Matthew 7

We bidi osola subo kolesaga po

(Luk 6:37-38, 41-42)

“Te Godigo dage osola suidali weyu tama dagego gasa we bidi dabe augwali osola subo kolesaga ebo tagaliąo. Te dagego gasa we bidigo ebo kolesaga osola sulama, tama augwali sęgę mabo tiwai gilama tama God agai dagego ebo kolesaga me osola sulama, tama dagebolo sęgę mawaibao. Dagego augwali usu sali usu nigo naga te Godigo dage me usu saibao. Tama tibaso, magi baso nago naga amago gedude elalubo dwasianu pobele bage suai, tiali goli nago naga gedude elalubo genuai pobele bage te bǫ nami tiwai te nago magi baso subo meniwe? Nago naga gedude te genuai bǫ nami tiwai elalubo pobele bage sela sasiąbadi, te nago magi baso naga amabolo te po weyu, ‘Ama, nago gedude elalubo pobele bage eno sela sąwaio,’ te po obawe? Nage ugwadu homugo naga po wabo bidi, hasia bolo nago naga gedude te bǫ nami tiwai elalubo pobele bage guda sąyao. Tama tiyu nosali te nago gedu bugagia wiegi yai ebaso, teda naga amago gedude elalubo pobele bage sela sąyu guda sabode nage usu yaibao,” Jisasgo te po wai.

“Te dagego te wiegi yai tedali nai te yowi dabebolo magimio. Tama dagego duga wiegi wiegi yai au yabo bis tiwai nai dabe te kibu dabeba sągimio. Tiyu augwaligo te nai dabe sągągo agalama, tama augwali ma begeleyu, tama dage ma tuidali weyu tama egimio,” Jisasgo te po wai.

Gedu haluasa po bomo ebo sę ebo bidi po

(Luk 11:9-13)

“Te dagego gedu haluasa po Godiba hanalu da, teda agai dagego te hanalubo nai te dageba mawaibao. Dagego te nai gegebo sę idu da, teda te nai dagego sueibao. Tama dagego be tuba eliyu bebego wedu da, teda Godigo dagebolo te tų dalaibao. Magi baso meni. Tigidali bidigo gedu haluasa po God dali hanalubo po wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tuba elibo bidi, teda Godigo te bidibolo tų dalobo dao. Tama dage tomode bidi me deligo waigo aga ayabolo te tubo nai bret mao po obaso da, teda aga ayago te waibolo te masigi me deli sela mawaibawe? Menio. 10 Tama te nasi ebo waigo aga ayabolo te sųgų mao po obadi da, teda aga ayago te waibolo te dwai hasamani me deli sela mawaibawe? Te me menio. 11 Tama dage dwai bidi dabe bidibo digi, tama dagego te wiegi yai nai duga wai dabeba mabo koneyu da, teda dagego mu koneiąo, te duga Aya dagalude bidibo bidi agai wiegi yai nai te agabolo gedu haluasa po wabo bidi dabebolo mu mawaibao. Tama agai te dwagi yai nai mabo kolesagago dagego mabo kolesaga aiyaba mu elaluaibao,” wali.

12 “Te dagego homugo te gasa we bidi dabe augwaligo dagebolo yabo dwagi yai kolesaga tiwai gilama tama dagego me augwali dali te tiwai dwagi yai kolesaga naga iyąo. Te Mosesgo polobadu asęani bomo yai po tigidali me, te Godigo po pusali profet bidi dabego pusali po tigidali me, te po tigidali te page deli naga elalubao, te eno megi tama wali po naga dao,” Jisasgo te po wai.

Bidibo ula sabo tų dwasianu dao

(Luk 13:24)

13 “Te da we bidi pabo tų si elalubao. Tama te sunumi me deli te dwasianu dao. Tama gasa sunumi te genuai dao, tama tedu pelama tama te pabo tų da te pobele bage meniama te noma yai dao. We bidi augwali te genuai tųdu pabo te hagela isiąwai tų dao. Tama we bidi umabo te tųdu wali pabo dao. Tiali goli te genuai tų te dwai sia elalubo madigi haga yabo tųba pabo tų dao. Tama tibaso, dage te gasa dwasianu sunumidu pao. 14 Tama te dwasianu sunumi tomodu pelama, tama te dwasianu tųdu peyu, tama te bidibo ula elalubo madigi painogo te sinabo sę ebo dao. Tama deli deli we bidigo naga te tų gegelama subo dao,” Jisasgo te po wai.

Dagego te ili po ola mabo bage bugagia suao

(Luk 6:43-44; 13:25-27)

15 “Te tibo lotu po ola mabo po wabo bage augwali asidali weyu bugagia suao. Augwali dageba asobo si, te augwali kibu sipsip tiwai asaibao, te augwali dwai sę isąbo bage tiwai augwaligo dagede dwai sę yabo homu geme dualama, tama augwali dageba asaibao. Tiali goli, augwaligo homude dage mu dolabo homu kolesaga ebo dao, te dwai bulu yowi tiwai dao. 16 Tama augwaligo ebo dwai sę te dagego subo si da, te dagego augwaligo ebo homu kolesaga te kuna mu koneaibao. Te sesani yai bono te pusu ebo wain bono du dabe dali gelama walogobeo. Me te sesani yai bono elalubo digi te ni kaya du elalubaso te bidi dabego sabo dawe? Menio. 17 Tama te bugagia pua pai holai nigo aga dwagi yai du naga walobo dao. Me ma te ni bugagia holosiąwai haganawai nigo dwai du naga walobo dao. 18 Tama te bugagia pua pai holai nigo te dwai nedu du dabe walogobeo, te menio. Me ma, te bugagia holosiąwai haganawai nigo wiegi yai nedu du dabe me walobo menio, usu egobeo. 19 Tama te wiegi yai du walosiąwai ni te augwaligo gelama, tama siaba ulubo dao. 20 Tama tibaso, dagego te tibo lotu po ola mabo po wabo bage te dagego augwaligo ebo sę subo si da, te augwali dagego kuna mu koneaibao,” Jisasgo te po wai.

21 Te Jisas agai po me weyu, te po wai, “Te we bidi hauwa augwaligo enade bomonama te po wabo dao, ‘Dago Genuai Bidi, dago Genuai Bidi,’ te po augwaligo enade wabo dao. Tiali goli, augwali tigidali te Godigo we bidi tonalubo madi te dagalu tomoba pogobeo. Tigidali menio, meba we bidi naga tomoba paibao. Eno Aya aga bidibo madi dagalude bidibo dao. Tama niwai bidi agai eno Ayago homu wali pabo bidi, te bidi naga te Godigo we bidi tonalubo madi tomoba bidigi paibao. 22 Tama te genuai sogo asobo si, te we bidi hauwa augwaligo enabolo te po waibao, ‘Genuai Bidi, Genuai Bidio, dago nago nogi weyu, dago Godigo po te we bidibolo pusai dao. Nago nogigo bomogo dago te dwai haubo te we bidide elaluali sela sąwai dao, dago te we bidi noma sabo bomai sę yai dao,’ augwaligo te po waibao. 23 Tama te sogo eno augwalibolo te po hanilama waibao, ‘Eno dage munu me konebeo. Dage dwai sę ebo bage, dage piąo,’ eno te po te sogo waibao,” Jisasgo te po wai.

Be sę ebo kolesaga si po wai

(Luk 6:47-49)

24 “Te niwai bidi agai eno e wabo po odama wali pabo bidi, teda te bidi me deli agai homu te wiegi yai tiwai elalubo bidi, tama agai be te masigi daide ugwadu sę yai dao, te be bugagia dąų omainogo yai. 25 Tama tulubage tuluyu, tama wę bomo yai asiyu, tama bomo yai wali pedaliyu, tama te nai dabego te be degelainogo yai dao. Tiali goli te be aga degebeo. Magi basowe, te be dąų mu walali te tǫ tomode genuai genuai masigiba dąų mu wai dao. 26 Tiali goli bidigo eno e po wabo odama wali pisąwani bidi, aga te esela pabo bidi tiwai elama, tama agai be tǫ dąų wasiąma, te kemi tǫde naga ugwadu sę yai dao. 27 Tama tulubage tuluyu, te wę bomo yai asiyu, tama bomai wali pedaliyu, tama te nai dabego te be degelama, tama te be degelai dao. Te be dolama mu degai dao,” Jisasgo te po wai.

28 Jisasgo wali po silagasu te po wali, tama tibaso te genuai we bidi hani augwaligo te po odama, augwali te pode noma mu siyu bidai dao. 29 Magi basowe, agai augwali ola mani po te augwaligo bomo yai po page koneai bidi dabego po wabo tiwai wabeo. Menio. Agai augwali po ola mani te po page bidi, bomo elalubo bidi bidiyu, te po augwalibolo ola mani.

Copyright information for `MPS