a[Nam 36:2]
b[Lo 3:23-27; 32:48-52]
c[1 Kin 22:17; Ese 34: 5; Mt 9:36; Mk 6:34]
d[Sai 24:13]
e[Sai 28:30; 1 Sml 14:41; 28:6]
f[Lo 31:23]

Numbers 27

Te Selofehatgo wegi manigo tǫ sali

Te Selofehat te Hefergo ogwa dao, te Hefer te Gileatgo ogwa dao, tama te Gileat te Makirgo ogwa da, tama te Makir te Manasego ogwa dao, tama te Manase te Josepgo ogwa dao. Tialima, Selofehatgo we selama, wegi a naga ame nani. Augwaligo nogi Mala, me Noa, me Hokla, me Milka, me Tirsa dao. Tama augwali te hani wegi mani augwali te Godigo name ugwa be sunumi pąba dolalugi pali, te Moses, me Eleasar, me te tobolu bidi dabe, me te Israel hani geduba doligi pali. Tama te wegi manigo te po wali, “Dago aya te nai meni yai kemi sane bulude isai dao. Aga te Kora wali pelama, te Genuai Bidi dali hagoma yali bidi hani me deli menio. Aga digi sęgę selama isai dao. Tiali goli, agai ogwa menio. Te mu tama. Agai ogwa menio te agai nogi sabo. Tiali goli, magi baso ayago nogi da Israel tomode hagagowe? Tama tialima, dago homugo nago dabolo te ayago hanigo tǫ da mao,” wali.

Tiali, Mosesgo augwaligo po selasa Genuai Bidiba selasa pali. Tama Genuai Bidigo Mosesbolo te po wali, “Te Selofehatgo wegi manigo te po te dolo dao. Tama tialima, nago te wegi manibolo augwa ayago hanigo sabo tǫ meba mao. Augwaligo agai tǫ somainogo sula tagalao. a  Tama eno homugo nago Israel dabebolo te po wao, ‘Te bidigo aga ogwa meniama, agai wegi naga elalubaso da, tama nosali aga isali da, teda aga wegi manigo agai doado bage dabe somainao. Ma, te bidigo wegi mani me meniama isibaso da, teda te bidi aga ama sologo te bidigo nai dabe somainao. 10 Ma, agai ama mu meni yai baso da, teda te bidi aga ayago amago te doado bage dabe somainao. 11 Ma, aga ayago ama mu meni yai baso da, teda te bidi aga deli hani wąįgo somainao, te bidigo doado bage. Te tigidali te Israel dabego te bomai po wali pomainao. Te Genuai Bidi eno nagebolo megi wabo te po wali pomainogo yao,’” te po wai.

Godigo Josuago te Moses hasegelemainogo sa muani

(Bom 31:1-8)

12 Genuai Bidigo Mosesbolo te po wali, “Nage te bulu du Abarimba pelama, tama nago eno te Israel dabebolo mawainogo ebo te tǫba nago tonao. 13 Nago bolo suao, tama nosali nage isaibao. Te naga ama Aron isali tiwai nage me isaibao. 14 Magi baso meni. Dage sigo eno po te nai meni yai bulu te augwaligo te Sen wabo bulude sela sąwai dao. Te we bidigo enabolo te po hauwa wali te bulu Meribade. Nago augwalibolo eno genuai bomo ola mawai menio,” tama wali. Te ulu wę te nai meni yai kemi sane bulu Sende elalubao. b 

15 Tama Mosesgo Genuai Bidibolo te po wali, 16 “God, Genuai Bidi, nage deli naga nage te tigidali we bidigo bidibo ula page bidi dao. Tama tialima, eno nagebolo e we bidi tonaluabo bidi me deli sa muao po nagebolo hanalu obao. 17 Te augwali bugagia bidimainogo tau siyu, me wąbi hwįbode augwali bugagia tonaluyu yabo. Tama naga hani te sipsip kibu aga tolalubo bidi meni yai tiwai bidigobeo,” Mosesgo te po wali. c 

18 Tama Genuai Bidigo Mosesbolo te po wali, “Josua te Nungo ogwa, aga dali te eno Mobo Bidi mu bidibao, tama aga eno sę ebo usu yaibao. Tama tialima, eno homugo nago aga oda sigi pelama asao. Tama aga te pris Eleasar, me te Israel we bidi si pageba odasa pelama, doligi pao. Tama augwaligo gedude nago nogo agai tobolude munama, tama te po wao, ‘Te Josuago ena hasegelaibao,’ po wao. Tama nago sę agabolo mao. d  20 Tama nago namba dage me, nago bomo me agabolo mao, te we bidi tigidaligo agai po wali peyu emainogo. 21 Tiali goli, Josua te Eleasar pageba pelama, tama eno homu kolesaga te tigidali nai dabede koneainogo yaibao, nosali. Tama Eleasargo te prisgo gudubo te name ugwa baude daganalubo te masigi si te dwasianu paus sao, te eno homu kolesaga konea sainogo. Tama Eleasargo te Josuabolo me te we bidi sesebolo te tigidali te sę ela silimainogo,” wali. e 

22 Tialima, te Mosesgo te Genuai Bidigo wali po tiwai tama yali. Agai te Josua te Eleasar me te we bidi pageba dolalumainogo yagasali. 23 Tama Mosesgo aga nogo te Josuago toboluba nogo munama, tama te po wali, “Josuago ena hasegelama, tama dagego tobolu bidi bidaibao,” wali. Mosesgo te Genuai Bidigo agabolo wali po wali pelama, tama yali. f 

Copyright information for `MPS