Proverbs 21

Genuai Bidigo te kingo homu kolesaga dodolobaso, tama kingo te Genuai Bidigo homu wali peyu, te ąį te ąį gamiadu wali pabo tiwai ebo dao.

Dago tigidali kolesaga te wiegi yai da, te homu dago ebo dao. Tiali goli, Genuai Bidigo te dago homu kolesaga dagala sulama, tama agai te kolesaga page dabe bugagia konebo dao.

Dago te wiegi yai doloba pai kolesaga wali pao. Te Godigo gedude te tobage kolesagago te dago agaba ofa mabo te aiyaba mu elalubo dao.

Te dwai kolesaga ebo bidi dabego te sę me edu, tama sesemane hagoma yaibao. Tama tiyu, te augwa bidibo ula doliyu, te dwai sęgo pągąnalubo dao.

Te sę ebo bidi dabego te bugagia homu kone palama, te sę yaibao, tama peyu, te augwa sę wiegi yai pedelama, tama augwa doado bage hauwa elaluaibao. Tiali goli, te bidi dabego sę subigila asesa yainogo eyu da, teda augwa te sę wiegi yai me pedalisiąma, tama augwali te doado bage sǫą paibao.

Tama te bidigo tibo kolesaga wali peyu, te doado bage hauwa sobaso da, teda aga te isabo sunumide bidibao. Tama te bidigo mone me doado bage te dagalude pǫ te pęwadage sogo naga elalubo tiwai elama, tama te mu tigidali sia sabo dao.

Te dwai kolesaga ebo bidi dabego te wiegi yai kolesaga ebo hagela homu ebo dao. Augwaligo te gasa bidi dabe dolobo sę idu gebo dao. Tama tialima, augwa te kolesagago digi te augwa silabo sę ebo dao.

Te dwai sę ebo bidigo te tibo kolesaga yali. Tiali goli, te magi dwai sę me isąwani bidi dabe, augwaligo te doloba pai kolesaga yaibao.

Te bidi agaduba deli te be pedude dulaluali bidi da, te kolesagago te be tomode te wado po wabo me te po hauwa wabo we dali bidibo kolesaga te aiyaba elalubao.

10 Te dwai kolesaga ebo bidi dabe, augwali te dwai sę hauwa yabo te nasi tiwai ebao. Augwaligo te bidi me deliba te homu dene eyu tau mabo kolesaga me egobeo.

11 Te augwaligo te hagoma ebo bidiba te dwai dene mobaso da, teda te homu kolesaga elalusiąbo bidigo sulama, tama agai te wiegi yai homu me kolesaga saibao. Tiali goli, augwaligo te wiegi yai homu kolesaga elalubo bidi ola mobaso da, teda agai konebo kolesaga te wiegi yai mu pedelaibao.

12 Te Genuai Bidigo kolesaga te dolo mu ebao, tama agai te dwai kolesaga ebo bidi dabego te augwa be tomode te tigidali sę ebo te agai koneanio. Tama Genuai Bidigo te bidi dabe dolaibao.

13 Te nago olo pania selama, tama te doado bage meni yai bidi dabego augwali tau somainu nageba i wabo nago odisąbaso da, teda nosali me te bidi dabe augwaligo te nago i wabo me odogobeo.

14 Te bidi me deligo gasa bidiba wado po obaso da, teda te we bidi dabego aga susiąbadi te sogo agai agabolo te wiegi yai homu pemene ebo nai mobaso, tama te agai wado po wali te silaibao.

15 Te we bidi dabego te po tų ebode wiegi yai doloba pai kolesaga wali pabo sogo, te wiegi yai we bidi dabego sulama, tama pemene yaibao. Tiali goli, te dwai kolesaga ebo bidi dabego sulama, te augwali wi mu ebo dao.

16 Bidigo te wiegi yai homu kolesaga ebo sunumi te tagalubo bidi da, te isilama, tama te isali bidi dabe dali bidigi paibao.

17 Te bidigo te wiegi yai nai me wę tuabo homu wei ebo kolesagade pemene homu ebaso da, teda te aga mone silama, tama aga te doado bage sǫą paibao.

18 Te sęgę te doloba pai bidiba pedelainu ebaso da, teda te dwai kolesaga ebo bidi dabego augwali hasegelama, tama te sęgę augwaligo sabo dao.

19 Te bidi te olo masigi kemi pesagede bidibaso, te kolesagago te wado po wabo me te po hauwa wabo we dali bidibo kolesaga te aiyaba elalubao.

20 Te wiegi yai homu elalubo bidigo, agai te aga beba te tobage wiegi yai nai dabe saboyu, sisinaibao. Tiali goli, te wiegi yai homu elalusiąbo bidigo, augwaligo te augwa doado bage dabe silibo dao.

21 Te bidigo doloba pai kolesaga wali peyu, tama te bidi dabe godolo homu mu ebaso da, teda aga bugagia bidiyu, tama augwaligo doloba pai kolesaga agaba eyu, tama genuai nogi aga mawaibao.

22 Te wiegi yai homu elalubo bidigo te ami bidi dabeba te taun sabo wiegi yai sunumi te ola mobaso, usu yaibao. Te taun tomode bidibo bidi dabego te homu eyu, te taun bagulali obo te bomai obo elalubo homu eyu, tama te boi bidi dabego aluagasu, te dolobo usu me egobe da, te homu yali. Tiali goli, te ami bidi dabego hwįgi pelama, te taunde bidali bomai ami dabe aiyaba elaluama, tama te taun selama, te taun bagulali obo dolobadi yaibao.

23 Te bidigo aga wabo po bugagia tonalubaso da, teda te sęgęgo aga me gegegobeo.

24 Te gana pabo bidigo te hagoma eyu, tama te posobo po gasa bidiba waibao. Sesemane sogo te aga digi aga nogi ugwaba sabo bomo ebo dao.

25 Te hagela bidigo te doado bage sabo homu wei sabo dao, tiali digi aga te sę isiąbo bidi dao. Tama tialima, aga te wei ebo homugo te aga ela muaibao. 26 Agai te tobage nai dabe te sesemane aga sabo homu eyu, bidibao. Tiali digi, te sę bomonama yali doloba pai bidi agai te doado bage hauwa te nai meni yai bidi dabeba mobaso, te usu dao.

27 Genuai Bidigo te dwai kolesaga ebo bidigo ofa te wei mu me egobeo, aga tede sębę ebo dao. Tama te bidigo te tibo kolesaga wali peyu, te ofa ebaso da, teda Genuai Bidigo te dwai kugumini yai kolesaga mu da homu ebo dao.

28 Te sę ebo suali bidi te witnes bidigo te po tųde tibo po weyu da, teda te sę ebo suali te witnes bidi te isimainu yaibao. Tiali digi, te po bugagia odobo bidi, agai te po wainu ebaso da, teda te bidi dabego agai poba te bugagia olo munama, te po odobo dao.

29 Te dwai kolesaga ebo bidigo tibo po weyu, tama aga te wiegi yai bidi tiwai gagawaibao. Tiali digi, te doloba pai bidigo homugo te aga bilibo kolesaga te sesemane bugagia pedalumainu ebo dao.

30 Te nago wiegi yai homu elalubo, me te wiegi yai kolesaga koneani me, te nago mena sę ebo kolesaga wiegi yai koneani elalubo, te tagalao, tego nage dwasianu tau sainu ebo usu me egobeo, te nago Genuai Bidiba boi bidi ebaso da, te tama tiaibao.

31 Te ami bidi dabego te hwįbo sogo te hwįabo hos dabe dodolaibao. Tiali goli, te Genuai Bidigo naga te augwaligo te hwįbode ugwaba ela holomainu ebo dao.

Copyright information for `MPS