a[Tib 118:22-23]
b[Bom 6:4-5]
c[Hos 6:6]

Mark 12

Te bono du gi tonalubo bagede po digi po begelama wali po

(Matyu 21:33-46; Luk 20:9-19)

Tama Jisasgo te po meba begelama, te Juda dabego genuai bagebolo wai. Agai te po wali, “Te bidi me deli agai te bono du wain gi bulama, tama obogo bagulali. Tama agai te wain bono du ąį sabo agabo madi nigilama, tama te gi tonaluabo bidigo bobage sigi be me deli sę yani. Tama agai te gi te bisnis sę yainogo ebo bidi dabe mebago nogoba muai. Tama aga digi te aga digibulu bulu habuba palio. Te nosali aga te bodolu sogo pedalubaso, teda agai te sę bidi me deli te wain gide sę ebo bidi dabe bidalubo madiba tagala palai. Agai homugo te gide nai meba te agaba momainu yai. Tama augwaligo te sę bidi pageabi elama, tama aga dodolagia elama, tama aga olo ma tagala palalio. Tama te gi page bidi agai gasa sę bidi me te augwaliba tagala palali. Tama augwaligo aga tobolude gagai ilama, tama agaba dwai sę ilali. Tama agai sę bidi me dedeli ma tagala palai. Tama augwaligo te bidi aga ela muai. Tama agai sę bidi hauwa mu ma tagala palai. Tama augwaligo meba olo eliyu, tama meba te augwaligo ela muyu yali. Tama agai bidi deli mu ma elalualio. Te aga ogwa, agai godolo mu yai. Nosali mu agai te ogwa te wain gi sę ebo bidi dabe bidalubo digi ma tagala palali. Agai te tiwai homu yai, ‘Te augwaligo eno ogwago po odaiba’ homu yai. Tiali goli te gide sę yali bidi dabego augwa hasi tomode po mia siyu, augwaligo te po wai, ‘Te e bidigo te aga ayago doado bage tigidali nosali saibao. Te bageo, dago te aga ela muinao. Tama dena digi te gi tolaluaibao,’ te po wai. Tama olama, te augwaligo aga selama, ela muai. Tama augwaligo aga tigi te gi sesege bulu badu sąwani.”

“Tialima, te wain gi page bidi agai magi yaibawe? Te aga aselama, tama te gide sę yali bidi dabe te augwali ela muaibao. Tama agai te gi te gasa bidi meba augwaligo nogoba mawaibao. 10 Dagego te Godigo po bukude asęani po me deli dagego nedebewe? Agai e tiwai po wali dao:

Te sę bidi dabego sela sąwani masigi, megi da aga
te be polalubo kele ni tiwai dąų elalubo masigi
pedalai elalubao.
11 Genuai Bidigo digi te sę
pedalumainu ilali, tama dago sulama, te wiegi yai
mu yai.’ a 
Dagego te po polobadu nedebewe?” Jisasgo te po wali.

12 Te Juda dabego tobolu bidi dabe augwaligo Jisas
pageabi elama tuainu yali, tiali goli augwali te we
bidide wi yai. Augwaligo koneani, Jisasgo te po digi
po begelama, te augwali tobolu bagede wai. Tama
augwaligo aga taga peyu, tama augwali palio.

Te gavmanibolo takis mabo sęde po

(Matyu 22:15-22; Luk 20:20-26)

13 Tama nosali te Juda dabego tobolu bidi dabe augwaligo te Farisi meba dali, te Herot wali pali bidi meba me augwali tagala palama, te augwali Jisas bidiboba pali. Augwaligo te Jisas usu sabo po meba wainogo yai. 14 Augwali aselama, tama augwaligo agabolo te po wai, “Tisa, po ola mabo bidi, dago koneani, nage mu po wabo bidi dao. Tama nago homugo te bidi delide homu naga me egobeo. Nago te nogi yai bidi dali gasa po me tedali weyu, te nogi meni yani bidi dali gasa po me tedali weyu me egobeo. Menio. Nago te mu pode naga te Godigo kolesaga te we bidi augwali ola mayu ebao. Nago mena homu ebawe? Te dago takis te Rom gavman tuni bidi mu Sisar agabolo mobaso, tebogo dago te Godigo bomai po bolobowe, ma meniwe? Dago mawaibawe, ma dago magobewe?” Augwaligo te po wai.

15 Tiali goli Jisasgo augwaligo te tibo po wabo te agai koneama, tama agai augwalibolo te po wai, “Magi baso dagego ena usu sobawe? Te mone ge me deli sela aselama, eno sueibao,” te po wai. 16 Tama augwaligo te mone ge me deli sela asali. Tama agai augwalibolo hanalu wali, “Te e mone gede elalubo noma me te asęani nogi te dego dawe?” Tama augwaligo te po wai, “Te gavman tuni bidi Sisargo dao.” 17 Tama Jisasgo augwalibolo te po wei ponani, “Te Sisar gavmanigo nai, te dagego Sisarbolo maiąo. Tama Godigo nai, te dagego Godibolo maiąo,” wali. Tama augwali te pode noma mu sali.

Te bidi isąma ma hodalobo po

(Matyu 22:23-33; Luk 20:27-40)

18 Megi da te Sadyusi hani bidi meba augwali te Jisasba asali. Te hani augwaligo te homu yai, te isali bidi ma hodalogobeo wai. Tama augwaligo agabolo hanalu wagasali. 19 “Tisa, po ola mabo bidi, Mosesgo te po me deli asęyu, dabolo te tiwai bomo yai po wai: te bidi me deli isąma, tama agai wai meni yani, tiali goli aga we te bididubaso da, teda te bidi aga amago te we selama, tama aga isali ama tau siyu, te wai ame nomainogo yao, te Mosesgo dabolo te bomai po mawai dao. 20 Tialima, te ama a naga olama me badu si bidai. Te gomunai bidigo we sali, tama nosali aga isali, tama wai me ame nisiąwai. 21 Tialima, tomo bidigo te we sali, tama aga me isai, tama wai me ame nisiąwai. Tama te tudi badu bidigo me tiwai yai. 22 Te tiwai naga ela pidubadi, tama te a naga olama me badu si ama dabe tigidaligo te we sesa pali goli, te wai me ame nisąma, tama augwali isila pai. Tama nosali mu, te we me isali. 23 Tialima nosali te isai we bidi dabe ma hodalobode, te sogo te we aga te dego we mu bidigowe? Nago koneani, te bidi a naga olama me badu si bidi dabego te we te augwaligo selama bidai,” te Sadyusi bagego te po wai.

24 Tama Jisasgo augwalibolo te po wai, “Dagego te Godigo po bukude elalubo po page me konebeo. Tama te Godigo bomo me dagego konebeo. Tama tibaso, dagego te we bidi ma hodalobode wabo po geda muyu obao. 25 Te isai bidi dabe te gų page tagalama ma hodalobo sogode, te isai we bidi augwali te bidigo we ma siyu me egobeo. Menio. Te augwali te dagalude bidalubo ensel mobo bidi dabe bidalubo tiwai gilama bidaluaibao. 26 Tiali goli te isai bidi dabe ma hodaluaiba po wabo, te dagego te Mosesgo asęani bukude te dwasianu nide sia dali po wali te po nedebo meniwe? Te wali pode Godigo te po Mosesbolo te polobadu isali bidi dabede wai, ‘Ena te Abrahamgo God, me Aisakgo God, me Jekopgo God te dao,’ te po wai. 27 Tama te po page e dao, ma te bidi dabe selago mobo noma isigi sogo da, teda God da augwaligo God me menigi da. Tiali goli te tiwai elalubeo. Menio. Aga da, te bidibo ula elalu bidalubo bidi dabego God dao. Te dagego po te mu geda muanio,” Jisasgo te Sadyusi bidi dabebolo te po wai.

Godigo hasia polalubo bomai po

(Matyu 22:34-40; Luk 10:25-28)

28 Te Juda dabego bomai po page ola mabo bidi me deli aga asama, tama agai te augwa hasi konila po wabo odali. Tama agai odobadi, te Jisasgo wiegi yai po augwaliba wei ponobo po odali. Tama agai Jisasbolo hanalu wali, “Mena bomai po agai te tigidali bomai po aiyaba elaluama, tama te polalubo dawe?”

29 Jisasgo po wei ponoyu, agabolo te po wai, “Te polalubo bomai po te e dao:

‘Dage Israel hani we bidi, dagego odiąo! Genuai
Bidi, dago God, aga deli digi naga te dago Genuai
Bidi dao.
30 Tama nago te Genuai Bidi godolo
mu yao, te nago God dao, te nago homu tigidaligo
me, te nago noma bidi tigidaligo me, te nago homu
kolesaga tigidaligo me, te nago bomo tigidaligo me
te aga godolo mu yao.’ b 
31 Tama te si wabo bomai po te e dao:
‘Nago gasa bidi godolo eyu, te nago naga godolo
ebo tiwai gilama yao.’
Te gasa bomai po te genuai elama, tama te bomai po si te aiyaba me elaluai me elalubeo,” Jisasgo te po wai.

32 Tama te bomai po page ola mabo bidi agai te tiwai po Jisasbolo wai, “Tisa, po ola mabo bidi, nago po te wiegi yai. Mu dao, God agaduba deli naga te Genuai Bidi, tama gasa bidi me bidibeo. 33 Dago aga godolo mu ebo, te tigidali homugo me, te tigidali kolesagago me, te tigidali dago bomogo tama tiao. Tama dago gasa bidi godolo yainu te denade godolo ebo tiwai gilama yao. Dago te bomai po si wali pali da, teda te kolesagago te dago te Godibolo siaba tigidali te hasa ulubo ofa ilibo te tigidali aiyaba elaluama, tama te gasa ebo ofa tigidali me te aiyaba elalua silaibao,” te bidigo te po wai. c 

34 Jisasgo te bidigo po wei ponobo po odali, te wiegi yai kolesaga koneai bidigo po wabo tiwai gilama yali, tama Jisasgo agabolo te po wali, “Nage te God dologoba pabo te nagede digibulu me elalubeo,” te po wai.

Te sogo gagalama tama tigidali bidi dabe augwaligo usu sabo po meba te Jisasbolo hanalu wabo te augwali wi yai dao.

Jisasgo te Krais po augwaliba hanalu wali

(Matyu 22:41-46; Luk 20:41-44)

35 Jisas te Moni Lotu Be tempel tomoba pelama bidiyu, tama te we bidi dabe augwaliba po ola mabo sę yai. Tama ebadi, agai te po hanalu wali, “Magi baso te Juda dabego bomai po page ola mabo bidi dabego te po wabo, te Krais, Godigo te we bidi tau somainu dąį ilali bidi, te aga te Devitgo ogwa da po magi baso wabo dawe? 36 Te polobadu Godigo Tedali Mobo Bidigo te Devitbolo te homu kolesaga mobaso, tama Devitgo digi te po wai,

‘Genuai Bidi agai te eno Genuai Bidibolo te tiwai po
wai dao: “Nage eno dolo nogo badu duayagasao, te
nosali te eno nago boi bidi dabe aiyaba elaluama,
tama augwali nago dologoba muabo sogo usu
nagasaibao,” te po wai.’
37 Devitgo digi aga te Genuai Bidi nogi yali. Tama tibaso, te mena tama te Genuai Bidi aga te Devitgo bulai wai pedalaibawe?” Jisasgo te po wai.

Te bomai po koneai tisa dabego kolesagade dua dao po wai

(Matyu 23:1-36; Luk 20:45-47)

Te genuai we bidi hani augwaligo te Jisasgo ola mani po odoyu, wiegi yai homu pemene yai.
38 Tama Jisasgo augwali ola mayu, tama agai te po wai, “Dage te bomai po page koneai bidi dabe dua dao. Augwali te bobage gudubo ugwa belama pabo homu godolo ebo dao. Te we bidi sisinibo pesagede te we bidi augwalibolo te siade da wabo te augwaligo godolo naga ebo dao. 39 Augwali te bomai po ola mabo lotu bede te we bidi gesabidi badu te polalubo ni namide duayabo godolo ebo dao, tama te genuai nai da tubo sogode te augwali te polalubo ni namide duayabo homu godolo ebo dao. 40 Augwaligo te augwa bidi isai we dabe tibo po weyu, tama augwaligo be dabe wi siyu ebo dao. Tama te ebo kolesaga mesegelainogo eyu, tama augwaligo tibo gedu haluasa po bobage weyu ebo dao. Te Godigo po tų ebo sogode te bidi dabe augwaligo genuai sęgę mu saibao,” Jisasgo te po wai.

Doado bage meni yai wilawe we agai Godiba ofa mani

(Luk 21:1-4)

41 Jisas te Moni Lotu Be tempel tomode bidiyu, tama aga te Godibolo ofa maiabo mone ge mubo halobage pąde dulaluai. Tama agai te we bidi dabego te halobageba mone ge tulagasobo suali. Tama doado bage hauwa elalubo bidi dabego masigi hauwa tulagasu yai. 42 Tama aga bidi isai wilawe we, te doado bage meni yai we me deli, aga aselama, tama te dwasianu nogeai mone ge si te halobage tomoba bulagasali, te mama yai dwasianunu masigi si naga dao. 43 Tama Jisasgo aga wali pabo bidi asomainu i olama, tama augwalibolo agai te po wai, “Eno mu po dagebolo obao, te aga bidi isai wilawe we, te doado bage meni yai wego, agai te mone ge muani, te tialigo te tigidali we bidigo te halobageba mone muani mone te aiyaba elalualio. 44 Magi baso meni, te tigidali we bidi augwaligo te mone ge hauwa elalu, tama augwaligo meba naga te halobageba muani. Tiali goli te we aga te mu menia sai digi, tama agai aga mone tigidali te halobageba muani, tama aga nai me badu abela tuabo te mu meni dao,” Jisasgo te po wai.

Copyright information for `MPS