a[Hi 3:2]
b[Nam 5:2-3]

Numbers 12

Miriam de Aron sigo Mosesbolo dwai po wali

Te Mosesgo te bulu Itiopia we me sai. Tama augwali te Haserotde bidibadi yaide, Miriam de Aron sigo Mosesgo te sę yali pode dwai po wali. Tama augwali sigo e tiwai po wali, “Te Genuai Bidigo te we bidibolo po te Mosesgo pedauwalidu naga mabo yali bogo? Meni ma, agai te po da sigo penanedu me mabo dao,” wali. Tama Genuai Bidigo augwali sigo te wabo po odali. Te bidi Moses agai aga nogi aga aiyaba dualabo bidi mu dao. Te kolesagade agai te gasa bidi dabe tigidali aiyaba elaluai dao. Te augwali sigo po ola silibode, polo tama Genuai Bidigo Moses me Aron me Miriambolo e tama po walali, “Dage sela eno ugwa beba asomainu homu ebao.” Tama te bage augwali hogodama pali. Augwali polo doligi pai madi te Genuai Bidi te pǫde bidai aiyaba dulali, tama te pǫ te ugwa be sunumide dolaluali. Tama Genuai Bidigo i weyu e tama po wali, “Aron de Miriam si, dage si asiąo,” wali. Augwali sigo odama, tama augwali si pąbanu gana pali. Tama Genuai Bidigo po wali, “Dage sigo eno po odiąo. Te profet bidi me dage Israel dabe tomode bidibo sogo, eno ena digi agaba te nade ola mabo tiwai elama, eno aga dali nade po wabo dao. Tiali goli, eno sę bidi Moses te profet bidi dabe tiwai menio. Eno aga dali gasa kolesaga mu ebo dao. Eno agabolo eno sę sese agabolo menama, tama eno koneani, agai eno sę sese yaibao. a  Tialima, eno aga dali po wabo te bidigo aga abagi dali po wabo tiwai wabo dao. Tama eno po agabolo hanilama mu wabo dao, eno po begelama, po digi pogo me wabo menio. Te me agai ena dwasianu suai dao. Tama dage sigo magi baso mu Moses dali dwai po wabo wi ebewe? Te eno sę bidi dali.” Te po wai. Tama Genuai Bidigo augwali si dali wado po genuai mu elama, augwali si taga peyu pali.

10 Te pǫgo Godigo ugwa be taga pali, tama polo tama te oiyabe gasigo Miriamgo tigi halua sagaselama, tama tigi wali tedela mu yali. Tama nosali Aron begelama suali, te gasigo Miriam mesega sai suali. 11 Tama Arongo Mosesbolo e tama po walali, “Genuai bidi, da sigo dwai kolesaga elama, dwai sęgę salio. Nago dadi si hobede elama, tama nago da sigo dwai kolesaga yalide sęgę tolomainu igio, te dwai kolesagade. 12 Tama nago te Miriam te wego wai tabide isai ame nabo wai tigi wali dadagala pabo tiwai ebadi sula tagalamuo. Agai tigi wali polo dagala palio,” wali.

13 Tialima, Mosesgo Genuai Bidiba e tama po i walio, “Godio, eno homugo nago Miriam ma usu ilao,” wali. 14 Te Genuai Bidigo te po wei ponoyu, e tiwai po wali, “Te Miriam aga ayago aga gesabidide pesą sąyu da, te aga hale Sarere delide tama egowe? Waa? Te tama tiali goli, Miriam Sarere deli te bidi bidibo pesage bulu badu bolo bidimainao. Tama nosali aga be nani tomoba ma asomainao,” wali. b  15 Tialima, augwaligo Miriam te be nani bulu badu bolo tagala palali, te Sarere delide tiali. Tama te we bidi gasaba me hogodasa pabeo. Menio, augwaligo Miriambolo ma asobo tonaluyu bolo yali. 16 Tama nosali augwaligo te bulu Haserot taga pelama, tama Paran bulugo nai meni yai buluba ugwa be nani nigigi pelama, bidigi pali.

Copyright information for `MPS