a[1 Kin 10:4-7; 2 Sto 9:3-6]

Matthew 6

Jisasgo te we bidi tau sabo kolesaga te po wai

Te bulu du daide bididubadi, Jisasgo te po me wai, “Dage dua dao. Te we bidi dabe augwaligo dagego te wiegi wiegi yai kolesaga ebo sulama, tama augwaligo dagego nogi ugwaba somainogo te bidi dabe augwali gedude te duga wiegi yai kolesaga egimio. Te dagego tama kolesaga eyu da, te duga dagalude bidibo Aya agai te dage mawainogo sisi elama elalubo te wiegi yai nai te dagego me sogobeo.”

“Tama tibaso, dagego tama tiao. Nago te magi nai meni yai bidi tau siyu, te masigi madu gebo si, te nago polasa te bu wabo nai biugel bu wabo bidi bolo tagala paligio, te ugwadu homugo naga po wabo bidi dabego ebo tiwai egio. Te we bidigo augwali nogi ugwaba somainogo tama augwaligo te we bidi gesabidide te nai meni yai we bidibolo masigi mabo dao, te bomo yai po ola mabo bede me, te pabo tųde me te kolesaga augwaligo ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai mu me magobeo. Tiali goli nago te magi nai meni yai bidi dabe augwali tau sabo si, teda te sę geme yao, tama nago pobase nogogo te dolo nogogo ebo sę koneabuo. Tama tiyu da, nago augwalibolo nai mabo sę te geme dulaluao. Tama nago Ayago te nago geme dulalubo sę dabe subo dao, tama agai te wiegi yai nai wei nagebolo ponaibao,” Jisasgo te po wai.

Gedu haluasa po wabo kolesaga

(Luk 11:2-4)

“Tama dagego gedu haluasa po wabo sogo, dagego te ugwadu homugo naga po wabo bidi dabe augwaligo ebo kolesaga tiwai egimio. Augwaligo te bomo yai po ola mabo be tomode dolaluyu, gedu haluasa po wabo godolo eyu, me te genuai pabo tų bagu badu me, te we bidi dabego augwali sulama, tama augwali nogi ugwaba somainogo tiwai ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai mu me magobeo. Tiali goli nago gedu haluasa po wainogo da, te naga be tomode dąį togali digi pelama, tama tų paliama, naga Ayaba gedu haluasa po geme te be tomode nagaduba wao. Tama naga Ayago te nago geme dulalubo sę dabe subo dao, te agai te wiegi yai nai wei nagebolo ponaibao,” wali.

“Tama dagego gedu haluasa po wabo sogo, te olo po hauwa widu geyu, te Godigo po odosiąwai bidi dabego wabo po tiwai egio. Augwaligo homu augwaligo po hauwa widu gebaso, te Godigo te po odama, tama agai augwalibolo te hanalu wali nai mawaibao. Te dagego augwaligo ebo kolesaga wali pigio. Te sogo dagego duga Ayabolo po hanalu wasiąbadi, agai dage te tigidali nai habuge ebo te agai koneai dao. Tama dagego gedu haluasa po e tama wao,

‘Dago Aya, nage dagalude bidibo bidi, dago homugo
nago nogi wiegi yai tedali mu bideibao.
10 Dago
homugo te nago te we bidi mu tonalubo sogo
daba asomainao. Tama te dagalude bidibo bidi
augwaligo nago homu kolesaga wali pabo tiwai
gilama, tama nago homu kolesaga e tǫde bidibo
we bidi augwaligo wali pao.
11 Dago homugo
nago megi e sogode usu nama te da tuabo nai mao.
12 Tama dago homugo nago dago dwai sę yali
sela sąyao. Te bidi dabe augwaligo da dali dwai sę
elama, tama dago augwaligo te dwai sę yali sela
sąbo tiwai yali gilama tama nago dago sęgę sela
sąyao.
13 Te da te dwai sę yanama sinawainogo
ebo sogo daba asidali weyu, nago te habu selao.
Tama te dwai sę page bidi agai da dolidali weyu te
nago da tau sao. [Tama nago te genuai bomo me
ula, te genuai nogi me te nagede sesemane sogo
bidada paibao. Mu dao, te tama tiwai pedalomainao,
te dago homugo dao.]’ Te tiwai eyu, gedu haluasa
po wao,” wali.
14 “Odiąo. Te dagego gasa we bidi augwaligo dage dali dwai sę ebo sela sabaso da, teda duga Aya dagalude bidibo bidi agai te dagego dwai sę ebo me te sela sąwaibao. 15 Tiali goli, dagego te gasa we bidi augwaligo dage dali dwai sę ebo sela sasiąbaso da, teda duga Aya agai me te dagego dwai sę te sela sagobeo,” Jisasgo te po wai.

Tubo nai osogo gisilibo kolesaga po

16 “Te dagego Godibolo po wainu tama nai osogo gisilidu gebo si, teda dagego dwai gesabi siyu, te hulia sabo te tiwai te ugwadu homugo naga po wabo bidi dabego nai osogo gisilama gesabi hulia sabo tiwai egimio. Te menio. Augwaligo gesabi doloyu, hulia sabo te we bidigo augwaligo nai gisilali sulama konemainogo ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai me magobeo. 17 Tiali goli dage da, te dagego God dali po wainu te nai osogo gisilidu gebo si, te dagego gesabi dologio, te dagego duga tobolude wel munama, tama dagego gesabi wę tela yao, 18 te we bidi augwaligo dagego tubo nai gisilibo koneidali weyu tama yao. Te duga Aya te bidigo gedugo susiąbo bidi agai naga dagego ebo sę sueibao. Tama duga Ayago te geme dulalubo nai subo dao, agai dagebolo te wiegi yai nai wei ponaibao,” Jisasgo te po wai.

Wiegi yai doado bage dagalude sisinibo kolesaga po

(Luk 12:33-34)

19 “Dagego duga wiegi yai doado bage e tǫde sabogimio. E tǫde dwai asibago me te yaba ilibo nai dabego te nai doloyu, me te nai wi sabo bidi dabego te be tomode munalubadi aselama, nai wi sabo dao. Tama tibaso, te nai e tǫde sabogimio. 20 Te menio. Te dagalude te dwai asiba dabego me te doloyu, te dwai yaba ebogo te nai me dologobeo, tama te nai wi sabo bidi dabego te be aluama te nai wi me sagasogobeo. Tama tibaso, dagego duga wiegi yai doado bage te dagaluba naga saboama muiąo. 21 Te dagego wiegi yai doado bage elalubo bulu, te bulude naga dagego homu konea palaibao,” Jisasgo te po wai.

Tigigo ula ebo po wai

(Luk 11:34-36)

22 “Gedu da, te tigide lam tiwai dao. Tama nago gedu wiegi yai elalubaso da, teda nago tigi me te tigidali te ula yaibao. 23 Tiali goli nago gedu dwai yaibaso da, teda nago tigi me te tigidali be hulia saibao. Tama nage tomode elalubo ula te be hulia sabo tiwai yaibaso da, teda te hulia sali te genuai mu yaibao,” Jisasgo te po wai.

Bidi deligo te genuai bidi side sę ebo usu egobeo

(Luk 16:13; 12:22-31)

24 “Te bidi deligo genuai bidi sigo sę ebo usu egobeo. Agai me deli dali dwai homu eyu, tama me dali te agai wiegi yai homu yaibao. Te agai me deli wali peyu, tama agai gasa bidi me aga homude bo weyu, te tudiba muaibao. Te tiwai dagego te Godigo sę dali te mone sabo sę dali yainogo ebo te usu egobeo. Te dage te mone dali doado bage dali si sabo sę ebo homu dologode bidiyu da, teda dagego duga homu te Godigo sę ebode bugagia mugobeo,” wali.

25 “Tama tibaso, eno e po dagebolo obao, dagego duga bidibo ula tigi tau mabo naide homu hauwa eyu, te po wagimio, ‘Da magi nai tugowe?’ ma ‘Da magi wę tueibawe?’ Tama dagego duga tigi tau siyu gudabo ugwade homu hauwa elama te po olamuo, ‘Da magi ugwa gudugowe?’ Te bidabo ula elalubogo te tubo nai aiyaba elalubo dao. Me te tigi elalubogo te gudabo ugwa aiyaba elalubo dao. 26 Dagego te ba dabe suao, te dagalude bola pobao. Augwaligo nai bulusiąma, tama te nai sisinama te nai mubo beba me mubo meni goli, augwali nai te Godigo mabo dao. Tama tiyu, God agai gedude te ba dabe augwali genuai nai meni yai goli, agai augwali bugagia tonalubo dao. Tama dage da, dage agai gedude genuai dao. Tama tibaso, agai dage me bugagia tonaluaibao. 27 Mu tama dao, dage tomode niwai bidigo moni homu ebogo te aga digi aga bidabo bubuga bobobage ma ilabo usu yaibawe? Te menio, usu me egobeo.”

28 “Tama magi baso dagego homu hauwa te tigide gudubo ugwade ebawe? Dagego te gide holobo plaua noswai suiąo, te augwali da magi ilama pedalobo dawe? Augwali da te sę dene ebeo. Te augwaligo ugwa me nigibo menio. 29 Tiali goli eno dagebolo obao, polobadu te tuni bidi Solomon agai tigidali au dobage muyu, aga wiegi wiegi yai gudubo ugwa guduai goli, agai tigide muani au dobage te noswai plauago augo aga aiyaba elaluai dao. a  30 Tama te gide megi elaluali noswai, tama do da te noswai augwaligo togolama, siaba sąwaibao. Tama te tiwai olo noswai te Godigo au ilibo dao. Tama dage te konealubo po dwasianu naga dąų wabo we bidi, dagego mu koneiąo. Godigo dage me bugagia tonaluyu, te ugwa dabe dagebolo me mu mawaibao. 31 Tama tibaso, dagego homu hauwa eyu te po wagimio, ‘Te da magi nai tugowe?’ ma ‘Da magi wę tugowe?’ ma ‘Dago gudubo ugwa dabe menade saibawe?’ Te dagego tama moni homu egimio. 32 Menio. Te kolesaga tigidali te Godigo po odisąbo we bidigo wali pabo homu kolesaga dao. Tama duga Aya dagalu bidi agai dage te haniani nai habuge ebo si agai koneyu, tama agai dage tau saibao. 33 Tama tibaso, te naide moni homu isiąma, tama dagego hasia bolo te Godigo we bidi tonalubo sę dali, me te wiegi yai doloba pai kolesaga sabo sę bolo wali piduama sao. Dagego te tama kolesaga ebaso da, te nosali agai gasa nai dabe tigidali me dagebolo mawaibao. 34 Tama tibaso, dagego do yabo sęde homu hauwa mu egio. Te do pedalabo sęgę te augwa digi do dodololaibao. Te deli sogo ebo sęgę te sogo naga usu nama yaibao,” Jisasgo te po wai.

Copyright information for `MPS