a[Nam 15:38; Bom 6:8; Mt 6:1]
b[Prs 27:30]

Matthew 23

Te bomai po page ola mabo bidi dabe dali, te Farisi dabe dali sigo ebo kolesaga

(Mak 12:38-39; Luk 11:43,46; 20:45-46)

Te Jisas agai te Farisi dabego po aiyaba elaluama, tama te sogo tama agai po te we bidi dabe dali, aga wali bilibo bidi dali, augwalibolo te pusali. Agai e tiwai po wai, “Te bomai po page ola mabo bidi dabe dali, te Farisi dabe dali, augwaligo dagebolo te bomo yai po ola mabo dao, te Mosesgo yali gilama ebo dao. Tama tibaso, te tigidali po augwaligo dagebolo ola mabo po te dagego odama, wali pao. Tiali goli augwaligo ebo kolesaga, te kolesaga dagego wali pigimio. Menio. Augwaligo po hauwa obadi, tiali goli augwa digi augwaligo te po me wali pabo menio. Tama tiyu, augwaligo te mesegaluai sęgę te bidi dabe augwali nageba ugwadu muaibao, tiali goli augwa digi augwaligo dwasianunu me nogo danigo naga me te tola selama, te sęgę tolobo bidi dabe augwali tau me sogobeo. Augwaligo ebo kolesaga tigidali te we bidi dabego augwali genuai nogi yai bidi da olama sumainogo tibo dao. Awe, te bomo yai po wali peyu, augwaligo te Godigo po asęani nogo mo dali, te wiani dali, augwa tigide mubo dao. Tama augwa gudali ugwa sesegede te sesemo elalubo dao. Tiali goli te we bidigo augwali sumainogo augwaligo te nogo mo me te wiani me te sesemo me, augwaligo te nai genuai mu nigilama mubo dao. a  Augwaligo te genuai nai da tubo side te polalubo ni namide duabo godolo elama, te nai hasia sabo homu ebo dao, tama te bomai po ola mabo bede me te polalubo wiegi yai ni namide naga duabo dao. Augwaligo te we bidi dabego augwali te bidi sisinama bidibo madi tomode te augwalibolo te we bidigo siade da wabo godolo elama, tama augwaligo augwalibolo nogi weyu, te po ola mabo bidi eno tisa da po wabo godolo ebo dao.”

“Tiali goli, te bidi dabe augwaligo dage nogi eyu, ‘Tisa, po ola mabo bidi da’ olamuo. Menio. Te bidi me deli naga te aga dagego te po ola mabo bidi dao, tama dage tigidali te ama dede ama dede naga bidibo dao. Tama e tǫde te bidi me delibolo te dagego aya da po me wagio. Te bidi me deli naga te dagego Aya dao, te aga dagalude bidibo dao. 10 Tama augwaligo dagebolo nogi nogi eyu ‘Tobolu bidi’ po me olamuo. Dagego tobolu bidi deli bidibao, aga te sa muani bidi Krais dao. 11 Dage tomode dagego genuai bidi aga te dagego sę bidi bidao. 12 Magi baso meni, bidi mego aga digi aga nogi ugwaba sabo bidi, te bidi Godigo aiyaba muaibao. Tama bidigo aga digi aga nogi aiyaba elalubo bidi, te aga genuai nogi Godigo agabolo mawaibao,” Jisasgo te po wai.

Jisasgo te bomai po page ola mabo bidi dabego dwai kolesaga ebo po augwalibolo wali

(Mak 12:40; Luk 11:39-42,44,52; 20:47)

13 “Dage te bomai po page ola mabo bidi dabe me, dage Farisi dabe me, hobede ya. Dageba te dwai sogo mu pedelaibao, dage tibo po wabo bage. Te Godigo we bidi tonalubo kolesaga tomoba pabo tų te dagego te we bidi augwaligo gesabidiba te tų palibo dao. Duga digi te tomoba me pabo meni, tama te we bidi augwali te tomoba painogo ebadi, te dagego augwali pabo tų palibo dao. 14 [Dage bomai po page ola mabo bidi me, dage Farisi dabe dali, hobede ya. Dageba te dwai sogo mu te pedelaibao, dage tibo po wabo bage. Dage te augwa bidi isai we dabe pageba pelama, tama dagego te ugwadu homugo naga po augwali dali olama, tama augwaligo be me doado bage wi sabo dao. Tama dagego gedu haluasa po bobobage weyu, duga te dwai sę yali po geme dualiyu tebo dao. Tama tibaso, te dwai sę wei ponabo sogode te dageba asabo sęgę te dwasianu menio.]” Jisasgo te po wai.

15 “Dage bomai po page ola mabo bidi dabe me, dage Farisi dabe dali, hobede ya. Dageba te dwai sogo mu pedelaibao, dage tibo po wabo bage. Dage te tamu ąįde badi, te tǫde dali bilibao, te bidi me deli gegelama, tama te bidi me deli aga dage dali bilabo bidi sainogo dagego bomonama gegebo dao. Aga te dage dali bilibo bidi pedalama, tama dagego aga te moni sia dabo buluba pomainogo ilibo dao, te duga tiwai ilibao. Dagego aga te dwai sę ebo tomoba kegelama, tama agai ebo dwai sęgo dagego ebo dwai sę aiyaba mu elalubo dao,” wali.

16 “Dage gedu widai bagego te bidi dabe augwali tų ola mawainogo ebao, hobede ya. Dageba te dwai sogo mu pedalaibao. Dagego e tiwai po te bidi dabebolo ola mabo dao, ‘Te nago po dąų omainogo eyu da, te Moni Lotu Be tempel nogi olama, tama mu po dao wao. Tiali goli nosali nago te dąų wali po togoyu da, te usu dao, te sęgę menio. Tialima, nago te Moni Lotu Be tempel tomode elalubo wiegi yai kapa gol nogi ilama, tama mu po da wabo si da, teda nago te po wali sę tiwai yao, togolamuo.’ Dagego augwalibolo te po ola mabo dao. 17 Dage esela pelama gedu widalio. Magi nai da te polalubo nai dawe? Ma, te gol da, te polalubawe? Ma, te Moni Lotu Be tempelgo te gol wiegi yai ilali, ma te da te polalubo nai dawe? Te be tempel polalubo dao. 18 Tama dagego te po me augwalibolo ola mabo dao, ‘Te bidigo aga po dąų omainogo eyu da, te Godibolo olo mabo ofa ebo sai nogi ilama, mu po dao wao. Tiali goli nosali agai te dąų wali po togoyu da, te usu dao, te sęgę menio. Tiali ma, agai te ofa saide muani olo mabo nai nogi ilama, tama mu po da obaso da, teda agai te dąų wali po wali sę tiwai yao, togolamuo.’ Dagego te tobage po augwalibolo ola mabo dao. 19 Dage gedu widalio. Magi nai te polalubo naiwe? Ma, ofa polalubawe? Ma, te ofa ebo sai yaligo te ofa wiegi yai ilaligo, te polalubo naiwe? Te ofa ebo sai te polalubo nai mu dao. 20 Tama tibaso, bidigo aga po dąų omainogo eyu, tama te Godibolo olo mabo ofa ebo sai nogi ilama, mu po dao obaso da, teda agai aga po te ofa ebo sai nogi dali, te saide muani nai tigidali dali side agai po olama dąų walali. 21 Tama bidigo te Moni Lotu Be tempel nogi ilama, mu po da obaso da, teda aga po me te tempel be dali, te tempel bede bidibo bidi God dali, te side te po dąų walobao. 22 Tama bidi mego dagalu nogi ilama, mu po da wali da, teda agai te po badi, te Godigo duabo sia sai dali, te sia saide dulalubo bidi dali, te side te wali po dąų walobo dao.” Jisasgo te po wai.

23 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao, dage tibo po wabo bage. Dage te dwasianu bomai po wali peyu, te tigidali gide elalubo dwasianu nai te kaya dabe dagego nogo si bugulama, deli te Godibolo menama, tama nogo a naga olama me badu nogo me si me si dagego sabo dao. Ao, te usu dao. Tiali goli dagego te bomo yai po genuai tigidali me badu sula tagalali, te bidi dagalobo doloba pai kolesaga me, te bidi homu dene eyu tau sabo kolesaga me, te bidi dabe dali dolo sę naga ebo kolesaga me dao. Te Godibolo nogo si nai bugulama deli mabo bomai po badi, te po dagego tagaligio, tiali goli e tobage te genuai bomai po te sę dagego mu iyąo. b  24 Dage gedu widai bagego te bidi dabe augwali tų ola mawainu ebao. Dagego te ąį te dwasianu dinai dali tuidali weyu, dagego te ąį osola suainogo te nami ugwaba gelebo dao. Tiali goli te kibu kamel dagego sese dalobo dao,” wali.

25 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Te daide dage te dwagi yai bidi dabe tiwai dao. Tiali goli dagego homu kolesaga tomode te nai wi sabo kolesaga me te tigigo ebo kolesaga pągąnama, te kolesaga wali pabo dao. Dage da, te ąį tubo kap me plet pou te bulu badu naga penebo bidi tiwai dao. 26 Nage Farisi, nage gedu widai. Hasia bolo nago te kap tomode elalubo pobele bage penao, tama te kap bulu badu me te hogomu meniama usu elaluaibao.”

27 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Dage te gų page ola be augwaligo te tedela yai pengo pilali tiwai dao. Bulu badu da, te bidigo subo dwagi yai ilali, tiali goli tomode da, te isai bidi dabego dili dabe me te tigidali dwai meda yai mobia pai nai te pągąnalubo dao. 28 Dagego me te tiwai naga elalubao. Te bidi dabego dage tigi subo da, augwaligo da dage doloba pai bidi dabe da te homu ebao. Tiali goli tomode da, dagego te tibo po wabo kolesaga me te bomai po sela sąbo kolesaga pągąnalubo dao,” Jisasgo te po augwali dali wai.

Jisasgo te bomai po page ola mabo bidi dabe augwali dwai dene sabo po wali

(Luk 11:47-51)

29 Po ma weyu, agai te po wai,” Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Dagego te polobadu po pusali bidi profet dabe gų pagede masigi be sęnama, tama te polobadu bidali doloba pai bidi dabe muani gų page au ilibo dao. 30 Tama tiyu, dagego e tobage po obao, ‘Da te polobadu wąį dabe bidali sogo da bidigi sogo da, teda dago te Godigo po pusali bidi profet dabe augwali elibo me tau sigi menio.’ 31 Dagego te pogo ola mani, dage da te polobadu po pusali bidi dabe elali te bidi dabego wai dabe te dage megi e bidalubao. 32 Tama tibaso, megi da dage pelama, duga wąį dabego yali dwai kolesaga usu nigi pao. 33 Dage dwai hasamani dabe dao. Dage dwai hasamanigo wai puluba dao. Godigo dage po tų ilibaso, tama dage te dwai sia dabo madi pageba paibao. Mena tama dage menadu wi paibawe? Menio. 34 Tama tibaso, eno te Godigo po pusabo bidi meba badi, tama te wiegi yai homu konea palobo bidi me, te Godigo po ola mabo bidi augwali dageba tagala palaibao. Tama te bidi dabe meba dagego ela muyu, tama meba te ni pedaide eliyu, tama meba dagego bomo yai po ola mabo be tomode bigo eleyu, dene mawaibao. Tama dagego augwali te hanu me delide ela gudulama, tama gasa hanu meba dagego augwali pobasa pabo sę yaibao. 35 Tama tibaso, te doloba pai bidi dabe augwali e tǫde bidaluali, tama te bidi dabego augwali ela silalio, te sęgę dugade naga elaluaibao. Augwaligo te doloba pai bidi dabe ela silali, te wiegi yai bidi Abel gagalasa pelama, te Sekaraia teba usu nigi palio, te Berekiago ogwa, aga dagego te Moni Lotu Be tempel tomode ela muani, te dwasianu be dąį togali me te ofa muabo sai te si tomode dagego Sekaraia ela muani. 36 Eno mu po dagebolo obe dao, te dwai sę yali sęgę tigidali te megi e tǫde bidalubo we bidi haniba mu pedelaibao,” Jisasgo te po wai.

Jisasgo te Jerusalem hanude gela walali

(Luk 13:34-35)

37 “Jerusalem, Jerusalem, nago te Godigo tagala palali bidi profet dabe augwali ela munama, tama nago te Godigo nageba tagala palali sę bidi masigi sąnama, augwali me ela muanio. Hauwa sogo mu eno nago we bidi sisinainogo ebadi, te so ba kakarukgo te aga wai dabe augwali te bogo dologoba sisinibo tiwai, tiali goli dagego hagela yai dao. 38 Dagego odao, megi da, dagego bulu da te olo elaluaibao, tagalai dao. 39 Awe, eno dagebolo obao, te dagego ena ma sugobeo, tama bidama nosali sogo usu nigi pelama, tama te sogo dagego te po enade waibao, ‘Dago homugo te Godigo te Genuai Bidigo nogide asali bidi dali wiegi yai sę yao,’ dagego te po waibao,” Jisasgo te po wai.

Copyright information for `MPS