a[Nam 13:17-33]
b[Nam 25:1-9]

Numbers 31

Te Israel dabego Midian dabe dali hwįani

Genuai Bidigo Mosesbolo te po wali, “Dage pelama, te Midian bagego dage Israel dabe dali dwai sę yali, te sę wei ponigi peyu, augwali sese ela mugi pao. Dagego te sę ela silibo si, tama nosali Moses nage isaibao,” te po wali.

Tialima, Mosesgo Israel dabebolo te po wali, “Dagego hwįbo nai dabe dodolama, tama Midian dabe dali hwįgi pao. Magi baso meni. Genuai Bidigo te bidi dabe augwaligo dage dali dwai kolesaga yali te sę wei ponoyu, augwali sese ela silaibao. Dagego te deli deli wąį dabede dagego te 1,000 bidi dabe dage Israel dabe tomode sa munama, hwįgi pomainao,” te po wai. Tama tialima, augwaligo te Israel dabego wąį deli delide augwaligo 1,000 bidi dabe sesa pelama, 12,000 bidi tama nigali. Augwali hwįgi pabo usu mu elaluali. Tama Mosesgo augwali hwįgi pao po olama, tagala palali. Tama Eleasargo ogwa Finias augwali dali pelama, augwali tonaluali. Tama Finiasgo te Godigo ugwa bede nai dabe meba selama tolaluali, me te bidi hwįgi pomainu bu wabo te biugel, me te beba ma asomainu bu wabo, te biugel me agai tonaluali.

Tama augwali te Genuai Bidigo po wali gilama, te Midian dabe dali hwįgi pali, te Mosesbolo wali po wali peyu, tama augwaligo te Midian bidi dabe sese tama ela muna silali. Tama augwaligo Midian dabego tuni bidi dabe a naga me ela muani. Te da te Evi, me Rekem, me Sur, me Hur, me Reba. Me augwaligo te Beorgo ogwa Balam me augwaligo ela muani. Te Israel dabe augwaligo te Midian dabego we wai, me augwaligo kau kibu, me sipsip kibu dabe selama, asali. Te meba wiegi yai nai dabe me tama sali. a  10 Tama nosali augwaligo te Midian dabego hanu, me te augwali osogo bidali pesage sese tama isi tulali. 11 Tama nosali augwaligo te we wai, me kau kibu, me sipsip kibu, me te wiegi yai nai dabe augwaligo te 12 Moses, me Eleasar, me te Israel dabe pageba te Moapde malu bulude bidibadi sesali, te wę Jordan u badu, te Jeriko dolo si dao.

Te ami bidi dabe ma asali

13 Moses, me Eleasar, me te Israel dabego tobolu bidi dabe sese, augwali te bidibo pesage tagalama, bulu badu pelama, te ami bidi dabe tiąba pali. 14 Augwaligo te bage sulama, tama Mosesgo te 1,000 ami bidi tonalubo ofisa bidi, me 100 ami bidi dabe tonalubo ofisa bidi dabe sesanani. Megi da, augwali hwįani madi tagalama, augwa pesageba ma asali. 15 Tama agai augwalibolo hanaluyu, te po wali, “Magi baso dagego te we dabe ela mubewe? 16 Dagego polo koneai dao, te we dabe augwaligo te Balamgo po wali pelama, tama da hani we bidi te Genuai Bidi tudi ola momainogo yai dao, te da te bulu Peorde bidibadi. Tama tibaso, te gasi dwai me deli te Genuai Bidigo we bidi tigide pedalai dao. b  17 Tialima, megi da, dagego ogwa dabe, me te we dabe bidi dali piai we dabe ela muao. 18 Tiali goli, te bidi dabe dali pisąma yali, te wegi dabe da, tagalao. Tama augwali duga siąo,” wali.

19 “Tama dage te bidi ela muani bidi dabe, ma te isai bidi tigi nogo tuali bidi dabe, dage bulu badu bidibadi, a naga sogo olama, si sogo dage bulu badu, te bidibo pesage bulu badu bidiąo. Tama te dei namba 3, me te namba 7 deide, dage me duga te hwįani sogo sali te we dabe dage te Godigo gedude wiegi yai pedalainu ebo kolesaga iyąo. Tama dage Godigo gedude wiegi yai pedalaibao. 20 Tama dagego te duga nai dabe me te Godigo gedude wiegi yai pedalobo kolesaga iyąo. Te da, te dagego ugwa dabe, me te augwaligo kau kibu waligo nigai nai me, te meme nisigo nigai nai me, te ni name dage me.” Mosesgo te po wai.

21 Tialima, te pris Eleasargo te wabi hwįnama ma asali bidi dabebolo te po wali, “Genuai Bidigo Mosesbolo te mani te bomai po odiąo. 22 Te isigo dolisąbo nai dabe, te gol, me silva, me ain, me kapa, me bras, te tama nai dabe dagego isi bogoliba osogo muao, tama te nai dabe Genuai Bidigo gedude ma wiegi yai pedalaibao. Ma, te nai dabe te isigo mu dolabo nai dabe yaibaso da, dagego te wę telayao, te bedeba so kau kibu sisi dulu dali taluali węgo tama telayao, tama augwali wiegi yai ma pedalaibao. 24 Te dei namba 7, tede dage te duga ugwa dabe ąį tedalama, tama dage Godigo gedude wiegi yai pedalaibao. Tama dage te bidi bidibo pesage tomoba pagameo,” Eleasargo te po wai.

Te Israel dabe augwaligo te hwįyu sali nai dobayali

25 Tama Genuai Bidigo Mosesbolo te po wali, 26 “Nage, me Eleasar, me we bidigo tobolu bidi dabe, dagego te wegi dabe sese, me wai dabe, me te hasa sibi, te ami bidi dabego boide sali nai, dagego te nai dabe tama nedao. 27 Tama te nai dabe si bugulama, tama hani sibolo dobayao, te hwįgi pali bidi dabe, me te bede bidali bidi hani si bugulama, tama dobayao. 28 Nago eno takis me sao, Genuai Bidi eno takis sao, te nago te ami dabebolo mawainogo ebo te hanide. Te 500 kalabus ilali wegide me deli, me te 500 kau kibude me deli, me te donkide deli, me sipsip kibude deli, me meme kibude deli tama selama, 29 tama te takis te pris Eleasarbolo mao, te nai bugai te enabolo ma mabo tiwai. 30 Tama tialima, nago te bede bidali we bidibolo mabo te nai dabede me takis sao. Te 50 kalabus wegi dabede deli siyu, me te kau kibude deli, donkide deli, me sipsipde deli, me meme kibugo deli, tama te tigidali 50 50 elama te Livai dabebolo takis mao. Te augwali eno ugwa be tonalubo bidi dabe dao,” Genuai Bidigo te po wai. 31 Tialima, Moses de Eleasar sigo Genuai Bidigo Mosesbolo wali po dolo tama tiali.

32 Te ami bidi dabego te boide sali nai dabe namba e tama dao, te sipsip kibu te 675,000, me kau kibu te 72,000, me te kibu donki te 61,000, me te 32,000 bidi dali pisąwai gesi wegi mani. Tiali goli, augwaligo te boide isali boi bidi dabego au dodobage dabe me sai dao. 36 Te nai dabe si bugulama, te ami bidi dabego te 337,500 sipsip kibu sali, tama augwaligo te 675 te Genuai Bidibolo te takis tiwai mani. Te kau kibu me augwaligo te 36,000 sali, tama Genuai Bidibolo te takis mayu, te 72 mani. Te 30,500 donki kibu augwaligo sali. Tama augwaligo 61 donki kibu te Genuai Bidibolo takis mani. Tama augwaligo 16,000 gesi wegi mani sali, tama augwaligo 32 wegi mani Genuai Bidibolo te takis tiwai manio. 41 Tama Mosesgo te takis augwaligo mani selama, Eleasarbolo mani. Te Genuai Bidigo wali po gilama tama tiali.

42 Tama Mosesgo te ami bidi dabebolo dobayali tiwai te we bidibolo dobayali. Te we bidigo te 337,500 sipsip, me 36,000 kau kibu, me 30,500 donki kibu, me te 16,000 gesi wegi mani tama sali. 47 Tama Mosesgo te nai tama dobalama, tama agai te tigidali 50 kalabus wede deli selama, me kau kibude deli, me te donki kibude me deli, me sipsip kibude deli, me te meme kibude me deli selama, tama agai Livai dabe te Godigo ugwa be tonalubo bidi dabebolo mani. Agai Genuai Bidigo wali po gilama dolo tama tiali.

48 Tama nosali te ami ofisa dabe, te 1,000 ami bidi dabe, me 100 ami bidi dabe tonaluali ofisa bidi dabe, augwali Moses pageba aselama, 49 agabolo te po wali, “Genuai bidi, dago dena tonaluali ami bidi dabe nedali, te dolo tama bidibo suali, te boide me isai sube. 50 Tama tibaso, dago te aubo nai dabe, te gol nogode mubo nai, me dogonide domobo, me olode walobo, me te ring dabe da deli deligo boide sali, dago God Genuai Bidibolo mawaibao. Te da ma abelali pe tiwai dao. Magi baso meni, Genuai Bidigo da boi bidigo da elemainu sula tagalobeo,” te po wai.

51 Tialima, Moses de Eleasar sigo te gol au dodobage sali. 52 Te gol au dodobage sęgę te pąde 200 kilo tama yali. 53 Tiali goli, te olo ami bidi dabego te boide sali nai dabe sesebeo. 54 Tama Moses de Eleasar sigo te gol au dodobage selama, tama ugwa be tomoba mugi pali, te Godigo ugwa be tomoba. Augwali sigo te tama tiali, te Godigo te Israel dabe homugo koneama, tama tonalumainu tiali.

Copyright information for `MPS