a[Nam 33:40]
c[Lo 2:1]
d[1 Ko 10:9]
e[2 Kin 18:4; Jo 3:14]
f[Jer 48:45-46]

Numbers 21

Te Israel dabego Kenan dabe dali hwįnama, Kenan dabe augwali aiyaba elaluali

Te hanu Arat tuni bidi te Kenan hani bidi, tama agai hanu te Kenan bulude saut badu elalubo. Te tuni bidigo te Israel dabe te Atarim bulu sunumidu asobo po odali. Tama tialima, te tuni bidi aga hani ami bidi dabe dali augwali te Israel dabe dali hwįgi pali. Tama augwaligo Israel hani bidi meba toulama, odasa pali. a  Tialima, Israel dabe augwaligo Genuai Bidibolo bomo yai po deli dąų walali. Augwaligo e tama po wali, “Te nago dago te bidi hani dolomainogo sula tagaliyu da, teda dago te we bidi sese me, augwaligo hanu me, dago dola silama, te ofa nai tiwai nagebolo mabo tiwai me yaibao,” te po wai. Tama te Genuai Bidigo augwaligo po odama, tama augwali tau selama, te Kenan dabe te Arat hanu dolomainogo yali. Tialima, te Israel dabego te Kenan dabe augwa hanu dabe dali mu dolama tagalali. Tama augwaligo te bulu Horma polali.
21:3Te Hibru pogo te nogi Horma, te pąde te ‘Mu dolai’ wabo, te po page tiwai dao.


Gula mani augwaligo brasgo nigali

Te Israel dabe augwaligo te Hor bulu du tagalama, te Akaba bulu badu te Retsi mama tamu wędu pabo sunumidu pali. Magi baso meni, augwaligo Idom tǫ taga painogo. Augwali pali pali dobaso, augwali sunumide hagela mu yali. c  Tama augwaligo Godibolo me Moses dali augwaligo wado po wali. Augwaligo e tama po wali, “Magi baso dagego da Isipde oda selama, e nai meni yai buluba odasa asaliwe? Da te nai meni yai kemi sane bulude isimainu yaliwe? Te bulude nai mu menio. Tama dago te dwai nai mana da, dago hagela mu yalio,” te po wai.

Augwaligo te wado po wabo Genuai Bidigo odali. Tama Genuai Bidigo dwai gula mani dabe taga palali, te Israel dabeba, tama te gula mani dabego te we bidi hauwa gąǫ kelama isilali. d  Tama te we bidi te Moses pageba aselama, e tama po wali, “Dago sęgę polo salio, te dago Genuai Bidi dali, me nage dali wado po walide. Megi nago Genuai Bidibolo gedu haluasa po wao, agai te gula mani sela sąmainao,” wali. Tama Mosesgo te we bidi tau somainogo Genuai Bidibolo gedu haluasa po wali.

Genuai Bidigo te gedu haluasa po wabo odama, tama agai Mosesbolo e tama po wali, “Nago te dwai gula manigo noma me nigilama, tama moni bobobage pos nide walao. Tama te mena we bidi augwali te gula manigo gąǫ kelali da, augwaligo te gula mani nomaba tonobode augwali me isigobeo. Menio, augwali usu ma yaibao,” te po wai. Tama Mosesgo te brasgo gula mani me nigilama, tama bobobage ni posde walali. Tama te gula manigo te we bidi gąǫ kelali da, teda augwaligo te bras gula maniba tonobo si da, augwali usu ma yali. e 

Te Israel dabe augwali te bulu du Hor taga pelama, augwali te bulu Moapba saboligi pali

10 Te Israel dabe augwali te Hor bulu du taga pelama, tama te bulu Obotde bidabo pesage nigali. 11 Nosali augwali te bulu Obot taga pelama, Abarimba bidabo pesage nigigi pali. Te bulu Abarim te dolama mu elaluali. Abarim te Moap bulude giliga asobo badu elaluali, te nai meni yai bulude elaluali. 12 Tama nosali augwaligo te pesage taga pelama, augwali te Seret odogo buluba pesage nigigi pali. 13 Tama nosali augwaligo te wę Arnon nogegi pelama, te Arnon wę not badu augwaligo pesage nigigi pali, te nai meni yai bulude. Te nai meni yai bulu te Amor dabego buluba pai elaluali. Tama te wę Arnonde dąį yai elaluali. 14 Te po pusubo sęgę yaigo te Genuai Bidigo hwįani po te bulude tama naga po pusali. Agai te po wabo, “Te bulu Wahep te Sufa badu me odogo bulu, me Arnon wę me te odogo bulu te hanu Arba usu nigi pelama, 15 me te bulu Moap badu dąį igi pali badu usu nigi pali,” te bukude te po tama elalubao. 16 Nosali augwaligo te bulu tagalama, tama augwali te bulu me augwaligo tǫ dedage wę wabo te buluba pali. Te bulude te ulu wę genuai deli elaluali. Tama te węde Genuai Bidigo Mosesbolo e tama po wali, “Te we bidi i olama, tama augwali sisinagasobo si, eno augwali wę mawaibao,” wali. 17 Tama te sogo te Israel dabego te balia po wali,

“Ulu wę, nago wę pedalama soao.
Tama dago te sulama, tama dago wiegi yai homu
pemene ebo balia po waibao.
18 Te tuni bidi dabe, me tobolu bidi dabe, augwaligo
te tobolu bidigo dono me biliyu,
sabilibo dono me nogo tolasali,
tama augwaligo te ulu wę digawali.”

Tama nosali te Israel dabe augwaligo te nai meni yai bulu taga pelama, augwali te bulu Matanaba pali.
19 Tama augwali te bulu Matana taga pelama, te bulu Nahalielba pali. Tama nosali augwali te bulu Nahaliel taga pelama, augwali te bulu Bamotba pali. 20 Tama augwali te bulu Bamot tagalama, augwali te bulu Moap te bulu du Pisga pąba pali. Te bulu dudu te bidi dabego te nai meni yai buluba tonobo dao.

Te Israel dabe augwaligo te tuni bidi Sihon, me tuni bidi Ok si aiyaba elaluali

(Bom 2:26-3:11)

21 Nosali te Israel dabego te Amor tuni bidibolo po olama tolali. Augwaligo te po olama tolali, 22 “Dago homugo nago da nago buludu somainogo sula tagalao. Dago te sunumi me tagalama, da dagego giba me o wain giba me bogea peyu me egobeo. Tama me dagego ulu wę dabe me tuyu me egobeo. Da te moni sunumide pedu genama, nago bulu taga pabo si, tama usu naibao,” te po ola tolali.

23 Tiali goli, te tuni bidi Sihongo te Israel dabe agai buludu soao homu ebeo. Tama agai aga ami bidi dabe sisinama, tama augwali te hanu Jahasba te nai meni yai buluba pelama, te Israel dabe dali hwįgi pali. 24 Tiali goli, Israel dabego te Amor hani hauwa me elama, augwaligo tǫ sali. Te wę Arnondu gagalama, te not badu elalubo wę Jabokba usu nigi pali. Teda te bulu Amongo bulu dąį dao. Tama te Amon hanigo bomai ami bagego te bulu dąį tonalubo dao. 25 Tama te Israel dabego te hanu Hesbon me, te meba pąde elaluali hanu dabe me, te Amor dabego hanu dabe sese tama sali, tama augwali te hanu dabede bidali. 26 Hesbon te Amor tuni bidigo wiegi yai hanu mu dao. Polobadu te Sihongo te Moap tuni bidi dali hwįnama, tama agai tǫ tigidali sese tama sai dao, te wę Arnonba usu nigi pai dao. 27 Te tama tiali pagede te tęąbi po wabo bidi dabego te tęąbi po e tama wai dao,

“Dage Hesbonba asao, tuni bidi Sihongo hanuba.
Dago homugo augwaligo te hanu Hesbon ma nigimaina,
tama aga bomo elama bidimainao.
28 Polobadu te Sihongo ami bidi dabego
te hanu taga pelama, tama hanu Arba bomo elama
hwįgi pai, te bulu Moapba.
Te kala isi dabo tiwai yali.
Tama te ami bidi dabego hanu dolama, tama tobolu bidi
dabe mu silali,
te Arnon wę sesegede te bulu dude bidali bidi dabe.
29 Moap we bidi dabe, hobede mu dao.
Dage moni sęgę mu saibao.
Te we bidi dagego te tibo god Kemosba
lotu po wabo dao, dage mu tama dolaibao.
Dagego te god te we bidi dabe aga
wali asomainogo ebo god aga bulu taga pelama,
te wau bilibo bidi tiwai bilaibao.
Tama agai te Amor tuni bidigo dagego
we dabe pagea somainu ilaio,
tama augwaligo agai kalabus sę yali. f 
30 Tiali goli, megi da, dago augwali
polo enani dao, te Hesbon hani bidi me,
te hanu Dibon hani bidi me.
Dago augwali mu dolama, taga pelama,
te hanu Nofaba usu nigi pali, te hanu Medeba pąba.”
Te tęąbi po wabo bagego tama tęąbi po wai dao.

31 Tiali tama, te Israel dabego te Amor dabego hanu dabe selama, tama augwali te hanude bidali. 32 Tama nosali Mosesgo bidi dabe te hanu Jaserba tagala palama, tama te hanu dolabo sunumi wiegi yai gegali. Tama te Israel dabego te hanu Jaser dali hwįnama, tama augwaligo te hanu me, te hanu pąde elaluali bulu dabe tama sali. Tama augwaligo te Amor dabe te bulude bidali bidi dabe sela sąyani. 33 Tama nosali te Israel dabe ma begelama, tama begasa te bulu Basanba pabo sunumi badu begasa pali. Augwali saboligi pabo si, te Ok, te Basan bulu tuni bidi, aga ami bidi dabe dali, augwaligo te Israel dabe dali te hanu Edreiba wąbi hwįagasali. 34 Tama Genuai Bidigo Mosesbolo te po walali, “Dage te tuni bidi Okde wi igimio. Magi baso meni. Eno dage tau selama, tama dagego aga aiyaba elaluaibao, tama dagego agai tǫ saibao. Dagego aga te Amor tuni bidi dolali yali gilama tiwai tama yao, te aga polobadu te Hesbon bulude tuni bidi bidali bidi,” te po wai.

35 Tialima, Israel dabe augwaligo te po wali pelama, augwaligo tuni bidi Ok, me aga ogwa dabe, me aga hani bidi dabe sese ela silali. Tama deli me bidibeo. Tama nosali Israel dabego augwaligo tǫ sali.

Copyright information for `MPS