a[Sek 9:9]
b[Tib 118:25, 26]
c[Ais 56:7; Jer 7:11]
d[Tib 118:22-23]

Matthew 21

Jisas te Jerusalem hanu tomoba tuni bidi tiwai pai

(Mak 11:1-11; Luk 19:28-40; Jon 12:12-19)

Te augwali Jerusalem pąba sabolama, te dwasianu hanu nogi Betfage teba sabolali, te Oliv bulu du pąde elaluai. Tama Jisas aga wali pabo bidi si tagala paliyu, tama augwali sibolo te po wai, “Dage sigo te pąde elalubo dwasianu bulu tomoba pelama, suao. Tama polo dage sigo te kibu donki me deli augwaligo te bonogo gebelai dolalubo sueibao, tama te donki aga wai dali dao. Tama dage sigo te gebelali bono pisiginama, te kibu donki si ena pageba selasa asao. Tama dage sigo te donki si sela sobadi, bidi me deligo dage si dali po me obaso da, te bidi dali dage sigo te po wao, ‘Woo, Genuai Bidigo sę e donki side elalubo’ po wao. Tama te po olama, tama polo agai te kibu donki si dage sigo sela piąo te po waibao,” Jisasgo te po wai. Te sę pedalobo si te Godigo sę nosali pedalabo po pusali bidigo polobadu wali po usu numainogo yai. Agai te po wali,

“Te Saion bulu we bidi dali te po wao, ‘Suao, dagego
tuni bidi duga pageba asobao. Agai nagame yai
kolesaga dali, te aga kibu donki daide naga dualasa
asobao. Tama aga te walu sabilibo donkigo wai tede
dualasa asobao,’ te po wao,” a 
profet bidi me deligo te po polobadu wai.

Tama aga te wali pabo bidi sigo te Jisasgo augwali si dali wali po wali pelama tama tiwai. Tama tega sigo te donki aga ida dali te wai dali me sela asai, tama augwa si gudubo ugwa te donki si tudiba muai. Tama Jisas aga te donki wai tudide dualasa pabo gagalai. Tama aga pobadi we bidi hauwa augwaligo augwa gudubo bobobage ugwa dabe te tųde wawa sili pelama, muna muna pai. Tama bidi meba augwaligo yabe elalubo ni nologo togolama, tųde muna muna pai. Genuai bidi asobao homu eyu tama tiwai. Tama te bidi Jisas tomoba ilama peyu, tama we bidi meba augwali polasa pabo bage dali, nosali asobo we bidi dali augwaligo bomo elama i weyu, te Jisasgo nogi ugwaba siyu, te po wai,

“Dago nage dali dwagi yai homu pemene ebao, te
nage Devitgo hani bidi dao. Godigo nage dali dwagi
yai sę yao, te nage te Genuai Bidigo nogide asali
bidi dao. Dagalude bidibo bage me augwaligo aga
nogi ugwaba sao.” b 
10 Te aga te Jerusalem hanu tomoba pali, tama te hanu tomode bidali we bidi augwali noma mu selama, tama te po wai, “Te bidi aga te de dawe?” te po wai. 11 Tama aga dali asali we bidi augwaligo te po wai, “Aga te Jisas dao, te Godigo po pusubo profet bidi, te Nasaret hanudu te Galili tǫdu asai dao,” augwaligo te po wai.

Jisasgo te Moni Lotu Be tempelde bisnis sę yali bidi dabe sela sąwani

(Mak 11:15-19; Luk 19:45-48; Jon 2:13-22)

12 Te Jisas aga te Jerusalem hanu tomoba pelama, tama aga te Moni Lotu Be tempel tomoba peyu suali, te nai muani bage dali me, te nai abelebo bage dali me sulama, tama agai augwali tigidali buluba sela sąwai. Tama agai te Godibolo ofa mabo gasagi yai masigi ge dobu si ebo bagego tebol sai dali mone ge dali gelali. Bidi meba augwaligo ba hi dabe te be tomode muagasai, te olo we bidi augwaligo te ba hi abelama, te Godibolo ofa olo mawainogo te ba dabe muani. Tama agai te bagego duabo sai dabe gea palali. 13 Tama tilama, agai te po augwalibolo wai, “Bukude Godigo e po asęai dao, ‘Eno be da, te we bidigo gedu haluasa po wabo be dao,’ te po elalubao. Tiali goli dagego te be te nai wi sabo bidigo be tiwai te ilibao,” Jisasgo te po wai. c 

14 Tama aga te Moni Lotu Be tempel tomode bidibadi, tama te gedu widai we bidi dabe me, te sągą dwai bidi dabe me augwali aga bidibo pąba asali, tama agai augwali wiegi yai ma ilali. 15 Tiali goli te genuai pris bidi dabe me, te bomo yai po page koneai bidi dabe me augwaligo agai te bomai sę ebo sulama, tama odali te wai puluba augwaligo te Moni Lotu Be tempel be tomode bomonama i weyu te po wai, “Te Devitgo hani bidi dali wiegi yai homu pemene yao,” te wai puluba augwaligo te po wai. 16 Tama tibaso, te genuai bage augwaligo homu dwai eyu, agabolo te po wai, “Te nago augwaligo te wabo po nago odaliwe?” Tama Jisasgo augwalibolo te po wai, “Ao, eno odalio. Tiali goli dagego te bidi me deligo te Godide polobadu asęani po me deli nedebewe? Te po e dao, ‘Nago te gilama, tama te dwasianu wai puluba augwaligo nago nogi ugwaba sabo wiegi yai po wai dao.’ Dagego te po nedebewe?”

17 Tama agai augwali tagalama, tama aga te moni hanu buluba pelama, tama te dwasianu hanu Betani te badu hulide bidigi pai.

Jisasgo pode te ni kaya sasia pai

(Mak 11:12-14, 20-24)

18 Te sogo kigamu digi mu aga te moni hanu tomoba ma pobadi tama aga nasi yai. 19 Tama aga pelama, te tų sesegede elaluali ni kaya sulama, tama te ni pąba pali, aga du sela tuainogo yai. Tiali goli tede nai me deli walai elalubo subeo. Menio. Yabe naga elaluai. Tama agai te ni kayabolo te tiwai po wali, “Nago nai ma walogobeo. Mu menio.” Tama polo mu te ni kaya aga sasia pai dao.

20 Te aga wali pabo bidi dabe augwaligo te sę ebo sulama, tama augwali noma mu sai. Augwaligo te po wai, “Magi baso e ni kaya te polo sasia paliwe?” 21 Tama Jisasgo po wei ponoyu, augwalibolo te po wai, “Eno mu po dagebolo obao, dagego te Godide konealubo po mu dąų olama, tama dagego homu si me isąbaso da, teda dagego eno e ni kayade yali tiwai sę dagego me ebo te usu yaibao. Tama dagego te sę naga egobeo. Menio. Te dagego e elalubo bulu dubolo te po weyu, ‘Nage hodaluama, nage te tamu ąįba samonao’ po obaso da, teda agai te tiwai yaibao. 22 Tama dagego konealubo po dąų olama gedu haluasa po weyu da, teda te nai dagego sainogo gedu haluasa po wabo, te nai dagego saibao,” Jisasgo te po wai dao.

Augwaligo Jisasbolo hanalu wali dego te sę aga nogoba mani po wai

(Mak 11:27-33; Luk 20:1-8)

23 Te Jisas te Juda dabego Moni Lotu Be tempel tomoba pelama, te wiegi yai po te we bidibolo ola maduai. Tama te genuai pris bidi dabe dali, te Juda bagego tobolu bidi dabe augwali dali agaba aselama, tama te po wai, “Nago magi bomo elaluyu, nago naga ebo sę ebawe? Tama dego te bomo nagebolo mayu te sę yao weyu yaliwe?” 24 Tama Jisasgo po wei ponoyu, augwalibolo te po wai, “Eno me eno magi nai po me deli naga dagebolo hanalu waibao. Tama dagego eno po wei ponebaso da, teda eno me eno dagebolo te eno magi bomo elaluyu, eno e sę ebo te po dagebolo waibao.” 25 Tama agai te po wali, “Te Jongo we bidi baptais mani sę te menade pedalaliwe? Te Godigo te sę agabolo maniwe, ma bidi dabego mani sę nagawe?” wali.

Augwaligo te po wabo odolama, tama augwa digi augwa hasi po miyu te po wai, “Ma, dago e tobage po wabo si, ‘Te Godigo te sę agabolo mani’ po obaso da, teda agai dabolo e tiwai tobage po waibao, ‘Teda magi baso agai wali poba dagego duga homu muyu dąų wabewe?’ Te po da dali waibao.
26 Tama te po obaso, dago te po waibao, ‘Bidi dabego naga te sę Jonbolo mani’ obaso da, teda da te e bidalubo we bidi wi yaibao. Magi baso meni, tigidali bage augwaligo te Jon aga te Godigo po pusali bidi profet da te homu naga ebo dao,” te po wai. 27 Tama tibaso, augwaligo te po wei ponoyu, Jisasbolo te po wai, “Dago konebeo.” Tama Jisasgo augwalibolo te po wai, “Eno me eno dagebolo te eno magi bomo elaluyu, eno e sę ebo po te dagebolo me wagobeo,” Jisasgo te po te Juda bage genuai bidi dabe dali wai dao.

Bidi deligo ogwa side po digi po begelama wai

28 “Tiali ma, dagego magi homu ebowe? Bidi deligo ogwa si bidai. Aga te me ogwa pageba pelama, agabolo te po wai, ‘Ogwao, te megi e sogode nage pelama, te wain bono du giba sę egi pao,’ te po wai. 29 Tama aga ogwago te po wai, ‘Ena hagela palio.’ Tiali goli nosali aga homu ma hasegelama, tama aga te sę egi pai. 30 Tama te bidi aga gasa ogwa pageba pelama, te wali po tiwai naga agabolo wai. Tama agai te po wai, ‘Awe, aya.’ Tiali digi aga pabeo. 31 Tama tilama, te ogwa sigo te mena ogwago mu te aga ayago homu kolesaga wali paliwe?” Jisasgo te po hanalu wai. Tama augwaligo te po wai, “Te aga hasia ogwago agai po wali pali.” Tama Jisasgo te Juda bage genuai bidi dabebolo te po wai, “Eno mu po dagebolo obe dao, te takis mone sabo dwai bidi dabe augwali badi, te penani yali we dabe dali, augwaligo ge neyu homu ma hasegelama, tama augwali dage aiyaba elaluama tama polasa te Godigo we bidi tonalubo kolesaga tomoba peyu, tama dage nosaliba ilalio. 32 Magi baso meni, Jon dageba pedalama, tama agai te doloba pai kolesaga ebo te po dagebolo ola mani, tama dagego aga wali poba homu dąų wabeo. Tiali goli te takis mone sabo dwai bidi dabe badi, te penani yali we dabe augwaligo homu te poba dąų wai. Tama te tama tebo dagego suali goli dagego ge neyu, homu hasegelama, agai wali poba homu dąų wabo kolesaga munu me ebeo,” Jisasgo te po augwali dali wai.

Te po digi po begelama te dwai bidi dabego te wain bono du gi tonaluali wali

(Mak 12:1-12; Luk 20:9-19)

33 “Dagego te gasa po digi po begelama wali po me odao. Bidi me deligo genuai tǫ elalubo bidigo agai te bono du wain gi bulama, tama obo bagulali. Tama te gi tomode agai te wain bono du agayabo te tank nai nigilali, tama te gi tonalubo bidigo bobobage be me me deli sę yani. Tama agai te gi te sę yabo bidi meba augwaligo nogoba muani, te augwaligo te gi tonalubo sę eyu, te gi nai meba naga somainogo yai. Tama te gi page bidi aga digi digibulu bulu me deli teba pai. 34 Nosali, te wain bono wai sisinabo sogo bodolu pąba yagasali, tama agai te sę bidi dabe augwali tagala palama, augwali te wain bono giba pelama, te gi page bidigo nai sigi pomainogo yai. 35 Tama te gide sę yali bidi dabego te tagala palali sę bidi dabe selama, tama augwaligo me deli ela tagaliyu, tama gasa sę bidi me te mu ela muani, tama gasa sę bidi mebolo te masigigo naga elainu te masigi sąyani. 36 Tama te gi page bidigo te sę bidi meba ma tagala palali. Agai sę bidi hauwanu gana tagala palali, te polobadu yali tiwai ebeo. Tama te gide sę ebo bidi dabego te hasia yali kolesaga tiwai naga augwali dali yai. 37 Tama nosali agai aga ogwa mu te augwalibolo tagala palai. Ayago e tiwai po wai, ‘Te augwaligo eno ogwago po mu odaibao,’ te homu yai. 38 Tiali goli te gide sę ebo bidi dabe augwaligo te ogwa asobo sulama, tama augwa hasi po miyu te po wai, ‘Te aga aya isibo si, e bidigo te aga ayago nai tigidali saibao. Asao, te dago aga ela muiąo, tama dago agai sabo gi saibao,’ te gide sę ebo bidi dabe augwaligo te po wai. 39 Tama augwaligo aga selama, tama aga augwaligo te gidu te buluba ma sela sąyani, tama augwaligo aga ela muai dao. 40 Tama tibaso, nosali te wain bono du gi page bidi asiyu, tama mena tiwai kolesaga te gide sę yali bidi dabe augwali dali egowe? Dagego magi homu ebawe?” Jisasgo te po wai.

41 Te augwaligo agabolo te po wai, “Teda augwali te dwai sę yali bidi dabe bidibaso, agai augwali dwagila mu dolaibao. Tama agai te wain gi gasa hanigo te gi sę tonalumai hagede mawaibao, tama te gide nai sabo sogo augwaligo aya agabolo nai mawaibao,” augwaligo te po wai.

42 Te Jisasgo augwalibolo te po wali, “Te bukude polobadu asęani te po te dagego nedebewe? E tiwai dao,

‘Te masigi be sę yabo masigi me deli te sę bidi
dabego sela sąyani masigi, megi da polalubo masigi
pedalama, te be dąų walali elalubao. Genuai Bidigo
agai te tiwai sę elama pedalali, tama dago suali te
wiegi yai mu dao.’ d 
43 Tama tibaso eno e po dagebolo obao, te Godigo we bidi tonalubo sę dagede elaluali dagalama, tama te Godigo we bidi tonalubo sęde doloba pai kolesaga ebo we bidi augwaliba eno te nai mawaibao. 44 [Tama bidi te masigi daiba ugwadu tulalubo bidi da, teda te bidi aga te dwasianu dwasianunu mu pebeda paibao. Ma, te masigi te bidi deli daiba ugwadu tulalu baso da, teda agai aga mu dolama, tama pobele bage naga tiwai pedalaibao.]”

45 Te genuai pris bidi dabe badi, te Farisi dabe dali, augwaligo Jisasgo te po digi po begelama wabo po odama, tama augwaligo koneani, agai te po augwalide wai. 46 Tama augwaligo aga dąų wabo tų kegali, tiali goli augwali te we bidi augwalide wi yali. Te we bidi augwaligo homugo Jisas aga te Godigo po pusubo bidi dao te homu yalio.

Copyright information for `MPS