a[Ais 6:9-10]
b[Jol 3:13]

Mark 4

Bidigo te giba nai wai tedela palali po

(Matyu 13:1-9; Luk 8:4-8)

Te nosali me sogo Jisasgo te we bidi augwali te Galili sigi wę sane pąde po ola mabo sę ebo ma gagalali. Tama genuai we bidi hani mu te augwali agaba sisinagasali. Tama aga te geba me deliba holama, tama tede dulaluai. Tama geba te sigi we tomode elaluali. Tama tigidali we bidi augwali te we sane pąde duada pelama bidaluai. Tama agai ola mani po hauwa te po habu sugunama, te begelebo pogo naga augwali dali wali. Agai e tama tiwai po augwaliba mawai. “Dagego odiąo! Te bidi me deli pelama, te giba nai wai tedelalo biligi pai. Agai tedelalo palio, tama te nai wai ge meba te sunumide tudulaluali. Tama ba dabe asiyu, te nai wai ge tuali. Tama meba nai wai te masigi elalubo badu tudulaluali, tama te tǫ hauwa meni yai madi. Te tǫ aiyanu igilusiąwai madi weyu, tama te nai wai polo holai. Tiali goli giliga ugwadu naniyu, tama te giligago ulali. Tama te wit nai aga sele meniama, tama tigidali wa pelama, tama sasia pelama isali. Tama meba nai wai te sesani bono elalubo tomoba tudulaluai. Tama te sesani bono me holama te mesegelali, tama agai nai me walobeo. Tiali goli te nai wai meba te wiegi yai tǫ ili yai madiba tudulaluama, tama genuai holama, tama nai du walai. Mebago ge dwasianu te 30 walali, mebago te 60 walali, tama mebago geninama mu tama te 100 walalio.” Tama agai te po me augwalibolo wali, “Te olo elalubo bidi agai te po odiąo,” te po wai.

Jisasgo po digi po begelebo sę page po

(Matyu 13:10-17; Luk 8:9-10)

10 Te nosali te we bidi hauwa aga dali menibadi, Jisas agaduba naga bididuali, tama aga wali pabo bidi nogo si olama sągągo si badi, te meba Jisas aga dali bidalubo bidi dabe dali, augwaligo agabolo te begelama wali po pagede hanalu wali. 11 Tama agai te po augwalibolo wai, “Godigo dagebolo te agai te we bidi dabe tonalubo sę page geme dualaluali po page te dagebolo ola mawai dao. Tiali goli te Godigo po odisąma bulu badu bidibo bidi dabe augwaligo da, te eno pusubo po te po digi po begelama, tama wabogo naga te po odobo dao. Te po page augwaligo odobo menio. 12 Te Godigo po bukude te gasa we bidide polobadu asęani po, te po page te megi bidalubo we bidide elalubao, te e tiwai dao:

‘Te augwaligo tonono bilibadi, tiali goli te augwaligo
te subo nai page hania konegobeo. Te augwaligo
po odobadi, tiali goli te po page augwaligo me
konesiąwani. Tama augwaligo konegi sogo da, teda
augwaligo homu begeleyu, tama Godigo augwaligo
dwai sę yali sęgę sela sągi da,’ a 
te po polobadu asęani,” Jisasgo te po wai.

Te nai waide po page begelama wali po

(Matyu 13:18-23; Luk 8:11-15)

13 Tama Jisasgo augwalibolo te po hanalu wai, “Dagego te eno po digi po begelama wali po page me konebe dawe? Tama tiyu da, teda dagego mena tama te begelama wabo po page tigidali koneaibawe? 14 Te bidigo nai wai bulai po wali agai te Godigo po haniani we bidibolo pusuyu te bulali tiwai dao. 15 Te sunumide tudulaluali po wali te Godigo po odali we bidi hani dabe, tama te sogo naga Satan asama, te Godigo augwali homude bulali po dagala sąwai. 16 Tama meba we bidi augwali te masigi elaluali tǫba tudulaluali nai wai tiwai yai. Augwaligo Godigo po odama, tama polo augwali kolesaga sali, tama augwali tede wiegi yai homu pemene yali. 17 Tiali goli augwaligo sele te dąų me olalubeo. Augwali te dwasianu sogo naga elaluali. Te nosali Godigo po aiyaba elaluainogo ebo bidi mebago te we bidi augwaliba sęgę dali dene dali mobaso da, teda augwaligo te po wali pabo kolesaga tagalaibao. 18 Tama meba we bidi augwali te sesani yai bono elalubo tomoba tudulaluali nai wai tiwai yai. Te hani augwaligo te Godigo po odali, 19 tiali goli augwaligo homu hauwa te tǫde naide elama, tama augwaligo te mone hauwa sisinabo homu elama, tama haniani doado bagede godola pelama pesa yali. Te doado bage dabede homu ebogo te Godigo po mesegelama, tama tebo we bidi hani augwali te nai du me walisiąwai. 20 Tiali goli meba we bidi augwali te wiegi yai tǫba tudulaluali nai wai tiwai gilama yai. Te augwaligo Godigo po odama, tama augwaligo selama tama tolaluali, tama augwaligo nai du walali. Mebago te ge dwasianu walu, te mebago hauwa walu, te mebago geninama mu tama waliyu yalio,” Jisasgo te po wai.

Te ulade po digi po begelali po

(Luk 8:16-18)

21 Tama agai te po me augwalibolo wai, “Te bidigo lam sole domonama bogoli ebadi tama sela asama, te baket dologoba ma te pibo sai bet dologoba te mubo dawe? Menio. Agai te tebol sai daiba mubo dao. 22 Te tigidali geme dualaluali nai nosali te hania haninama pedalaibao. Tama bidigo te mesegaluali tigidali nai, nosali te ulaba hanilama pedalaibao. 23 Te olo elalubo bidi agai eno te po odiąo!”

24 Tama agai te po me augwalibolo wai, “Te dagego odali po, tede dagego bugagia kone palao! Te dagego bidi dabebolo te mabo nai usu nama, te usu si naga dageba wei ponaibao. Tama agai meba ma wadolama te dageba mawaibao. 25 Te bidi me deligo nai tolalubo bidi, te Godigo agabolo geninama ma mawaibao. Tiali goli, te bidi me deligo dwasianu nai naga me elalubo bidi da, teda agai te elalubo nai, te hagawaibao,” Jisasgo te po augwalibolo wai.

Te nai wai holobo po begelama wali

26 Tama agai te po me wai, “Te Godigo we bidi tonalubo sę tomoba pabo tų te e tiwai dao, te bidi me deligo te nai wai tǫba tedelalo pabo tiwai dao. 27 Tama tigidali sogo be hulibo usu nama te bidi godege piduali, tama be posobode aga hogodama bilidu yai. Tama te tedelalo pali nai wai holama, tama mena tama genuai ebo me, te bidi agai me konebeo. 28 Te tǫ aga digi sę ebaso tama te nai wai holama, tama nosali te nai wai du walaibao. Hasia bolo te nai honu pedalama, tama nosali te nai tobolu tomode te nai genuai pedalaibao. 29 Tama nosali te nai genuai elama te nai inabo si da, teda te bidigo te hwą ge dali sę yaibao. Te nai sabo sogo bodolu te pedalali dao,” Jisasgo te po wai. b 

Te mastet nai waide po begelama wali po

(Matyu 13:31-32; Luk 13:18-19)

30 Tama Jisasgo te po wali, “Dago te Godigo we bidi tonalubo sę te mena tama usu saibawe? Tama dago tede mena usu sabo po begelama waibawe? 31 Te tiwai nai wai me deli te nogi dago te mastet wabo. Te nai mastet wai ge da te e tǫde gasa tigidali elalubo nai wai ge tiwai me elalubeo. Menio. Te dwasianunu mu tama. Bidigo te nai wai ge te tǫba bulaibao. 32 Bidigo te mastet nai wai ge bulama, tama holama tama genuai igulama, tama te kaya te tobage tigidali ni aiyaba elaluaibao. Te aga nologo genuai igulama, tama te ni nologode te ba dabe te tįwąi madi dologoba duayagasu yaibao,” Jisasgo te po wai.

33 Jisasgo te we bidi augwalibolo te po digi po hauwa begelama, te tama tiwai agai po pusali, te augwaligo homu kolesagaba muabo usu po naga wai dao. 34 Agai te po te we bidi augwalibolo hanilama me pusubeo. Menio. Agai te po begelama naga pusali. Tama aga te wali pabo bidi dabe naga aga dali bidibadi, agai te po page tigidali hanilama augwali dali pusuyu yai dao.

Jisasgo po obaso, tama genuai wali sia sali

(Matyu 8:23-27; Luk 8:22-25)

35 Tama te silama te sogo digi te be pio ebode, agai te aga wali pabo bidi dabebolo weyu, te po wai, “Da te sigi ąį u badu pedai badu pinao,” po wai. 36 Tama augwaligo te genuai we bidi hani bidaludubadi taga peyu, te augwali Jisas dugulaluali gebaba holama, tama augwaligo aga dali selama pali. Tama gasa bidi dabe augwali meba gasa geba dabe me tedu augwali dali pai. 37 Tama augwali te sigi ąį tomodu pobadi, te moni genuai wali me deli hogodama, tama wę dini te geba tomoba asali, tama te geba te węba hoa sigulama, te węgo geba pągąna sainogo yai. 38 Tama Jisas te geba dugi badu bidali, tama aga tobolu te geba dugiba munama, godege pila muani. Augwaligo aga hodoligi pelama, tama augwaligo te po wai, “Tisa po ola mabo bidio, te pąde da węba hoa selama hagainogo ebao, tama nago homugo te kone palobewe?” 39 Tama Jisas hodasa holama, tama te waliba wado po obadi, tama wębolo po weyu te po wali, “Megi da, usu dao. Nage sia sao! Nage megi tama silama isao!” Tama wali kekasa peyu, tama te wę me dwasianu memenege munu me ebeo. 40 Tama agai aga wali pabo bidi dabebolo te po wai, “Magi baso dage te tiwai wi ebawe? Te dagego enade te konealubo po dąų weyu enaba duga homu me tialubo meniwe?” te po wai. 41 Tiali goli augwali wi dwai mu elama, tama augwa hasi tomode po mia siyu, te po wali, “Te bidi aga niwai bidi, tama te wali de wę dali sigo agai po odaliwe?” te po wai.

Copyright information for `MPS