a[Nam 27:7]

Numbers 36

Te bidigo sai we dabego te aya isibode te ayago nai dabe somainao

Te Josep te Manasego aya, tama Manase te Makirgo aya, tama Makir te Gileatgo aya dao. Tialima, me sogo te Gileatgo hani tobolu bidi augwali te Moses pageba pali, me te gasa Israel dabego tobolu bidi dabe pageba pali. Tama augwaligo te po wali, “Genuai Bidigo dagebolo te tǫ da Israel dabebolo dobayainu, dage satu gagali yao po wai dao. Tama me ma, agai dagebolo te dago hani Selofehatgo tǫ dabe me mao po wai dao, te aga wegi dabebolo. a  Tiali goli, augwali te gasa hani bidi dabe dali bidi peyu da, teda augwa bidi dabego wąį hanigo te tǫ dage saibao. Te augwa bidigo hanigo te tǫ selama, tama augwa tǫ dali talua saibao. Tama dagego da magi ela mani te tǫ te dwasianu igi paibao. Tama nosali te tǫ gasa bidibolo mani te tǫ ma siyu, te tǫ abelali nai ma wei ponobo genuai sogo da, teda te Selofehatgo wegi mani dabego te tǫ dage, te wegi manigo augwa bidi dabego hanigo te tǫ selama, tama augwa tǫ dali talua saibao. Tama te tǫ da hanigo meni yaibao,” te po wai.

Tama tialima, Mosesgo Genuai Bidigo te po te tigidali Israel dabebolo mani. Mosesgo te po wali, “Te Manase hanigo te po te mu tama dao. Tialima, Genuai Bidigo te po wali, te Selofehatgo wegi dabe augwa homugo te bidi me pomainao. Tiali goli, augwaligo augwa hani bidi dali naga augwali bidi pomainao. Tama tiali da, dage deli deli Israel hani dabego duga tǫ dugade naga elalua paibao. Tama duga hani mebago me sogobeo. Te wegi mani augwa aya isaide augwa ayago doado bage dabe saibaso da, teda te wegi aga ayago hani bidi dali peyu emainao. Dagego te tama tiyu da, teda dage Israel dabego duga wąį mugo nai dabe me tǫ dabe selama, elalua pidu mu elalua paibao. Tama tialima, dagego te gasa hanigo dagego tǫ somainu sula tagaligio. Menio. Deli deli hanigo augwa tǫ mu naga tolaluaibao,” Mosesgo te po wai.

10 Tialima, te Selofehatgo wegi dabe, augwaligo nogi Mala, me Tirsa, me Hokla, me Milka, me Noa, augwali te augwa ayago hani mu dali pali. Te Genuai Bidigo Mosesbolo wali gilama tama tiali.

12 Augwali te Manase hani bidi dabe dali bidi pali, te Josepgo ogwago hani. Tama tialima, te tǫ dage te aga ayago hanide elaluali.

13 Te bomai po dabe te Genuai Bidigo Mosesbolo te Moapgo malu bulude, te Jordan wę u badu, te Jeriko pąde mani.

Copyright information for `MPS