a[Lo 23:21-23; Mt 5:33]

Numbers 30

Te we bidigo dąų wabo po wabode bomai po

Mosesgo te Genuai Bidigo po dabe te Israel dabego tobolu bidi dabebolo pusali. Agai te po wali, “Te bidi mego te nai me Genuai Bidibolo maiabo po polo wai ebaso da, ma agai mu po ugwadu mu weyu, agai magi sę dabe me yainogo po dąų obaso da, teda agai aga po wali pelama, tama agai yaibao wali sę dabe tama mu yao, agai te dąų wali po togogio,” wali. a 

“Ma, te gesi wegi aga ayago bede bidiyu, tama Genuai Bidibolo magi nai me mawaibao po weyu, ma agai magi sę dabe me egobeo po wali da, teda agai te po usu dao. Ma, agai ayago te po odama, aga habu selesiąbaso da, teda te wegigo aga te wali po tigidali wali pelama, emainao. Tiali goli, aga ayago te wegi agai wali po odobaso da, tama agai te odali sogo te wegibolo agai wali po wali pigio olama habu selali da, teda te wegigo digi wali po wali pelamuo. Tama te Genuai Bidigo agai sę te agai wali po wali pisąma yali te sęgę sela sąwaibao. Magi baso meni, aga ayago te wegigo wali po wali pomainogo sula tagalobeo,” wali.

“Ma, te bidigo sasiąwai gesi wegigo aga homugo bugagia kone palama, te mena mena sę eno yaibao wali da, ma agai olo dali tama wali da, teda te dwagi yai dao. Tialima, te wegi aga nosali bidi pelama, tama aga te bidigo agai te yaibao wali sę po agai odama habu selisąma yali da, teda te wegi aga te yaibao wali te sę dabe wali pelama tama yao. Tiali goli, te wegi aga bidigo te wegigo aga haniani sę dabe aga homugo yaibao wali po odali sogo, tama aga we habu selali da, teda te we aga te po wali pelamuo. Tama tiali, te Genuai Bidigo te wego aga wali po wali pisąma yali te sęgę sela sąwaibao.”

“Ma, te we me aga bidi isai, ma aga bidigo aga sela sąwai wego agai aga mena mena sę dabe aga yaibao waibaso, ma egobe waibaso da, teda te usu dao, aga te mena mena sę aga emainao. Tiali goli, agai te dąų wali po wali pao.”

10 “Ma, te bidigo sai wego te mena mena sę dabe aga yaibao po me waibaso da, teda wiegi yai dao. 11 Ma, te we aga bidigo aga wego wabo po odama, tama agai magi po me olama, aga webolo te po wali me pelamuo olama, habu selisąma yali da, teda te we aga te yaibao wali po wali pelama, tama aga te sę dabe sese tama wali pela emainao. 12 Tiali goli, te we aga bidigo te wego wabo po odali sogo tama habu selali da, teda te we aga te wali po sese tama wali pomainu elamuo. Te aga bidigo aga habu selali dao. Tama tialima, Genuai Bidigo te wego sęgę sela sąwaibao, te we aga wali po wali pisąma yali sęgę. 13 Te we aga bidigo te wego wali po wali pao wabo me, ma aga wego wali po wali pigio wabo me ebo, te usu dao. 14 Tiali goli, te bidigo te po odali sogo nosali bidama, agai po me olama, habu selisąma yali da, teda te wego aga wali po dabe sese tama wali pelama, aga mena sę dabe yai wali tama yao. Te we aga bidigo te po dąų walalio, magi baso meni, agai aga we habu selebo po olama ebeo. 15 Tiali goli, bidama nosali me sogo agai aga we te po wali pelamuo olama, habu selali da, teda te bidi aga digi te wego aga te wali po wali pisąma yali te sęgę te bidigo saibao,” Mosesgo Godigo te po augwalibolo pusa mani.

16 Genuai Bidigo te mena mena sę yaibao olama, te dąų walobo pogo bomai po te Mosesbolo mani. Te bomai po dabe te bidigo wego ma wegigo augwa mena mena sę augwa yaibao olama dąų wali pogo bomai po dao. Te bidigo wego yabo po dao, me te gesi wegi aga bidi pisąbadi te aga aya dali bidibadi, te wego yabo po dao.

Copyright information for `MPS