a[2 Kin 25:8-10; 2 Sto 36:19; Jer 52:12-14]

Nehemiah 2

Nehemia te Jerusalemba pali

Te polua me si me si bidama, tama me sogo side deli te king Artaserksis te nai tudubadi, tama eno wain agaba sesali. Tigidali sogo eno te sę iduali te bugai haliga elama, te eno gesabidi wiegi yai pisigina pelama te sę iduali. Tiali goli, te sogode digi eno haliga sęgę mu elama, tama eno gesabidi te wiegi yai me pisigina pabeo. Tama tibaso, kingo enaba hanalu wali, “Magi baso nage wiegi yai pemene isąbawe? Nage gasi da meni yai, tiali goli nage magi nai me delide haliga sęgę elalubao,” wali. Eno te po odoyu, te ena noma salio, tama eno te tiwai po kingba wali, “King o, nage te bugagia sesabi elama bidagameo. Awe, ena haliga sęgę mu ebao, magi baso meni, te augwaligo eno wąį nǫų dabe pubulali madi te hanu taun te dolali elalubao, tama siago te bobegelali masigi obode te nigo nigali sunumi me ulali elalubo dao.” Eno te po wai. a 

Kingo te po odolama, tama enabolo te tiwai po hanalu wai, “Megi nago te eno magi sę me deli emainu, agawe?”

Tialima, eno dagalude Godiba gedu haluasa po polo olama,
tama eno kingba te tiwai po wali, “King, te nago enaba bugai haliga ebaso da, teda eno nageba te magi nai po me deli hanalu wainu ebao. Te e tama tiwai. Te nago homu usu eyu da, te nago ena te ena wąį nǫų dabego taun te Juda tǫba pomainu ebaso da, te eno ena abagi dabe dali te taun ma geseliyu nigibo sę tau sigi pomainu ilao,” po wali.

Te eno king dali po mibadi, te aga we te kwin aga pąde dugulaluali. Kingo eno te po odolama, tama po wei ponoyu, te tiwai po wali, “Usu da, nage pao,” wali. “Tiali goli, nage te pęwadage sogo, ma te bobage sogo te Judade bidaibawe? Tama nisu sogo nage ma asaibawe?” Tialima, eno homude elaluali te ena ma asabo sogo po agaba pusalio. Tama eno te kingba hanalu, te eno te wę Yufretis u pedai badu bidibo gavman bidiba maiabo pas meba mao wali. Te pas dabego augwaliba weyu, te ena augwaligo provinsdu peyu, te Juda tǫ pedaiba pabo usu da wabo pas mao, wai dao. Tama eno kingba te Asapba te pas me deli asęa mao po hanalu wai, te bidigo te kingo ni sili elalubo tǫ tonaluai. Te pasgo agabolo te po waliyu, te pedabo ni nami meba enabolo mao wabo po pas asęani. Te ni nami dabego te Jerusalem moni masigi obode sunumi dabe nigiyu, te ami bidi dabego te Godigo tempel be tonalu bidabo bomai be obo sunumi, te me nigabo ni nami sao po wabo pas asęai, tama eno be sę yabo ni nami me dao. Tama God ena dali bidiyu, tama ena tau sai, tama tialima, kingo eno te hanalu wali nai dabede te usu da po walio. Tama kingo te ami ofisa meba nigilibadi, te hosde dugulasa pabo ami hani me deli nigilibadi elama, tama agai te augwali ena dali tagala palama, te ena tonalua pomainu yalio. Tama da hogodama, digibulu mu peyu, te wę Yufretis u pedai badu palio. Tama da pelama, te tǫ pedai gavman bidi dabe bidibo madiba sabolama, tama eno te kingo pas augwaliba mena mena pai. 10 Tiali goli, Senbalat, te Bethoron taun bidi, me Tobia, te Amon provins ofisa bidi me deli, augwali sigo odali, ena aselama, te Israel we bidi augwali bugagia bidimainogo eyu, ena augwali tau sainu asali po odali. Tama tibaso, augwali sigo haliga dwai mu yalio.

11 Ena te Jerusalemba sabolama, tialima ena te sela sogo olo toma neyu bidali, 12 tama eno te bidi me deliba te Godigo enaba homu hodolama, te Jerusalemde yao wali sę po me wabeo. Tialima, te be hulia sabo tomo ebo tonaluama, tama ena dali te dwasianu hani bidi naga te hogodama, te da bidali pesage tagalama, tama da pelama, te taun moni masigi obo dolali te sugi pali. Ena naga te donkide dualasa pali, tama te gasa bidi dabe sągągo tǫdu pali. Tama dago te taun te giliga dega sigilubo te obo bagulali sunumi elalubo te badu te taga peyu pali, te augwaligo nogi eyu te Odogo Pesage Badu Sunumi dao wali. Tama da te saut badu peyu, tama te ulu wę edelama pai, augwaligo te nogi weyu, Te Genuai Hasamanigo Ulu Wę da wali, tama da te pelama, te nogi augwaligo te Pobele Bage Sela Sąbo Sunumi te badu sabolai. Te da pedalobo sogo, eno te taun obo aluali te bugagia tonalua pelama, te siago dali obo sunumi te bugagia susa palio. 14 Nosali da begelama, te not badu te Ulu Wę Sunumi elalubo badu pai, tama te Kingo Dwasianu Sigi Aį Elalubo te badu palio. Te badu, te sunumi paliai baso, tama ena te dugulalubo donki te ma pabo usu me ebeo. 15 Tama da te Kidron odogoba dulama, tama eno te obo bugagia osa yali. Tama nosali da tede ma begelama, tama da te asali sunumiba ma sabolagasali. Tama da te buluba soali, te sunumiba da ma pedalubo sogo da, te Odogo Pesage Sunumi dao, tialima da te taun tomoba ma pelawali. 16 Te Jerusalem ofisa bidi me deligo eno te hulide yali sę dabe me konesiąwai, magi baso meni, eno te hanu ma geselebo sę yabo Juda dabe me delibolo te sęde po me wasiąwai. Eno te pris dabeba, me te tobolu bidi dabeba, me te ofisa dabebolo, me te gasa bidi dabebolo dago te sę yaibao po te tigidali Juda dabeba me wasiąwai dao.

17 Tiali goli, megi da, eno te augwali sisinama, tama eno te po wali, “Dagego koneani, te Jerusalem obo sunumi te dolali elalubao, tama te taun tigidali badu me dolalio. Tama dago sęgę genuai mu elalubao. Tialima, megi da, dago te taun masigi obo ma niginao, tama te kolesagade dago te da dali posobo po wabo bidi dabego pedauwali paniaibao,” wali. 18 Tama eno augwaliba te Godigo ena tau siyu yali sę po walali. Tama eno augwaliba te kingo wali po tigidali walio. Tialima, augwaligo te tiwai po wei ponani, “Wiegi yai mu dao. Da hogodama, te sę inao.” Augwa te po ola silama da, tama augwali pelama, te sę yabo nai dabe dodola mugi pali.

19 Tiali goli, Senbalat, me Tobia, me Gesem, te Arap hani bidi me deli, te bagego dago te sę yabo po odali. Tama tibaso, te augwali aselama, tama dabolo te posobo po weyu, te gisugu mayu yalio. Augwaligo te tiwai po wai, “Dagego magi yainu ebawe? Dagego te taun obo ma nigainu eba, agawe? Dagego homugo te dagego tama tiwai elama, tama dage te bomai bage pedelama, tama dagego te king dali hwįaiba weyu teba, agawe?”

20 Tialima, eno augwaliba te tiwai po wei ponani, “Te dagalude Godigo da tau saibao,” wali. “Da te aga sę bidi da, tama tibaso dago te sę yaibao. Tiali goli, te taun Jerusalem te dagego taun menio. Polobadu dagego wąį nǫų dabe te taunde me bidibeo. Tama tibaso, te sę te dagego sę meni dao,” eno te po wali.

Copyright information for `MPS