Proverbs 22

Te bidi dabego nage te wiegi yai bidi da homu elama, tama augwaligo genuai nogi nageba mobaso da, teda tego te tigidali mone me, te silva dali gol dali si te aiyaba mu elaluaibao.

Genuai Bidigo tigidali bidi nigali, te mone hauwa elalubo bidi dabe, me te magi nai meni yai te olo bidi dabe me nigali. Tama tibaso, te hani si te tiwai si dao.

Te wiegi yai homu elalubo bidi, agai te tiwai koneyu, te sęgę agaba pedalubo si, te agai ela soaibao homu yai. Tiali goli, te wiegi yai homu elalusiąbo bidigo, agai suali, te dwai sęgę te agai sunumide elalubaso, tama aga peyu, tama gesabidi deliba unulama, tama te sęgę tolobo dao.

Te nago naga digi naga aiyaba elaluama, te Genuai Bidide wi eyu, aga dologode bidibaso da, teda nago mone hauwa, me doado bage, me genuai nogi elalu, tama nage te bugagia bidaibao.

Te bidi tulalu, tama te dolobo tobage nai dabe, te dwai kolesaga ebo bidi dabego sunumide elalubao. Te bidi bugagia bidabo homu ebaso da, aga bilibo te bugagia tonalu, tama te tobage dwai nai dabe ela somainu yao.

Te naga waigo te wiegi yai kolesaga wali pomainu ola mao, tama aga te sunumidu bilidubadi, te aga monu dabe mu ebo sogoba usu naibao.

Te mone hauwa elalubo bidi dabego te doado bage sǫą pabo bidi dabe tonaluaibao. Tama te negeli elalubo bidi dabe augwali te negeli mani bidi dabego olo sę ebo bidi tiwai bidaibao.

Te bidigo dwai kolesaga ebaso da, teda te dwai sogo ebogo te aga gegebaso, tama agai te dwai sę te gasa bidi dabeba munu ma me egobeo.

Genuai Bidigo te bidigo gasa bidiba te tubo nai mabo bidiba te wiegi yai sę eyu, tama aga pemene yaibao. Magi baso meni, te tobage bidigo te magi wali doado bage meni yai bidi te nai mabo dao.

10 Te hagoma ebo bidi dabe sela sąbaso da, tama te tobage konila po wabo, me te dwai po wabo te sia saibao.

11 Te bidi God gedude te magi sę me isąwai te wiegi yai bidabo homu eyu, tama agai po wiegi yai obaso da, teda te king aga abagi pedelaibao.

12 Genuai Bidigo te tobage wiegi yai koneani kolesaga elalubo we bidi te bugagia tonalu, tama agai te tibo kolesaga ebo bidi dabego po te aiyaba elalubo dao.

13 Te sę igi pabode hagela homu ebo bidi te be tomode olo dali bidai. Agai te tiwai po waibao, “Te laion hasa me deli te sunumide bidibao,” wai. “Tiyu, ena buluba soade tama te laiongo ena elidalio,” waibao.

14 Te penani sę ebo wego te bidi homu bega sabo po weyu, tama te tǫ dedage aiyanu mu igulai tiwai me deli ebao. Te Genuai Bidigo te bidi me deligo dwai kolesaga wei ponabo homu ebaso da, teda te bidi te tǫ dedageba tulaluaibao.

15 Te wai dabego te homu kolesaga meni yai kolesaga dabe ebo dao. Tiali digi, nago te augwali keloago elibaso da, teda augwaligo te kolesaga tagalaibao.

16 Te bidigo te magi nai doado bage meni yai bidi dabego nai dabe sainogo te augwaliba dwai sę ebaso da, ma te bidigo te mone hauwa elalubo bidiba te wiegi yai homu ilibo nai mobaso da, teda te aga digi te magi nai doado bage meni yai bidi tiwai pedelaibao.

Te wiegi yai homu elalubo bidigo te wiegi yai po te 30 po wali

(Dąį 22:17-24:34)

17 Megi eno nagebolo te wiegi yai homu kolesaga koneai bidi dabe dalubo po nageba ola mawainu ebao. Nago homu te poba bugagia munama, tama tede bugagia homu kone palao. 18 Te po nago homude elaluyu, tama nago gasa bidiba pusubaso usu yabo ąǫ ebaso da, teda nago haliga te bugagia tegaluao.

19 Megi naga eno te po pusainu ebao, te naga digi odolama, tama nago konealubo homu te Genuai Bidiba dąų mu omainu yaibao. 20 Eno te 30 wiegi yai po asęyu, te nage bugagia ola mayu, tama te wiegi yai homu konebo kolesaga te nageba mobao. 21 Tama tialima, nago te po page mu konemainu ebao. Tama te bidi dabego nage tagala palu, te mena po te mu po yaliwe naga konea pomainu ebo sogo da, teda nago te mu koneama, tama te po dolo augwaliba ponaibao.

(1)
22 Nago homugo te magi nai doado bage meni yai bidi dabe, augwali te olo bidi naga da homu elama, tama nago augwaligo doado bage odolali me kekelama sigio. Tama augwali te po tųba sabalubo sogo da, teda nago te augwali aiyaba elaluabo po tų me igio, 23 magi baso meni, Genuai Bidigo augwali tonaluyu, tama augwali tau saibao. Tama te bidigo te magi nai doado bage meni yai bidi dabeba te dwai sę ebaso da, teda Genuai Bidigo te bidi agaba te dwai sę wei ponobo dao.

(2)
24 Nago te wado po polo wabo bidi dabe dali, me te sębę polo ebo bidi dabe dali abagi me wagio. 25 Tiyu, nago augwaligo ebo kolesaga selama, tama nosali te dwai nai dabego nage dolabuo.

(3)
26 Te bidi me deligo negeli sabo sogo, te negeli sali bidi aga digi ponabo te usu isąbaso, te nago te negeli sali wei ponabo po dąų waligio. 27 Tiyu, nago begelabo usu isąbaso, tama augwali aselama, te nago doado bage sigidali, me te nago bet me sagasabuo.

(4)
28 Nago te naga wąį nǫų dabego te nago tǫ polobadu dąį ilali te ma kidiligio.

(5)
29 Te bidigo wiegi yai sę ebaso da, teda aga te kingo sę bidi pedelaibao. Te tobage bidi te nogi meni yai bidigo sę bidi me pedalugobeo.

Copyright information for `MPS