a[Dan 9:27; 11:31; 12:11]
b[Dan 12:1; Ped 7:14]
c[Ais 13:10; Ese 32:7; Jol 2:10, 31; 3:15; Ped 6:12]
d[Dan 7:13; Ped 1:7]

Mark 13

Te tigidali nai silabo sogo asobo po

(Matyu 24:1-2; Luk 21:5-6)

Jisasgo te Moni Lotu Be tempel tagalama sobadi, tama aga wali pabo bidi me deligo agabolo te po wali, “Tisa, po ola mabo bidi, te e Moni Lotu Be tempelde elalubo genuai genuai masigi me te masigigo nigali wiegi wiegi yai be dabe elalubao suao,” te po wali. Tama Jisasgo agabolo te tiwai po wei ponani, “Nago te elalubo genuai be dabe suyu, obe dawe? Te nosali augwaligo te masigi me daide te gasa masigi manalubo te gogoloyu me sula tagalogobeo. Menio. Te augwali tigidali pebedama, aiyaba sąsąwaibao,” te po wai.

Tama nosali Jisas te Oliv bulu dude dualalu, tama te Moni Lotu be tempel u badu pedaide elalubo suali. Tama Pita, me Jems, me Jon, me Andru, te augwali naga agaba aselawali. Tama augwaligo agabolo hanalu wali, “Nago dabolo wao, nisu sogo te sęgę te Moni Lotu Be tempelba pedalugowe? Mena dąį bolo hasia pedalubo si, tama dago koneai elalubadi, megi da te sę dabe te pąde pedalaiba homu elalugowe?”

Tama Jisasgo po augwaliba pusa mayu, te po wai, “Dage dua dao. Tiyu te bidi me deligo dage ili po ola mayabuo. Te bidi dabe hauwa augwali aselayu, tama ena nogi ilama, tama augwaligo te po waibao, ‘Ena digi ena te bidi dao.’ Tama augwaligo te we bidi hauwa tibo po ola mawaibao. Tama me, nosali dagego te boi hwįabo kulukulu wabo po me, te boi hwįabo po sabilibo po me odobaso da, teda dage asesa polo tama noma siyu, midigi munu me elamuo. Te sę dabe pedaliyu da yaibao, tiali goli te dagalu de tǫ si silabo sogo bodolu te me elaluaibao. Te bidi hani me deligo te gasa bidi hani me dali wąbi hwįaibao. Tama me tuni bidi hani me deligo te gasa tuni bidi mego hani bidi dali te wąbi hwįaibao. Te me badu pedai badu te tǫ mali eyu, tama augwali nasi genuai elaluaibao. Te sę ebo te wego hasia wai ame nainu dene pedalubo tiwai gilama te hasia pedalaibao.”

“Duga digi te bugagia tonaluiąo. Te augwaligo dage te augwa kaunsilba po tų ela mawaibao. Tama augwaligo dage te Juda dabego bomai po odobo lotu be tomode elaibao. Te augwaligo ena nogi aiyaba elaluabo homu elama, tama augwaligo dage te gavmaniba me te tuni bidi gesabidiba dodolaibao. Tama tebode te dagego te Godigo gesi wiegi yai po te augwaliba pusa mao. 10 Te tigidali tǫde bidibo hani bidigo te Godigo gesi wiegi yai po pusubo bidigo po hasia odoyu bolo yaibao. 11 Tama augwaligo dage nogo tulama, tama dage te po tųba odasa pabo sogo, dage wi eyu te homu me elamuo, ‘Te dago te po tųde mena po wagowe?’ Menio. Tigidali po Godigo dagebolo te sogode digi menama, te dagego pusumainu yaibao. Magi baso meni, te duga digi te po me pusugobeo. Menio. Te Godigo Tedali Mobo bidi agai te po pusaibao. 12 Tama tobage sę pedalubo sogo te bidi dabego augwa ama dabe te boi bidi dabego nogoba munama, te augwali ela mumainu yaibao. Tama te aya dabego me te ogomani augwali te boi bidi nogoba muyu, te tama tiaibao. Tama te ogwa me wegi me augwaligo me te augwa aya ida dabe te boi bidi nogoba munama, tama augwali ela mumainu yaibao. 13 Tama tigidali bidi dabe augwaligo dage dali dwai homu mu yaibao. Eno nogi dagede elalubaso, tama augwaligo te tiwai kolesaga yaibao. Tiali goli te mena bidigo bomo elama dolaludubadi te dagalu de tǫ dali si siligi pabo sogoba usu nagasali bidi, te aga da, Godigo ma dobola saibao,” Jisasgo te po wai.

14 “Tama te bulu dolabo dwai dwai nai mu dagego sueibao. Aga da, te habu selai elalubo bulu te badu doligi soaibao.” (Te po nedebo bidi agai homude bugagia kone palao.) “Tama te sę ebo sogode te Judia tǫ pedai badu bidibo we bidi augwali te bulu duba wi pelawaibao. a  15 Tama te aga be daide ugwadu bidibo bidi aga te aiyaba dulama, te be tomoba doado bage sigulainu ebo te usu munu me egobeo, aga olo naga wi pao. 16 Tama te sogo aga gide bidibo bidi, aga begasa pelama, te kedaude gudubo ugwa me beba sigi pelamuo, te aga olo naga wi pao. 17 Te haliga elalubo we dabe, me te sogo wai ame mabo we dabe, te augwali hobede mu dao! 18 Tama dagego te Godibolo gedu haluasa po waiyąo, te sę dabe te moni kedau sogode pedelabuo. 19 Magi baso meni, te sogode te genuai sęgę mu elaluaibao. Te Godigo tigidali nai nigali sogo gagalasa, te megi e sogoba usu nagasu, te tiwai sęgę te polobadu me pedalisiąwai. Tama nosali me te tiwai sęgę meni yaibao. b  20 Tama Genuai Bidigo te sogo bodolu te hagana selama, pęwadage iligi menigi da, teda te tigidali we bidi hagagi dao. Tiali goli agai te sa muyu dąį ilali we bidi augwalide homu kone palama elaluali. Tama tibaso agai te bodolu sogo pęwadage sogo ilama elalubo dao.”

21 “Te sogode, te bidi me deligo dagebolo weyu, ‘Suao, te Krais ede bidibao,’ ma ‘Suao, aga ude bidibao,’ te po obaso da, dagego te pode homu dąų me olamuo. 22 Magi baso meni, te bidi meba te sogo aselama, tama tibo po weyu, te tiwai po waibao, ‘Ena Krais da,’ ma ‘Ena te Godigo po pusubo profet bidi me deli dao,’ tama augwaligo te bidigo susiąwai bomai sę eyu, tama gasagi gasagi yai sę dabe yaibao. Mu tama, te augwali usu yali homu ebogo da, teda augwaligo te Godigo augwali sa muyu dąį ilali we bidi tibo po ola menama, tama augwali tulalumainu yaibao. 23 Tama tiyu dage dua dao. Te sę me pedalisiąbadi eno te tigidali sę yabo po te dagebolo wai dao,” Jisasgo te po wai.

Nosali te Godigo Bidi Mu asaibao

(Matyu 24:29-31; Luk 21:25-28)

24 Jisasgo po me weyu, te po wai, “Tiali goli te genuai sęgę hasia bolo ela silama, tama te sogode te giliga ge hulia selama, tama te polua me ula isiąma, c  25 tama te dagaludu hǫ dabe tudulaluaibao. Te dagalude elalubo bomai nai tigidali te mumunu yaibao. 26 Tama te tebo sogode teda augwaligo te Godigo Bidi Mu te dagalu tomodu te pǫ me deli daide ugwadu dualasa asobo sueibao, te aga genuai bomo me genuai wiegi yai ula elalubadi te asaibao. d  27 Tama te sogo te aga ensel mobo bidi dabe augwali tagala palama, tama augwaligo te aga sainu sa muani we bidi augwali sisinigiluaibao. Te agai te tigidali tǫ pedai badu sesa biligiluama, te dagalu de tǫ dali si ununani te sesege tigidali habuba mu usu nama augwali sisinaibao,” Jisasgo te po wai.

28 Tama agai po me weyu, te po wai, “Dagego te ni kayade kolesaga konea sao. Te ni aga nologo ąį elalu, tama te gesi yabe hogonu pedalubo sogo, dagego koneani, te poi pibo sogo wiegi yai giliga nanobo sogo pedelainu ebo, te homu ebo dao. 29 Te tiwai gilama naga, nosali dagego te suali te sę pedalubaso, teda dagego koneaibao, te ena ma asobo sogo te pąba yagaselama, tama te sunumide elalubao. 30 Eno mu po dagebolo obe dao: te megi e sogode bidalubo we bidi dabe augwali me isisąbadi, tama te sę tigidali pedalubo sueibao. 31 Te dagalu de tǫ dali si da, te mu sia saibao, tiali goli eno po da, te munu me hagayu, te sia siyu me egobeo. Te me elalua paibao,” agai te po wai.

Te bidi me deligo Krais asabo sogode te bodolu me konebeo

(Matyu 24:36-44)

32 Te Jisasgo po ma weyu, te po wai, “Tiali goli te bidi me deligo te asabo sogode te bodolu me konegobeo. Te dagalude ensel mobo bidi dabe augwaligo me te me konebeo. Te Godigo Ogwago me agai me konebeo. God Ayago naga agai te asabo sogo bodolu koneai elalubao. 33 Dage dua dao. Dagego tonalu bidiąo. Te nisu sogo pedalabo te dagego me konebe dao. 34 E tiwai elaluaibao. Te bidi me deligo te aga be tagalama, te gasaba pelama biligi pali. Hasia bolo agai te sę ebo bidi dabebolo te agai doado bage tolaluabo po wali, tama agai te sę bidi deli deli augwalibolo te sę dobayali. Tama agai te be sunumi tonaluabo bidibolo te po wali, agai te sunumi bugagia tonaluao po wai. 35 Tama te dagego me te tiwai gilama bugagia tonaluiąo. Te be page bidi aga nisu sogo asabo te dagego konebe. Te aga pio asogowe, ma huli tomode asabo me, ma te be posainuba po obadi me, ma te kigamu asabo me, te dagego konebe dao. 36 Tiyu aga te deli sogo naga mu polo tama asiyu, te dage pila mubadi aga asidali weyu, tama dage tonaluyu bidiąo. 37 Eno dagebolo te mabo po, te po eno tigidali we bidibolo obao, dage tigidaligo te bugagia tonaluao!” Jisasgo aga wali pabo bidi me si me si augwalibolo te po wai.

Copyright information for `MPS