya Josek, Josek aga aya Joda. 27 Joda aga aya Joanan, Joanan aga aya Resa, Resa aga aya Serubabel, Serubabel aga aya Sealtiel, Sealtiel aga aya Neri. 28 Neri aga aya Melki, Melki aga aya Adi, Adi aga aya Kosam, Kosam aga aya Elmadam, Elmadam aga aya Er. 29 Er aga aya Josua, Josua aga aya Elieser, Elieser aga aya Jorim, Jorim aga aya Matat, Matat aga aya Livai. 30 Livai aga aya Simeon, Simeon aga aya Juda, Juda aga aya Josep, Josep aga aya Jonam, Jonam aga aya Eliakim, 31 Eliakim aga aya Melea, Melea aga aya Mena, Mena aga aya Matata, Matata aga aya Natan, Natan aga aya Devit, 32 Devit aga aya Jesi, Jesi aga aya Obet, Obet aga aya Boas, Boas aga aya Salmon, Salmon aga aya Nason. 33 Nason aga aya Aminadap, Aminadap aga aya Atmin, Atmin aga aya Arni, Arni aga aya Hesron, Hesron aga aya Peres, Peres aga aya Juda. 34 Juda aga aya Jekop, Jekop aga aya Aisak, Aisak aga aya Abraham, Abraham aga aya Tera, Tera aga aya Nahor, 35 Nahor aga aya Seruk, Seruk aga aya Reu, Reu aga aya Pelek, Pelek aga aya Eber, Eber aga aya Sela. 36 Sela aga aya Kainan, Kainan aga aya Arpaksat, Arpaksat aga aya Siem, Siem aga aya Noa, Noa aga aya Lamek. 37 Lamek aga aya Metusela, Metusela aga aya Enok, Enok aga aya Jaret, Jaret aga aya Mahalalel, Mahalalel aga aya Kainan. 38 Kainan aga aya Enos, Enos aga aya Set, Set aga aya Adam, Adam aga aya God dao.

Copyright information for `MPS