a[Sai 12:1-13]
b[Sai 12:46; Jo 19:36]

Numbers 9

Augwaligo te Pasova bubugade nai ulali

Te Israel dabe augwaligo Isip bulu taga solama, nosali te namba 2 kibu bego hasia wabo poluade augwali te nai meni yai bulu Sainaide bidibadi, Genuai Bidigo Mosesbolo e tama po wali, “Edao, te poluago 14 deide, te pio mu dage Israel dabego sipsip dabe elama, ofa tiwai yao, tama te nai ulubo te eno dage bugagia bidimainogo sula tagalali bubuga Pasova te ma kone paliąo. Te nai ulubo bubuga mu te dao. Tama dagego aga te bomai po dabe dolo wali pelama, tama dage te nai dabe tuiąo,” wali.

Tama te Mosesgo te Israel we bidi dabebolo te Godigo augwali olo bidimainogo tagalali Pasova bubugade augwalibolo te nai dabe ulao po wali. Tama augwaligo te nai te namba wan poluago 14 deide ulali, te Sainai bulu nai meni yai bulude. Tama te we bidi dabego Godigo Mosesbolo wali po sese tama wali pelama, tama te nai dabe ula tuali. a 

Tiali goli, bidi meba augwaligo te isai bidi tigi nogo tulama yaligo augwali Godigo gedude wiegi yai menio. Tama tibaso, augwaligo agai te bubuga mude nai ula tubo usu egobeo. Tama te nai tubo bubugade augwali Moses de Aron si pageba pelama, augwaligo e tama po wagasali, “Dago te isai bidigo tigi nogo dįąwai dao. Tama tibaso, da wiegi yai menio. Tiali goli, magi baso dago te meba we bidi dabe dali te ofa Genuai Bidiba ebo tagalomainowe?” Te po hanalu wali.

Tama Mosesgo te po wali, “Dwasianu tonaluyu bolo yao. Eno Genuai Bidibolo hanaluyu bolo yaibao,” wali.

Tama Genuai Bidigo Mosesbolo te Israel we bidibolo 10 e tama po walao wali, “Te dage dugago me, ma duga wąį wai bǫų dabego te bidi isai bidi dabe nogo polo toulama, tama te Pasova tubo sogo eno gedude meda yaibaso da, teda tagalao. Te polua deli silama, tama nosali dagego te Pasova bubuga kone palobo nai te sogo uliagameo. Tama me dage hani meba digibulu bulu bilibaso da, teda augwaligo me tubo nosali usu yaibao. 11 Tiali goli, te bidi hani augwaligo te dei namba te namba 2 poluade te nai ulumainao, te pio mu. Tama augwaligo te nai uluyu, te nai ulubo bomai po wali peyu emainao. Augwaligo te nai te yis meni yai bret dali tuyu, me ha ebo dwanai dali tuyu emainao. Augwaligo te hasa mi me tagalama kigamuba me sabolamuo. Te augwaligo te sipsip pesabo sogo augwaligo te hasa dili togolamuo. b  13 Tialima, bidi me deli aga eno gedude wiegi yai elama, me ma augwali digibulu pisąma yai me augwaligo te namba wan poluade te nai ulisąma yali da, teda dagego augwali eno we bidi hanide sela sąyao. Magi baso meni, augwaligo enaba ofa nai mabo sogo masiąma ebaso. Tama tibaso, augwali sęgęgo sęgę augwa ma tolomainao. 14 Tama gasa bulu bidi dage dali bidama, agai me dage dali te nai ulama tuainogo yali da, te usu dao, agai emainao. Tiali goli, agai te naigo bomai po wali bugagia pomainao. Te bulu page bidi dabe, me gasa bulu badu asai bidi dabego augwaligo deli te bomai po wali peyu emainao,” Genuai Bidigo Mosesbolo te po wai.

Te pǫgo Godigo name ugwa be mesega sali

(Sai 40:34-38)

15 Augwaligo Genuai Bidigo name ugwa be sęą silama, tama ulade augwaligo sęą silali. Tama pǫgo te name ugwa lotu be mesega sagasali. Tama hulide augwaligo suali, pǫ te isi tiwai dabo suali. 16 Te tigidali sogo ulade pǫgo te name ugwa be mesegaluyu iduali. Tama hulide da, te pǫ isi tiwai mu tama elaluali. 17 Te pǫgo te ugwa be taga pabo sogo da, te Israel dabe augwaligo te doado bage dabe selama, wali peyu ebo dao. Tama te pǫ gasa badu me dolalubaso da, teda augwaligo bidabo pesage tede nigigi pabo dao. 18 Te Genuai Bidigo po wabo si da, te Israel dabe augwaligo me pesage taga pabo dao. Tama me Genuai Bidigo po wabo si da, augwaligo gasa buluba pesage nigigi pabo dao, te gesi noma pesage nigigi pabo dao. Ma, te pǫ te name ugwa be dai pedude me elalubaso da, teda te we bidi hogodasa pabo menio. 19 Te pǫ hauwa sogo te name ugwa be pedude bidibaso da, te we bidi dabe augwaligo Genuai Bidigo po wali pelama, augwali gasaba me peyu ebe. 20 Te me sogo da, te pǫ be pedude pęwadage sogo bidama, tama ma gudasa peyu ebo dao. Te bobobage sogo ma pęwadage sogo bidibadi me tagala. Te Israel dabe augwaligo te Genuai Bidigo po wali peyu, te pǫgo augwali ola mabo te wali naga tama peyu ebo dao. 21 Te me sogo da, te pǫ te deli madi me te pio deli madi elaluama, kigamu tama naga elalubo dao, tama te bulu taga peyu pabo dao. Tama augwaligo sulama, tama augwali te pǫ wali peyu ebo dao. Te pǫ hulide pobaso me ulade pobaso me, augwali wali peyu ebo dao. Te sogo tama te we bidi augwali me hogodama, wali peyu ebo dao. 22 Te mena tama sogo te pǫ name ugwa bede elaluali me tagala, te sigo me ma deli sogo me, ma polua deli me, ma kibu be deli bidibo me, augwali me pabeo. Tiali goli, te pǫ gudasa pabo si da, augwali me gudasa pabo dao, te bulu taga peyu. 23 Te Genuai Bidigo po wabo sogo da, augwali gudasa gasaba pabo dao, te gasa buluba pesage nigigi peyu. Tama agai po wabo sogo augwaligo doado bage selama, gasa buluba gudasa pabo dao. Genuai Bidigo te po Mosesbolo mabo dao, tama Mosesgo te we bidibolo pusubo dao, tama te we bidigo wali pabo dao.

Copyright information for `MPS