Numbers 25

Te Israel dabe augwali te Sitim bulude bidiyu, te Kenan tǫ sabo kegaluali

(Dąį 25-36)

Te Israel dabego tibo god Balba lotu po wali

Te Israel dabe augwali augwa pesage te odogo bulu, te bulu Sitim tede bidiyu, te Israel dabego te Moap we dabe te bulude bidali we dabe dali penane sę ebo gagalali. Tama te we dabego te Israel dabe te Moap dabego te tibo godibolo ofa elama, lotu po wabo pesageba odasa pali. Tama te Israel dabego te ofa yali nai tulama, tama tibo godiba lotu po wali. Tama te kolesagago te Israel dabego tibo god Bal wali pali, te Peor bulu dabego tibo god. Tama tibaso, Genuai Bidigo augwali dali sębę yali. Tama agai Mosesbolo te po wali, “Dage Israel dabego duga tobolu bidi dabe selama, tama te dwai sę yali bidi dabe selama, te niba walama, bidi gesabidide ela muao, te we bidi dabego augwali suaibao. Dagego te tama tiyu da, teda eno te tigidali we bidi dabe dali moni sębę me ma egobeo,” wali.

Tialima, Mosesgo Israel dabe tobolu bidi dabe dali te po wali, “Dage deli deligo duga hani bidi te Peor bulugo tibo god Balba lotu po wabo bidi ela muao,” wali.

Moses te we bidi dabe dali augwali te Godigo ugwa be sunumide bidiyu, gela odubadi yaide, tama augwaligo suali, te Israel hani bidi me deligo te Midian we me deli odasa, aga ugwa be tomoba odasa soabo suali. Tama te Finias, te pris bidi Arongo ogwa Eleasargo ogwago augwali si suali. Tialima, agai te we bidi taga pelama, tama polo pelama, aga sesemone sigi pali. Tama aga te we bidi si wali pelama, te ugwa be tomoba tula pelama, te we de bidi si hodobo agai sesemonego enani. Genuai Bidigo dwai gasi me te Israel we bidibolo menama, tama 24,000 we bidi te gasi selama isali. Tiali goli, Finiasgo te we de bidi si ela mubo si, te gasi sia sali.

10 Tialima, Genuai Bidigo Mosesbolo te po wali, 11 “Te Finiasgo te si elalio, tama tibaso eno te Israel we bidi dali sębę menio. Magi baso meni. Agai homugo te Israel dabego te tibo godiba lotu wabo hagela mu yali. Agai bomogo augwali ena deliba naga lotu omainao olama bomo yali dao, te eno ena homugo emainao wali gilama tama. Tama tialima, eno tigidali we bidi mu dolai menio. 12 Tama tibaso, megi nago agabolo te po wao, eno aga dali megi mu kęą pobao, te ena aga abagi tigidali sogo bidaibao. 13 Tama tialima, aga aga wąį wai dabe augwali pris sę sesemane sogo elalua pidu mu elalua paibao. Magi baso meni. Agai homugo te Israel dabe ena hasegelama, te tibo godiba lotu wabo hagela mu yalio. Tama agai te we bidi dabego sęgę sela sąyabo sę me deli yalio,” te po wai.

14 Simri te Finiasgo te Midian we dali hodobo elama isilali Israel bidi dao. Simri te Salugo ogwa dao. Tama te Salu te Simeon hani bugai mebago tobolu bidi dao. 15 Tama te Midian wego nogi te Kosbi dao, tama te Kosbi aga aya nogi te Sur dao. Tama te Sur te Midian hani mego tobolu bidi dao.

16 Tama Genuai Bidigo Mosesbolo te po wali, 17 “Dage te Midian dabe dali hwįgi pelama, augwali doligi piąo. 18 Magi baso meni. Augwaligo te Peorde yali te ili po walide augwaligo dage dali dwai kolesaga yai dao. Me te Kosbigo yali dwai kolesagago me dage dolai dao. Kosbi te Midian bulu we dao, te Finiasgo te ela muani we dao, te moni gasi me deli te Israel dabede ebaso elali we dao, te Peorde.” Genuai Bidigo te po wai.

Copyright information for `MPS