a[Sai 20:12; 21:17; Prs 20:9; Bom 5:16]
b[Ais 29:13]

Matthew 15

Te Godigo bomai pogo te wąį nǫų dabego po aiyaba elalumainao po wali

(Mak 7:1-13)

Te Farisi hani bidi meba me, te Juda dabego bomai po page koneani bidi hani bage me, augwaligo te moni hanu Jerusalem tagalama, Jisas agaba aselama, augwaligo te po hanalu wagasai dao, “Magi baso nage wali pabo bidi dabe augwaligo te wąį nǫų dabego dabolo mani kolesaga te augwaligo bolobawe? Te augwaligo nai tuainogo ebo sogo, augwaligo te augwa nogo ąį me telabo menio, te dena wąį dabego nogo ąį telabo gasagi yai sę ebo augwaligo wali pabo menio.” Te bagego te po hanalu wali.

Jisasgo po wei ponoyu, augwalibolo bomonama te po wai, “Te dage, dage magi baso duga digi duga kolesaga wali peyu, tama dagego te Godigo bomo yai po bolobo dawe? Te Godigo te po wai, ‘Nago naga aya de ida sigo nogi ugwaba siyu, augwali sigo po wali pao’ wali, tama me ‘Te bidigo aga aya de ida si dali dwai po obaso da, teda te bidi aga ela muao,’ Godigo te po si wai. a  Tiali goli te bomo yai po geda siyu, dagego te po wabo dao, ‘Te bidi me deli agai aga aya me ida tau sabo mone me doado bage me elaluali digi, agai augwali sibolo “Eno e nai te Godibolo mawainogo sa muai nai dao” weyu da, te usu da, te agai aga aya ida tau sabo tagalama, agai augwali sigo nogi ugwaba sabo bomo yai po bolobo sę te usu dao,’ te dagego te po ola mabo dao. Te tebo kolesagago dagego te Godigo po aiyaba elaluama, tama duga ebo kolesaga digi te ugwaba sabo dao, te naga wali pomainogo. Dage homu ugwadu naga po wabo bidi dabe dao. Te Godigo po pusali profet bidi Aisaia agai dagede polobadu mu wali po te mu po tama dao. Agai dagede te Godigo po tama wai,

‘Te hani we bidi augwaligo eno nogi te
pedauwaligo naga ugwaba sabo dao, tiali goli
augwaligo homu kolesagago augwaligo ena dali
abagi homu ebo menio.
Augwaligo te bidi dabego ola mani bomo yai po
naga pusuyu te po wabo dao, “E te Godigo po dao.”
Tama tibaso augwaligo olo naga enabolo lotu po
wabo dao,’ b 
Godigo te po wali,” Jisasgo te po wai.

Te bidi meda ilisiąbo nai po

(Mak 7:14-23)

10 Te Jisasgo te po te tuni bidi dabebolo olama, tama te gasa olo we bidi augwali aga pageba asomainogo i olama, tama augwali aselama, tama agai augwalibolo te po wai, “Dagego e po bugagia odama, homude kuna koneao. 11 Te bidi deligo agai aga nogo wę telasiąbadi te agai nai sela tubaso da, te kolesagago te bidi meda me iligobeo, tebogo aga Godigo gedude dwai bidi me iligobeo. Menio. Tiali goli te po bidigo pedauwali tomodu te buluba soabo pogo, tego naga te bidi meda ilibo dao,” Jisasgo te po wai.

12 Tama te sogo te aga wali pabo bidi dabe augwali aselama, agabolo te po wagasai, “Nago te Farisi dabe augwaligo nago megi tamadi wali po odoyu, tama augwaligo dwai homu ebo koneaniwe?” te po wai.

13 Agai po wei ponoyu, te po digi po begelama te po wai, “Eno Aya dagalude bidibao, agai gi tiwai elalubao. Tama tigidali nai dabe te agai digi me bulusąwani nai da, te nai tigidali deli deli agai te sele dabe dali page guda sąwaibao. 14 Dagego te Farisi dabe augwali sula tagalama elaluao. Augwali te gedu widai, tama te gedu widai mego te gasa gedu widai bidi te pabo tų ola mawainogo ebao. Tiali goli, te me gedu widaigo te me gedu widai bidi te tų ola mayu da, teda bidi talua si te ąį gamia pageba tulaluaibao,” Jisasgo te po wai.

15 Pitago te po wai, “Nago te hasia wali po digi po begelama wali po page pusao, tama dago odaio.”

16 Jisasgo te po bomonama wai, “Dage me te homu kolesaga meni yai bidi dabe dawe? 17 Te dagego konebo meniwe? Te tigidali nai pedauwali tomodu te tabiba pelama, tama te tabigo nosali te di beba sela sągi pabo dao. 18 Tiali goli te po pedauwalide bidama tama te buluba asobo, te po te bidigo homu kolesagadu pedalobo dao. Tama te pogo naga te bidi meda ilibo dao, tebogo aga Godigo gedude dwai bidi ilibo dao. 19 Tama bidigo homu kolesagadu te haniani dwai sę ilabo homu pedalobo dao. Tama te tobage homu eyu, augwaligo po weyu, tama augwaligo te bidi ela mubo kolesaga me, te we sabo sę dolobo kolesaga me, te hale ilibo penani kolesaga dabe me, te nai wi sabo kolesaga me, te po tųde tibo po wabo kolesaga me, te bidi nogi posobo po wabo kolesaga me, te tobage dwai dwai sę ebo dao. 20 Tama te tebo kolesaga dabego te bidi Godigo gedude te dwai meda ilibo dao. Tiali goli bidigo duga wąįgo ola mani nogo wę telabo kolesaga isiąbadi te nai tubo, tebo kolesagago te bidi meda iligobeo,” Jisasgo te po wai.

Kenan tǫ we agai konealubo po Jisasde dąų mu wali po

(Mak 7:24-30)

21 Te Jisasgo te Genesaret tǫ tagalama, tama aga gasa tǫba pai, te hanu si nogi me Tair, me Saidon, te hanu si pąba pai. 22 Tama te Kenan tǫdu asai we me deli te bulude bidai, te we da te Israel hani isiąwai we dao. Tama te we Jisas pageba asama, tama te po wedu geai, “Genuai bidi, nage te polobadu bidali bidi Devit aga hani bidi, nage ena dali homu dene eyu, tau siyu yao. Eno wegi te dwai haubogo mu dagana sai, tama te dwai haubogo te wegibolo dene mu mabo dao,” te wego te po wedu geai.

23 Tiali goli Jisasgo te wego po wei ponobeo, sagia sai. Tama aga wali pabo bage augwali agaba aselama, tama aga homu begelemainogo te po wai, “Te we aga tagala palao. Aga da wali asiyu, da dali bomonama i weyu ebao,” augwaligo te po wai. 24 Tama Jisasgo augwalibolo po wei ponoyu, te po wai, “Te Israel we bidi hani augwali te hagawai kibu sipsip tiwai dao. Tama God agai ena tǫba tagala palali, te eno augwali naga tau somainogo asai,” Jisasgo te po wai. 25 Tiali goli te wego te po odolama, tama Jisas aga sągąde kidu sugunagaselama, tama yalima, te wego te po wai, “Genuai bidi, nago ena tau sao.”

26 Tama Jisasgo te wego po wei ponoyu, te po digi po begelama, te po wai, “Te wai pulubago tubo nai te nai dago te dwasianu yowi dabebolo menamuo, te dolo menio,” Jisasgo te po wai.

27 “Te po mu dao, genuai bidi,” te wego te po wai. “Tiali goli te yowi dabe me augwaligo te ni nami sai dologoba tulaluali tubo nai kagali, te nai te yowi dabego tubo dao, page bidigo bede,” te wego te po wai.

28 Tama Jisasgo te wego po wei ponoyu, te po wai, “We, nago naga homu tigidali enaba mani sę, enade konealubo sę, te sę genuai mu dao. Tama tibaso, nago ena dali hanalu wali nai po te pedalaibao,” te po wai. Tama Jisasgo te po wabo side, tama te sogo polo tama te wego wegi gasi sana pelama, bidai.

Jisasgo gasi yai bidi hauwa geselali po

29 Te megi da, Jisasgo te hanu si tǫ tagalama, tama te sigi ąį Galili tǫ pąba pai. Tama aga te tǫde te bulu du me deliba holama, tama te bulu dude dulaluai. 30 Tama we bidi hani hauwa augwali aselama, aga pageba sisinagasai. Tama augwaligo te sągą dwai we bidi dabe me, te gedu widai bage me, te dili gagea pai bage me, te pedauwali pania sai bage me, te gasa gasi yai bidi dabe hauwa me, tama augwaligo te bidi dabe Jisas sągą pageba muagasai. Tama agai augwali ma usu ilama, gesela silai dao. 31 Tama te we bidi augwali noma siyu, augwali homu hauwa yai. Magi basowe, augwaligo suali, te pedauwali pania sai we bidi dabe po ma weyu, te dili gagea pali bage te usu ma eyu, tama te sągą dwai bage me te ma biliyu yai, tama te gedu widai bage te gedu pedeliyu yai. Tama tibaso, augwaligo te Israel bagego God nogi ugwaba mu sai dao.

Jisasgo te 4,000 bidi dabe nai mani po

(Mak 8:1-10)

32 Te Jisasgo aga wali pabo bidi dabe i olama asobode, tama agai te po wai, “Eno e we bidi augwali homu dene ebuo. Augwali sela sogo ena dali bidali, te augwa sesali nai tula silali. Te eno augwali nasi ebadi pao po weyu tagala palogobeo. Tiyu augwali tųde nasigo sidalio,” Jisasgo te po wai. 33 Tama aga wali pabo bidi dabe augwaligo agabolo te po wai, “Te ede te bidi meni yai digi dao. Te dago te tubo nai bret hauwa te menade selama, te e tiwai bidibo genuai we bidi hani hauwa magowe?” te po wai.

34 Jisasgo augwalibolo te po wai, “Dagego nisu naga bret elalubawe?” Augwaligo te po wai, “Dago bret nogo a naga me badu nogo si badi, tama dwasianu sųgų si sela badi tama dago munalubao,” te po wai.

35 Tama Jisasgo te we bidi augwalibolo te po olama, tama augwali te tǫde duda pai. 36 Tama agai te bret a naga olama me badu nogo si badi, te sųgų dabe sobadi elama, tama agai Godibolo nage usu da po olama, tama te nai pebedelama, tama aga wali pabo bidi dabebolo madubadi, tama augwaligo te we bidibolo te nai dobaba pai. 37 Tama tigidali augwaligo te nai tuali usu ela silai. Tama Jisas aga wali pabo bidi dabe augwaligo te me badu elaluali nai tigidali sisinani, tama te naigo te genuai bonou wa a naga olama me si pągąwai. 38 Tama te we dabe sibi me te wai puluba me augwaligo te nai me tuali goli, augwali nedebeo, te nai tuali bidi dabe naga nedali e tiwai te bidi sese hauwa 4,000 bidi dao.

39 Te augwaligo te nai tula silama, tama Jisasgo te we bidi augwa buluba tagala palama, tama aga te geba holama, tama aga te ąį daidu pelama, te Magadan tǫ badu pai dao.

Copyright information for `MPS