Proverbs 13

Te wiegi yai homu kolesaga elalubo waigo da, agai te aga ayago po odaibao. Tiali goli, hagoma homu ebo bidigo da, te gasa bidigo aga dodolobo kolesaga ebo te aga homude hagela homu ebo dao.

Te we bidi dabeba te po dolo yai po wabo bidi agai te wiegi yai nai saibao. Tiali goli, te tibo po weyu, te dąų walali po bolobo bidi dabe, augwaligo te gasa bidi dolabo homu wei mu ebo dao.

Te bidigo aga po te sali selasa wabo bidi yai baso da, teda aga bugagia bidiyu, tama aga me dologobeo. Tiali goli, te po hauwa dogia pabo bidi dabe da, te dolaibao.

Te hagela bidigo te doado bage hauwa sabo homu wei yali, tiali goli agai me sogobeo. Tiali digi, te sę dene ebo bidi dabego da, te augwa homugo te doado bage hauwa sabo homu yaibao.

Te doloba pai bidi dabego te tobage tibo po wabo te hagela homu mu ebo dao. Tiali digi, te dwai sę ebo bidi dabego da, te tobage dwai hale ebo kolesaga dabe ebo dao.

Te bidigo doloba pai kolesaga ebaso da, teda aga te kolesagago aga bobogela selama, tama aga bugagia bidibo dao. Tiali goli, te dwai sę ebo bidi dabego kolesagago te augwa digi dolobo dao.

Te dwai sę ebo bidi mebago te tibo po weyu, tama augwa te mone hauwa elalubo tiwai yaibao. Tama te mone bidi mebago te tibo po weyu, tama augwali te mone meni yai bidi te tiwai gagawaibao.

Te boi bidi dabego te mone bidi dolainu ebaso da, teda aga monego digi te augwali abelibaso, usu yaibao. Tiali goli, te boi bidi dabego te magi mone me doado bage meni yai bidi dolainu ebaso da, teda te magi walu doado bage meni yai bidigo augwaligo te po homu si me egobeo.

Doloba pai bidi te lam sole ula wiegi yai ebo tiwai ebao. Tiali goli, te dwai sę ebo bidi dabe te lam sole sula sainu ebo tiwai ebo dao.

10 Te hagoma kolesagago te wado po me hwįbo po pedalubo sę ebo dao. Tiali goli, te bidi aga te gasa bidigo agaba te wiegi yai homu momainu ebo bidi da, teda te bidigo homugo koneani kolesaga te wiegi yai elalubao.

11 Tama te bidigo sę me isiąma, tama te odolali te mone hauwa sobaso da, teda agai te mone polo tama sia saibao. Tiali goli, te sę ebo bidigo tama te dwasianu dwasianu mone sisini peyu da, teda agai mone te hauwa pedalubo sę eduaibao.

12 Te bidigo te nai me deli sabo homu elama, tama te odolali tonalubadi te sesabi mu ebaso da, teda aga homu sęgę eyu, bidaibao. Tiali digi, agai te nai sobaso da, teda aga te tiwai homu eyu, te aga bidibo ula te wiegi yai mu da homu elama, tama aga pemene umabo mu yaibao.

13 Te bidi dabego agabolo te wiegi yai homu kolesaga mawainu ebadi, te aga hagoma ebo bidi yai baso da, teda aga te aga digi dolobao. Tiali digi, te bidigo te agabolo te wiegi yai homu ebo kolesaga mawainu ebaso, te po agai wali pobaso da, teda aga bugagia bidaibao.

14 Te wiegi yai homu koneani kolesaga elalubo bidigo po te bidibo ula mabo wę tiwai yai. Te pogo te bidi tau siyu, te aga dolainu yali nai te ela paibao.

15 Te bidigo homu wiegi yai elalubaso da, teda te bidi dabe aga wei homu yaibao. Tiali goli, te tibo po wabo bidigo te dąų walali po bolama, aga te dwai sunumidu bilibo dao.

16 Te wiegi yai homu elalubo bidi tigidali, augwaligo homu kone bolo palama, tama te sę yaibao. Tiali goli, te wiegi yai homu meni yai bidi dabe, augwaligo te augwa umuna sai kolesaga te pepeli diliba hania hanilibo dao.

17 Te tibo po sela asiyu, te po hasegelebo bidi yai baso da, teda te sęgęgo agaba gegaibao. Tiali goli, te po sela asiyu, te po dolo mu pusubo bidi da, teda agai te we bidi tau siyu, te augwali bugagia bidimainu ebao.

18 Te gasa bidi dabego te bidi aga dodolomainu isiąbo bidi da, aga te dwai mu bidiyu, te aga dwai hale mu yaibao. Tiali goli, te gasa bidi dabego aga dodolomainu ebo bidi yai baso da, teda te we bidigo agaba te genuai nogi momainu ebo dao.

19 Te bidigo agai magi nai me deli sabo homu elama, tama nosali agai te nai sobaso da, teda aga bugai haliga elama, tama pemene mu yaibao. Tiali goli, te wiegi yai homu meni yani bidi dabego da, augwaligo te dwai kolesaga ebo sę te tudiba me mugobeo.

20 Te bidi te wiegi yai homu kolesaga elalubo bidi dali bilali da, teda agai me te wiegi yai homu kolesaga saibao. Tiali goli, te bidi te wiegi yai homu meni ebo bidi dabe dali kisasa bilibaso da, teda te sęgęgo aga gegaibao. 21 Te dwai sęgęgo te dwai sę ebo bidi dabe deliba gesabidi ununaibao. Tiali goli, te doloba pai bidi dabego augwa te wiegi yai nai te augwa mone sabo tiwai ebo dao.

22 Te wiegi yai bidi isibo sogo, te aga hani ogwa dabego te agai doado bage hauwa saibao. Tiali goli, te dwai bidigo sisinibo sę yali mone yai baso da, teda nosali te doloba pai bidi dabego te agai sisinani nai dabe sabo dao.

23 Te doado bage sǫą pai bidi dabego gide te nai hauwa holali, tiali goli te genuai bidi dabego anoma eyu, augwali aiyaba elaluama, tama te nai sabo dao.

24 Te ayago aga wai te keloago eliyu dodolisiąyu da, teda agai te wai godolo homu meni isiąbo tiwai ebao. Tiali goli, te ayago te wai homugo godolo homu ebaso da, teda agai bomo elama, aga bugagia dodolao.

25 Te doloba pai kolesaga elalubo bidi dabego te nai hauwa elalueibao, tiali goli te dwai kolesaga ebo bidi dabe te sesemane nasi elaludaibao.

Copyright information for `MPS