Proverbs 19

Te bidi te doado bage sǫą pobaso, tiali digi aga te doloba pai bidi, agai te wiegi yai homu elalusiąbo bidi me, te tibo po ola bilibo bidi me, te aiyaba mu elalubo dao. Tama te bidi me deli agai te sę me deli yabo bomo eyu, tama agai te yabo sę te bugagia konesiąbadi tiyu da, te wiegi yai me egobeo. Tama te bidi mego te sę me deli asesa ebaso da, teda agai te sę te wiegi yai me pedalugobeo.

Te meba hani bagego te esela pabo bidigo kolesaga eyu, tama augwa digi dolama, tama nosali te sęgę Genuai Bidiba munama, tama agaba wado ilibo dao.

Te mone hauwa elalubo bidigo da, te agai abagi hauwa elaluaibao. Tiali digi, te mone hauwa elalusiąbo bidi da, teda aga abagigo aga tagalu, tama aga abagi ma elalugobeo.

Te bidigo po tųde te tibo po weyu da, teda aga dene dwai saibao. Augwaligo aga me gogologobeo.

Bidi hauwago te nogi elalubo bidibolo homu bega sabo po weyu, ta agai augwali wei emainu tibao. Te bidi me deligo te wiegi yai homu ebo nai mabo bidi yai baso da, teda te bidi dabego te aga dali abagi wabo bidi pedelabo homu ebo dao.

Te bidi te doado bage sǫą pai baso da, teda te aga ama dedego te wei homu me egobeo. Te tiwai eyu da, te aga abagi dabego me te aga tudiba muaibao. Te agai augwali homu bega sabo po obadi digi tagalao, te aga po odolali waibao.

Te bidi agai digi tau sabo homu ebo bidi, aga te wiegi yai homu kolesaga koneabo sę bomo yaibao. Tama bidigo te koneani kolesaga te aga homude dąų weyu tolaluyu da, teda te aga bugagia bidabo bomo te elalubo dao.

Te bidigo po tųde tibo po obaso da, teda aga dwai dene saibao. Augwaligo te tobage tibo po wabo bidi ela muaibao.

10 Te wiegi yai homu elalusiąbo bidi bidibo, te tiali goli agai te mone hauwa elalubaso da, teda te dolo ebeo. Tiali goli, te olo sę ebo bidi te tobolu bidi pedelama, tama te genuai nogi elalubo bidi dabe tonalubaso da, teda te dwai mu ebao.

11 Te wiegi yai homu elalubo bidi, te agai wado po polo me wagobeo. Te agai polasa ebo kolesaga te tama tiwai. Te gasa bidigo agabolo dwai sę ebo te agai homu kone me palogobeo.

12 Te kingo wado weyu, te haliga sębę eyu ebo, aga te laiongo bomonama te gaa wabo tiwai ebao. Tiali goli, agai te bugai haliga elama, tama te we bidi dabe tau sabo homu eyu da, te segeni tulubage tuluyu, te nai bugagia holomainu ebo tiwai te ebao.

13 Te ogwago wiegi yai homu elalusiąyu da, teda agai te genuai sęgę mu te aga ayabolo mobao. Te bidi me deligo wego, te wego te wado po me te po hauwa wedu gebo we yai baso da, teda te be pedudu te be tomoba tulubage tuluyu, tama sesemane sogo te dwasianu dwasianu tetebo tulubo tiwai ebao.

14 Te aya idago te be, me mone, te doado bage dabolo mawaibao. Tiali goli, God deligo agai te dabolo wiegi yai homu kolesaga elalubo we da mawaibao.

15 Te hagela bidi dabe te sesemane godege pila mudaibao. Te olo naga bidibo bidi da, teda te nai meniama, te nai sili bidaibao.

16 Te bidi te Godigo bomai po wali pabo bidi da, teda aga bugagia bidiyu, te me dologobeo. Me ma, te Godigo kolesaga dabe te tudiba mubo bidi da, te aga isaibao.

17 Te magi nai doado bage meni yai bidiba nago te olo tau sabo wiegi yai kolesaga eyu, tama te doado bage mobaso da, te Genuai Bidigo negeli nageba ilibo tiwai ebao, tama nosali Genuai Bidigo nageba wei ponaibao.

18 Te naga ogwago hagoma ebaso da, nago aga dodolao, tama agai wiegi yai kolesaga wali paibao. Tiali goli, te nago agai te dwai kolesaga wali pomainu sula tagalu gogolobaso da, te nago aga isimainu usu da wabo tiwai ebao.

19 Te wado po polo weyu ebo bidi da, teda aga dwai sę yali sęgę te aga tolomainao. Te nago aga tau selama, tama te sęgę silibo si da, teda nosali te nago aga ma tau somainu homu yaibao.

20 Te bidigo nage ola momainu eyu, tama nago te wiegi yai homu kolesaga momainogo eyu da, teda nosali nago te wiegi yai homu koneani kolesaga me elaluaibao.

21 Da we bidi dabe dago te sę hauwa yabo homu ebo dao. Tiali digi, te Genuai Bidigo yabo homu yali sę te naga te pedelaibao.

22 Te bidi dabego te homugo mu kęą pai bidi te wei mu ebo dao. Awe, te bidi doado bage meni yai bidibaso, te wiegi yai me egobeo. Tiali goli, te magi nai doado bage meni yai bidi da, agai te tibo po wabo bidi aiyaba mu elalualio.

23 Te nage Genuai Bidide wi eyu, aga dologode bidibaso da, te kolesagago te nage bidibo ula mobao. Tama nage sesemane bugagia bidiyu, tama dwai nai nageba me pedalugobeo.

24 Te hagela bidigo te pou pletba nogo muyu, te nai sainogo yaibao. Tiali goli, agai nogo te ugwaba sagulama, tama te nai pedauwaliba me mugobeo.

25 Nago te hagoma bidi te keloago mobo po weyu te elibaso da, teda te homu kolesaga elalusiąbo bidigo sulama, tama koneaibao, aga digi te wiegi yai kolesaga wali pabo homu yaibao. Tiali goli, nago te wiegi yai homu elalubo bidi dodolobaso da, teda te augwaligo homu kolesaga te wiegi yai mu pedalubo dao.

26 Te ogwago aga ayago nai wi sabo sę ilama, tama aga ida te bede bidibo ela gudulubaso da, teda agai aga te we wai sibi te dwai hale ilibo sę mu ebo dao.

27 Ogwao, te nago wiegi yai homu kolesaga te skul weyu sabo homu ma isiąyu da, teda nago te sunumide geda muyu, te homu kolesaga elalusiąbo bidigo homu tiwai te wali paibao.

28 Te dwai kolesaga ebo bidi te po tų ebo witnes bidi pedalubaso da, teda agai te po tų tibo eyu, te dolabo homu pemene ebo dao. Te dwai kolesaga ebo te tobage bidigo te tubo nai tiwai ebo dao.

29 Te po dwai weyu, posobo po wabo bidi dabe te dwai dene mu saibao. Tama te bidi dabego te dobo kolesaga wali pabo sę ebo bidi dabe te keloago elaibao.

Copyright information for `MPS