a[Jos 21:1-42]
b[Lo 17:6; 19:15]

Numbers 35

Genuai Bidigo Livai dabego hanu dąį ilali

Augwali te Moap bulugo dola pai bulude te Jordan wę u badu, te Jeriko pąde bidibadi, Genuai Bidigo Mosesbolo te po wali, “Eno homugo nago Israel dabebolo te po walao homu ebao: augwaligo hanu meba geselama, tama te Livai dabebolo mao. Te nosai wiegi yai elalubo tǫ te hanu pąde elalumainao, te kau kibu dabego tuabo. Te Livai dabe augwaligo te hanu dabe saibao. Tama te nosai wiegi yai elalubo tǫ te hanu dabe pąde, te da te kau kibu me sipsip te Livai dabego kibu dabego tuabo nai. Te tǫ te nosai dabego te hanu bagua sai elalumainao. Te obo sesegedu gagalama, tama te 450 mita te tǫ dąįba usu nigi pao. Tama tialima, te hanu tomode elalubadi, te tǫgo bagua sai elalumainao. Te me badu sabidu te me badu sabiba te 900 mita tama elalumainao. Dagego te a naga olama, me badu nogo deli hanu te Livai dabebolo duala sabo hanu me mao. Te bidi mego aga abagi dali boi bidi isąma, tama agai olo dali aga abagi elali da, teda aga te duala sabo hanu me deliba wi udula somainao. Te bidi mego aga te abagi isali te wei ponainu yali da, teda agai te bidi elama isidali weyu. Tama me dagego gasa 42 hanu dabe te Livai dabebolo maiąo. Te wiegi yai nosai elalubo tǫ te hanu page dabede elalumainao. Tama te Livai dabego te 48 hanu dabe tama elalumainao. Dagego te Israel hani dabego hanu dabe dagego te Livai hanibolo momainogo da, teda dagego te gasa Israel hani dwasianu elalubaso da, teda dagego augwaligo hanu si sela naga Livaibolo mao, ma genuai hani yaibaso da, teda dagego augwalide hanu hauwa siyu, tama te Livai dabebolo mao. Te bidi hani bugagia dodolama, hanu selama, tama augwali hani namba dolo sao,” wali. a 

Te duala siyu yabo hanu dabe

(Bom 19:1-13; Jos 20:1-9)

Tama Genuai Bidigo Mosesgo 10 te Israel dabebolo te po momainu e tama po wali, “Dage te Jordan wę nogelama, te bulu Kenan tomoba peyu da, 11 teda dagego duala sabo hanu me sa muiąo. Tialima, te bidi mego aga abagi dali boi bidi homu isąma, geda muyu ela mubaso da, teda aga te hanu me deliba wi udula selama, tama tede bugagia bidimainao. 12 Te hanu dabe te duala sabo bulu tiwai elalumainao. Tama te isali bidi aga hanigo te isali bidi wei ponidali weyu. Tama te gasa bidi elali bidi aga bugagia bidama, tama aga po tų eboba bolo usu nigi pomainao. Tama te po tųde aga isimainao wali da, teda augwaligo aga ela mumainao. 13 Dagego a naga olama me badu nogo deli hanu tama sa muao. 14 Te hanu sela te Jordan wę u badu giliga asobo badu elalu, me sela te Kenan bulude elalumainao. 15 Te hanu dabe da, te Israel dabe duga duala sabo, te gasa bulu bidi dage dali pęwadage sogo ma bobobage sogo bidibo bidi dabe duala sabo hanu dao. Tiali te bidi deli aga abagi dali boi bidi homu isąma, tama mena sę ebode geda muyu, aga abagi ela mubaso da, teda aga te hanu dabe meba geme duala sigi pomainao,” te po wali.

16 “Tiali goli, te bidigo aga abagi dali boi bidi homu elama, tama agai ain dili, ma masigi du, ma wabi dage selama, aga abagi ela muani da, teda dagego aga me ela muao. Magi baso meni, aga digi polo sęgę sai dao, aga te bidi ela muani bidi mu dao. 19 Te isali bidi aga deli kaneme bidi me deligo te bidi ela mumainao. Te aga deli kaneme hani deligo te bidi subaso da, teda agai te bidi tama ela mumainao. 20 Ma, te bidi mego aga abagi godolo isąma, olo dali bomona dega palama, tama aga abagi tulaluyu isalio, agai magi nai me nogogo sąnama, ma agai nogo sugunama elama isali da, teda agai te sęgę sai dao, tama dagego aga me ela muao. Teda aga amago te bidi isali wei ponabo sę elalubao. Agai te bidi ela mumainao. Te agai te bidi subosi, agai te bidi polo ela mumainao,” wali.

22 “Tiali goli, aga abagigo boi bidi homu isąma, aga abagi bomona dega palali digi isibaso, ma agai magi nai me nogogo sąnama, tama aga abagi ela mubaso, 23 ma agai suisąma olo dali masigi togolai madi te bidi ela muani da, teda dagego te tama tiąo. 24 Dagego te sę yali po te bomai po wali peyu, tama te bidi aga abagi elali bidigo kolesaga me agai po osola suyu bolo yao. Tama dagego te isali bidi aga deli kaneme mego te ela mumainu sula tagaligio. 25 Dagego aga ma oda selama, tama te isali bidi aga amago te bidi elegobeo. Tama dagego aga te duala sabo te hanuba taga palao. Te bidi te hanude bidibadi, te sogo te bidibo te tobolu bidi pris bidi isiyu bolo elama, tama nosali aga te duala sabo te hanu taga pomainao,” wali.

26 “Tiali goli, te tobolu bidi pris bidi isisąma ebadi, te bidi elali bidi aga digi te hanu tagalama buluba sobadi, te isali bidi aga hanigo te bidi sulama ela mubaso da, teda te po tų menio. 28 Magi baso meni. Te aga abagi elali te bidi aga digi te duala sabo hanu taga soali dao, te sogo bidibo tobolu bidi pris bidi isisąma ebadi. Tialima, agai taga pobaso da, teda aga dagede dao. Te hetpris bidi isai digi da, teda aga te aga bulu muba ma pomainao, tama agai te yali sęde po mu menia saibao.”

29 “Dage me duga hani nosali asobo wąį dabego te bomai po wali naga piąo, tigidali sogo. Dage me gasa bulude bidali me tagalao, te bomai po wali naga piąo. 30 Te augwaligo po tų ela mubadi, bidi mego aga abagi dali boi bidi homu eyu elalio po obaso, tama bidi si ma selago sulama, tama po tų ebode deli po naga obaso da, teda dagego aga ela muagameo. Tiali goli, bidi deligo sulama, aga po tų ela mobaso da, teda dagego aga ela mugio,” wali. b 

31 “Dagego te bidi aga abagi dali boi bidi homu elama, aga abagi ela muani bidi dagego ela muiąo. Te bidi aga digi aga te monego ma abelegobeo. Mu menio. Aga isimainu yao.”

32 “Ma, te bidi me aga te duala sabo te hanuba pelama, geme dualaluama, tama nosali aga te aga buluba ma soainu sunumi abelebaso da, te hetpris bidi bidibadi, teda agai usu egobeo. Dagego agai te tama timainu sula tagalamuo. Te habu mu dao.”

33 “Ma, dagego aga pomainu sula tagalali da, teda duga digi duga bulu eno gedude meda ilaibao. Te bidi ela mubo kolesagago te bulu meda ilibo dao. Tama te bulu wiegi yai ma ilabo sunumi deli elalubao. Te da e tama dao. Dagego te bidi aga abagi elali te bidi aga wei ponama ma elao. 34 Dagego duga bidibo bulu eno gedude meda ilamu dao, Genuai Bidi eno gedude. Magi baso meni. Ena dage Israel dabe tomode bidibao,” Genuai Bidigo te po wali.

Copyright information for `MPS