a[Ais 35:5-6; 61:1]
b[Mal 3:1]
c[Ais 23:1-18; Ese 26:1-28:26; Jol 3:4-8; Amo 1:9-10; Sek 9:2-4]
d[Gag 19:24-28; Ais 14:13-15]

Matthew 11

Jongo aga wali pabo bidi Jisas bidibo digi tagala palali po

(Luk 7:18-35)

Te bidi Jisas aga wali pabo bidi nogo si olama sągą badu si bidi dabebolo te sę ebo po mawai. Te po silibode teda agai te bulu tagalama, te tǫ badu elalubo genuai hanu dabeba pelama, tama te we bidi augwalibolo agai po ola mayu, tama Godigo po pusai dao.

Tama Jon te we bidi baptais mani bidi, te bidi aga te kalabuside bidibadi tama te sa muyu asaiba wali bidi Kraisgo te tigidali sę ebo po odai. Tama tibaso, Jongo aga wali pabo bidi dabe meba te Jisas bidiboba tagala palai dao. Tama augwaligo agabolo te po hanalu wagasai, “Nage da, nage te sa muyu asaibao wali te bidi dawe, ma dago gasa bidi asobo tonaluaibawe?” augwaligo te po hanalu wali.

Te po obaso, Jisasgo augwalibolo te wei ponoyu, te po wai, “Dage pelama, Jonbolo te tigidali sę dagego odali po me, te suali sę me, te po tigidali agabolo wagi pao. Dagego e subao, te gedu widai bidi dabe augwali gedu usu ma iliyu, te sągą dwai bidi dabe augwali bugagia ma bilibo dao. Te oiyabe yai bidi dabe augwali tigi wiegi yai pedaliyu, tama olo degai bidigo po ma odobo dao. Te isai bidi dabe augwali ma hodoliyu, tama te magi nai meni yai bidi dabe augwaligo te Godigo wiegi yai gesi po odobo dao. a  Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai.

Tama Jon wali pabo bidi dabe augwaligo te po odama, tama geasa ma pobadi yaide, tama Jisasgo te we bidi augwalibolo te bidi Jonde po wai, “Polobadu dage te bidi meni yai buluba pali, te bidi Jon dagego sugi pali, te dagego magi nai sugi paliwe? Ma, dagego te awi dili me deli te waligo memenege ilibaso sugi paliwe? Menio. Dagego magi nai sugi pai dawe? Ma, dagego te bidi me deligo te wiegi wiegi yai ugwa tigide muai yaibaso sugi paliwe? Menio. Te wiegi wiegi yai ugwa muai bidi dabe augwaligo te tuni bidigo wiegi yai bede naga bidibo dao. Tiali goli, dage magi baso pai dawe? Ma, te Godigo po pusubo profet bidi me deli sugi pai dawe? Awe, eno dagebolo obao, e Godigo po pusubo profet bidigo da, agai te gasa te Godigo po pusali profet bidi dabe te tigidali aiyaba elalualio. 10 Te Jon agade te gasa profet bidigo Godigo wali po polobadu asęai dao,

‘Suao, te eno po pusabo bidi tagala palobaso, tama
aga nage asabo digi polasa paibao. Agai nago tų sisi
iligi paibao.’ b 
11 Eno mu po dagebolo obao, Jon te we bidi baptais mani bidi agai te tǫde pedelali tigidali bidi aiyaba elaluai dao. Tiali goli te Godigo we bidi tonalubo madide bidibo nogi meni yai olo bidi, te bidigo Jon aiyaba elalubao. 12 Tama te baptais mani bidi Jon agai aga sę ebo gagalali sogo dąį elama, tama aga sę edubadi megi asama, te Godigo we bidi tonalubo sę te bomonama tama pąba yagasai dao, tama te sesena pai bomai bidi dabe augwali tola sainogo ebo dao. 13 Tama te Jon aga pedalisiąbadi te Godigo po pusali bidi profet bidi dabe me, te bomo yai po me, te augwali tigidaligo te nosali yabo sę po pusai dao. Tama nosali Jon agai po pusagasali. 14 Tama dagego odai wida, teda te po odao: te polobadu bidali profet bidi dabe augwaligo te genuai profet bidi Elaija ma asaibao po wai dao. Tama Jon da, Jon aga te bidi Elaija dao po wali. 15 Tama te olo elalubo bidigo agai te po odao,” wali.

16 “Te eno te megi bidibo we bidi augwali magi nai tiwai dao wagowe? Augwali te wai puluba tiwai dabe te maket bulu tomode bidaluyu, tama gagali eyu, tama augwaligo te gasa wai puluba dabebolo i bomonama weyu, te po obao, 17 ‘Dago dage ona sulubadi, tiali goli dagego tęąbi ebo hagela ebao. Dago homu dene ebo tęąbi obadi, tiali goli dagego gela wabo hagela ebo dao.’ 18 Tama tiwai, te Jon asali, tama agai te nai osogo gisiliyu, te bomai wain wę me tuai menio. Tama tibaso augwaligo agade te po wai, ‘Te dwai haubo mobo bidi agade bidibao,’ te po wai dao. 19 Me ma, te Godigo Bidi Mu asali, tama agai nai dali ąį dali tuyu yai, tama augwaligo agade te po wai, ‘Suao, aga te nai hauwa mu tubo bidi, tama agai te bomai wain wę me hauwa mu tubo dao. Aga te takis mone sabo dwai bidi dabe dali te sęgę sai bidi dabego kisasa bidibo abagi dao,’ te po wai dao. Tiali goli te God aga mu konebo homu kolesaga ebo po te we bidigo odama, tama te kolesagago yali sę nosali subaso da, teda augwaligo koneaibao, te homu kolesaga mu dao,” Jisasgo te po wai.

Te bulu meba bage augwali homu begelebeo

(Luk 10:13-15)

20 Te Galili tǫde Jisasgo te hanu mebade te bomai sę hauwa mu yali goli, te hanude bidibo hani augwaligo augwa dwai kolesaga yalide ge neyu, homu begelama dwai kolesaga yali tagalasiąbaso, te Jisasgo augwali sesanobo po weyu te po wali, 21 “Auo, dage Korasin dabe, homu deneo, te dwai dwai sogo dageba pedelaibao. Dage Betsaida hani bage me, homu deneo, te dwai dwai sogo dageba pedelaibao. Tama bidi me deligo bomai sę te hanu si nogi Tair dali Saidon te hanu side te eno dagego e bulude yali sę tiwai egi sogo da, teda te sogo digi polobadu te Tair hanude me Saidon hanu side augwaligo te beg dage te ugwa tiwai gudama, tama augwali te sia nogani kelide dualama, tama te sogo te hani sigo dwai sę yali tagalama, homu begelegi dao. c  22 Tiali goli, eno dagebolo obao, te we bidi po tų yabo sogo bodolude, te Godigo dagebolo sęgę genuai mu mawaibao. Te dagego sabo sęgęgo te Tair me Saidon hanu sigo sabo sęgę aiyaba mu elaluaibao. 23 Tama dage Kaperneam hanude bidibo bage, te dagego homu te dagego nogi ugwaba siyu, te sigiba mu, te dagaluba paio, te homu yali. Tiali goli, mu menio. Te dage tigi dene ebo dwai sia dabo dedage pageba sąwaibao. Tama bidi me deli agai bomai sę dabe te eno dagego hanude yali bomai sę dabe tiwai te bomai sę te Sodom hanude egi sogo da, teda megi me te Sodom hanu elalugi dao. d  24 Tiali goli eno dagebolo obao, te we bidi po tų ilabo sogo te Godigo dagebolo sęgę genuai mu mawaibao. Te dagego sabo sęgęgo te Sodom we bidigo sabo sęgę aiyaba mu elaluaibao,” Jisasgo te po wai.

Dage enaba aselama toma tuabo po

(Luk 10:21-22)

25 Tama te sogo Jisasgo Godibolo te po wai, “Ayao, nage te dagalu dali tǫ dali nigila tonalubo Genuai Bidi dao. Eno nage dali deli homu eyu, nagebolo usu da po obao. Tǫde homu kolesaga koneai bidi dabe augwaligo koneidali weyu tama nago te eno tamadi pusali po page nago geme dualai dao. Tiali goli te tǫde elalubo homu kolesaga konesiąwai we bidi augwalibolo nago te po page ola mawai dao. 26 Awe, Aya, nago te tiwai yaibao homu elama, tama tede dwagi yai homu eyu, nago tama tiwai naga yai dao.” Jisasgo te po aga Ayabolo wali.

27 Te we bidibolo Jisasgo te po wai, “Eno Aya agai tigidali nai eno nogoba muai dao. Tama niwai bidi me deli agai te Ogwa mu konea silai menio. Aya agaduba deligo naga te Ogwa konea silai dao. Tama niwai bidi me deligo agai te Aya me konea silai menio. Ogwago naga konea silai dao, tama te we bidi dabebolo te Ogwa aga digi te Aya augwalibolo ola mobaso da, te augwaligo me te Aya konea silaibao,” wali.

28 “Dage we bidi dabe sę dene genuai eyu sęgę yai nai tolobo tiwai we bidi dabe, dage tigidali enaba asao, te eno dage tau siyu, tama dagego toma tueibao. 29 Dage ena dali hodobo wali asiąo. Tama dage ena dali bididubadi eno dagebolo po ola mawaibao. Tama dagego kolesaga enade sao. Magi basowe, eno nagamea pai kolesaga te bidi dabe augwali dali eyu, tama ena digi ena aiyaba elalubo dao. Tama dage enaba asobaso da, teda dagego homude te toma tuagameo. 30 Dage ena wali asiyu, tama eno dagebolo dene magobeo, te sęgę yai nai me eno dagebolo magobeo,” Jisasgo augwalibolo te po wai.

Copyright information for `MPS