a[Tpi 13:51]
b[Gag 19:24-26; Mt 11:24]

Matthew 10

Jisasgo wali pabo bidi nogo si olama sągągo si te agai sęba tagala palali po

(Mak 3:13-19; Luk 6:12-16)

Te Jisasgo aga wali pabo bidi dabe nogo si olama sągą badu si bidi asa olama i wali, tama agai augwalibolo bomo mani, te dwai haubo mobo bidi dabe sela sąmainogo, tama te we bidi tigidali te haniani gasi me, te tigi bomo meni yai gasi me usu ilimainogo yai dao. Te 12 bidi nogi te e dao: hasia bidi aga nogi Saimon, te aga gasa nogi Pita, tama me aga ama nogi Andru dali. Tama Jems me aga ama Jon dali, augwali si te Sebedigo ogwa si dao. Tama Filip me Bartolomyu dali. Me Tomas, me Matyu, te takis mone polobadu sai bidi. Me Jems, te Alfiusgo ogwa, me Tadius dao. Tama gasa Saimon te Selot hani bidi, augwaligo te Rom gavman bidi dabe sela sąbo homu yai bage dao. Tama Judas te Keriot bulu bidi, te Jisas boi bidi augwali nogoba nosali muani bidi dao.

Jisasgo te 12 bidibolo te po sela pabo sę mani po

(Mak 6:7-13; Luk 9:1-6)

Te Jisasgo te 12 bidi sęba tagala palali, tama agai po augwalibolo ola mayu, te po wai, “Dage te Israel hani isiąwai bidi dabeba me pelamuo. Tama dage te Samaria dabego genuai hanu tomoba me pigimio. Menio. Dage te Israel hani we bidiba naga pao, te augwali te hagawai kibu sipsip tiwai dao. Dage pelama, te dagego e tiwai po wao, ‘Te dagalude bidibo God agai we bidi tonalubo sę yabo sogo pąba yagasai dao, megi e dao,’ te po waiyąo. Dagego te gasi we bidi dabe augwali usu iligi pao, tama isai bidi dabe ma hodoliyu, tama oiyabe gasi sai bidi dabe wiegi yai meda isiąwai ma iliyu, tama dwai haubo mobo sela sąyu yao. Tama dage te sę yabo bomo te dagego olo sali, tama monego abelai menio. Tama tibaso, dagego te we bidi te bomogo olo tau sao, tama dagego augwalide mone sigio. Tama dagego te nai abelabo nai gol me, te mone ge silva me, te kapa mone me te dagego mouwadagede sabiligio. 10 Tama dage bilibo sogo dagego te wa sabiligio, ma te holobo ugwa si me te sągą nadoba olo si me, te bilibo dono olo si me tolasa biligio. Menio. Te dagego tau sabo we bidi augwaligo dagebolo te tobage tigi tau sabo nai momainao.” wali.

11 “Tama dage si si te hanu me deliba ma te dwasianu bulu tomoba me pobaso da, teda dagego bugagia sulama koneyu, mena bidi aga te bulude wiegi yai ma te doloba pai bidibo weyu suao. Tama te tiwai bidigo bede dage bidao, tama tede bididubadi te dage te gasa buluba pabo sogode te usu yaibao. 12 Tama dage te be tomoba pobadi, dagego te bede bidibo we bidi augwalibolo dwagi yai homu eyu te po wao, ‘Te dago homugo te wiegi yai sogo mu dageba asomainao.’ 13 Tama dagego te po olama, tama te bede bidibo we bidigo dage dali wiegi yai homu eyu usu da po obaso da, teda dagego wiegi yai po augwali dali bidimainao. Ma, augwaligo dagebolo wiegi yai homu me isąbaso da, teda te wiegi yai pogo augwali tau sisiąma te po dagebolo ma asaibao. 14 Tama bidi me deligo beba dage me sela pisąma, tama dagego po me odisąbaso da, teda te be dali te hanu si tagalama, tama dagego duga sągąde pu elalubo pobele bage sela sąyąo, te augwaligo konemainogo te Godigo me augwali tagalai.yabo te homu emainogo yao. a  15 Eno mu po dagebolo obao, te tigidali we bidi po tų ebo bodolu muani sogo, te dagego po odobo hagela yai we bidi augwaligo sabo sęgę te genuai mu saibao, te sęgęgo te hanu si Sodom me Gomora side polobadu bidali dwai dwai kolesaga yali we bidigo sabo sęgę aiyaba elaluaibao,” Jisasgo te po wai. b 

Haniani sęgę pedalabo po

(Mak 13:9-13; Luk 21:12-17)

16 “Odao, eno dage te sipsip tiwai te uni yowi augwali tomoba tagala palobao. Tama tibaso dagego te hasamanigo ebo kolesaga tiwai wali peyu, tama hasia bolo dagego yabo sę bolo homugo kone palao. Tama dagego te ba higo ebo nagamea pai kolesaga tiwai wali peyu, tama dwai sę me deli yabo homu kolesaga egimio. 17 Tama dage te dwai kolesaga ebo bidi dabede dua dao. Te augwaligo dage augwa kaunsil bidi dabede po tų ilainogo sela peyu, tama augwaligo dage te bomo yai po ola mabo be tomode te keloago elaibao. 18 Te dagego ena wali pobaso, dage augwaligo te gavman bidi dabebolo me te genuai tuni bidiba me selasa paibao, te po tų tede ilimainogo yaibao. Tama dagego augwali dali me, te Israel hani isąwai bidi dabe dali augwalibolo eno gesi wiegi yai po pusao. 19 Tama augwaligo dage po tųba odasa pabode, tama dage wi elama te homu egimio, ‘Dago po mena tama wagowe? Tama dago magi po wei ponogowe?’ te homu egimio. Menio. Te sogo naga digi te Godigo dagego pusabo po ola mawaibao. 20 Te duga digi naga te po pusugobeo. Menio. Te duga Ayago Mobo Bidigo, agai te po dagego pedauwalide ola mobaso, dagego te po waibao.” wali.

21 “Tama bidi mego aga ama te boi bidigo nogoba munama, tama augwaligo aga ela muaibao. Tama ayago aga ogwa dali tama naga tiaibao. Tama ogwa wegi dabe augwaligo augwa aya ida si dali boi bidi homu elama, tama augwali ela mumainogo te gasa bidi dabego nogoba muaibao. 22 Tama tigidali we bidigo dwai homu mu dage dali yaibao. Magi basowe, dage eno hani bidi mu bidibaso tiaibao. Tiali goli, te bodolu muani sogo tonaluyu bomonama bidibo bidi, teda te bidi aga te Godigo ma dobola siyu, tama te dwagi yai madiba muaibao. 23 Tama augwaligo dage te hanu me delide dene mobaso da, teda dage wi peyu, gasa hanuba pao. Eno mu po dagebolo obao, te tigidali Israel hanude te dagego sę ebo silisąbadi yaide, tama te Godigo Bidi Mu aga ma asaibao.” wali.

24 “Augwaligo ena dali yali dwai kolesaga, te kolesaga naga augwaligo dage dali me yaibao. Te skul ogomani agai aga po ola mabo tisa bidi te aiyaba me elalugobeo, tama te sę ebo bidi te aga ugwadu elaluyu te sę tonalubo bidi aga aiyaba elalugobeo. 25 Tama te skul ogomanigo te aga tisago ebo kolesaga tiwai ebo usu ebaso da, te usu dao. Tama te sę ebo bidigo aga tonalubo bidigo kolesaga tiwai ebo usu ebo si da, teda te me usu dao. Te augwaligo te nogi posobo po weyu, ‘Nage te dwai haubo bidigo tobolu bidi Belsebul dao’ po te hani tobolu bidibolo obaso da, teda dago koneao, te augwaligo dwai dwai nogi weyu posobo po wabo te aga dali bede bidibo bagebolo mu waibao,” Jisasgo te po wai.

Bidigo Godide naga wi yao po

(Luk 12:2-7)

26 “Te bidi dabe augwaligo dage dali te tobage sę nosali yaibao, te dagego konebaso, tama dagego te dwai sę ebo bidi dabe augwalide wi egimio. Te tigidali geme halualuali nai te bulu ulaba hania pedelaibao. Tama tigidali te geme dualaluali po te we bidigo hania koneaibao. 27 Tama te hulide eno dagebolo ola mabo po, te po dagego te giligade we bidibolo pusao. Tama dagego te olode duadigi odali po, te dagego te be daiba holama, te po augwalibolo pusao. 28 Dagego tigi naga ela mubo bidi dabe te dage wi egio. Augwaligo dagego po wabo mobo noma bidi te dali me ela mugobeo. Menio. Te Godigo dagego tigi me noma bidi dali te genuai dene sabo te siade mu dolobo bomo elalubaso, te dage agade naga wi yao. 29 Te we bidi augwaligo dwasianu bu ba tiwai si te mone ge deligo naga abelebo dao. Te ba dabe augwali dwasianunu olo nai dao. Tiali goli duga Aya God agai te tiwai ba bugagia tonalubo dao. Tama tonalubadi, te tiwai dwasianu ba me deli olo isigobeo, te Godigo bodolu mani isabo sogo naga te isaibao. 30 Tama dage da, te Godigo dage bugagia tonaluyu, te dagego tobolude elalubo tobolu nisi tigidali deli deli agai neda silai dao. 31 Tama tibaso, dage wi me egio. Agai gedude te dage te bu ba dabe aiyaba mu elalualigo da, teda agai dage mu tau saibao,” Jisasgo te po wai.

Jisasgo nogi hogwa sabo kolesaga ebo po

(Luk 12:8-9)

32 “Niwai bidigo eno nogi te we bidi augwali gedude pusuyu, ‘Te ena Jisas wali pabo bidi dao’ wabo bidi, te eno te bidi agai nogi me te eno Aya dagalude bidibo bidi gedude pusaibao. 33 Tiali goli mena bidi agai te we bidi augwali gedude ena nogi tudiba mubo bidi, te eno me eno Aya dagalude bidibo bidi gedude aga nogi tudiba muaibao.” Jisasgo te po wai.

Jisas aselama, we bidi dagalagasali po

(Luk 12:51-53; 14:26-27)

34 “Dagego homugo ena asali te e tǫde wąbi hwįbo tigidali isilainogo asali homu dagego egio. Ena asali eno te hwįbo isilainu asobeo. Menio. Eno te bobobage ge hwą selasa asai tiwai dao, te we bidi dagalaibao. 35 Te deli hani augwa hasi boi bidi ebo kolesaga pedelainogo te ena asali. Tama bidigo aga aya dali boi bidi eyu, tama wegigo me aga ida dali boi bidi yaibao, tama we aga bidigo ida dali me boi bidi yaibao. 36 Tama bidi me deli aga bede bidibo we bidi dabe, te aga hani we bidi, augwali te bidi dali boi bidi eyu bidaibao. 37 Tama niwai bidi agai aga aya me ida naga mu godolo eyu tama ena kuna godolo me isąwani da, te bidi aga eno abagi bidigobeo, te usu menio. Tama bidi mego aga ogwa ma wegi naga godolo eyu, tama ena kuna godolo me isąbo bidi, te aga eno abagi bidigobe dao. 38 Tama bidi aga ena wali peyu, tama gasa bidi dabe augwaligo agabolo dene me sęgę dali mayu, tama te aga isilabo ni pedai tiwai dao. Tama agai te ni pedai selama, ena wali asisąwani da, teda te bidi aga eno abagi bidigobeo. 39 Tama niwai bidi aga tigi me aga tǫde bidibo ula dali naga bugagia tonaluyu bidibo bidi, te bidi aga nosali wiegi yai mu bidabo ula hagawai bidi pedelaibao. Me ma, bidi aga tigi me aga tǫde bidibo ula dali agai eno sęba munama tama aga isiyu da, teda te bidi te nosali wiegi yai bidabo ula mu saibao, te bidada paibao,” Jisasgo te po wai.

Bidigo wiegi yai nai sabo po

(Mak 9:41)

40 “Bidigo dagego eno sę ebo sulama, tama wiegi yai kolesaga dagebolo ebaso da, teda agai te tiwai kolesaga dagebolo naga ebo meni, te ena dali me ebao. Tama bidigo wiegi yai kolesaga ena dali ebo bidi, agai te God dali me te wiegi yai kolesaga ebao, te agai ena tagala palobaso ena asai dao. 41 Bidi mego te homu eyu, ‘Eno te Godigo po pusubo bidi profet bidi tau sabo’ homu elama, tama te profet bidi sela pelama, aga bede te bidi bugagia nai gesebo dao, te bidi agai te profetgo nosali sabo wiegi yai nai me badu agai buga selama saibao. Tama bidigo homugo ‘Te bidi doloba pai bidi bidibaso, eno aga tau saibao’ homu eyu, tama te doloba pai bidi aga beba sela pelama, nai mayu bugagia gesebaso da, teda te Godigo te doloba pai bidibolo nosali maiabo nai me badu te bidi agai buga selama saibao. 42 Tama bidigo te ena wali pabo olo nogi meni yai bidi me deli ąį nogone ebo sulama, tama aga tau siyu. tama te kedau wai wę naga mabo bidi da, teda eno mu po dagebolo obao, Godigo te bidibolo te wiegi yai nai mu mawaibao, te nai te munu me hagagobeo,” wali.

Copyright information for `MPS