a[Mt 11:14; 17:10-13; Mk 9:11-13; Lu 1:17; Jo 1:21]

Malachi 4

Te Genuai Bidigo bodolu si pedelaibao

Te Tigidali Bomo Elalubo Genuai Bidigo te po wai, “Bugagia odiąo,” wali. “Me sogo bodolu si pedaliyu, siago te hagoma ebo we bidi tigidali me dwai sę ebo we bidi ulaibao, siago te wa pai kala dabo tiwai yaibao. Te side te siago augwali dolama, tama augwali tigidali mu silaibao,” po wai dao. “Tiali goli dage eno po wali pabo we bidi, te eno bomogo dage ma saibao. Eno bomo te giliga ulago bomo tiwai elalu, tama dage we bidi te giligago tigi dili ilibo tiwai yaibao. Te dage wiegi yai pemene eyu, te bulmakau wai dabe te banis tomode bidai te buluba dinibo side te sasa mano pabo tiwai ebo dao. Eno te sę dabe ebo sogo te dwai sę ebo bidi dabe dagego aiyaba elalueibao, tama augwali te tǫ hogomu agabo tiwai yaibao,” wai dao.

“Dagego te eno sę bidi Moses nogoba te Sainai bulu dude mani po dabe me bomai po me te munu me tagaligio. Eno te po agabolo mani te tigidali Israel we bidigo wali pomainu yai dao,” Genuai Bidigo te po wai.

“Te dwai siago te dwai sę ebo bage dolabo bodolu side te eno side te genuai si ebaso, te we bidi tigidali te wi dwai mu yaibao. Tiali goli, hasia bolo te eno profet Elaija te dageba tagala palama, tama nosali te si pedelaibao,” wai dao. a  “Tama agai te aya me wai dabe te deli haliga pedalumainu ilama, tama augwali tama meni eyu da, teda te eno dagego bulu tǫ kantri dolaibao,” Genuai Bidigo te po wai.

New Testament

Copyright information for `MPS