Proverbs 28

Te dwai kolesaga ebo bidi dabe te odolali wi elama, tama wi paibao. Tiali goli, te doloba pai kolesaga ebo bidi dabe da, te hasa laion tiwai gilama te bomo elama, dolalubo dao.

Te bulu tǫ pedaide bidibo bidi dabego te gavman hasegelibo sęde hwįbo sę ebaso da, teda te gesi tobolu bidi hauwa sesemane pedelaibao. Tiali goli, te wiegi yai homu kolesaga elalubo tobolu bidigo da, teda agai te bulu tǫ pedai kantri bugagia bidimainu yaibao.

Te bidi me deli aga te doado bage sǫą pobaso, tama agai te magi nai doado bage meni yai bidi dabe aiyaba elalubaso da, te da te genuai dwai tulubagego te gide nai dabe dolobo tiwai ebo dao.

Te bomai po tudiba mubo bidi dabe augwaligo te dwai kolesaga ebo bidi dabe nogi ugwaba saibao. Tiali goli, te bomai po wali pabo bidi dabe, augwaligo te dwai sę ebo bidi dabe aiyaba elalubo sę ebo dao.

Te dwai kolesaga ebo bidi dabego, te doloba pai kolesaga te magi nai da te homu elama, te augwaligo konesiąyu ebao. Tiali goli, te Genuai Bidi wali pabo homu ebo bidi dabego da, augwaligo te doloba pai kolesaga page mu konebo dao.

Te bidi te doado bage dabe sǫą pobaso da, tiali goli te aga doloba pai bidi, agai te mone hauwa umabo elalubo bidigo te tobage dwai kolesaga ebo te agai aiyaba mu elaluaibao.

Te gesi ogwa bidigo te bomai po wali pabo, agai te wiegi yai homu kolesaga elalubao. Tiali goli, agai te sesemane sogo te nai umabo da tubo bidi dabe dali abagi weyu, kisasa bidiyu ebaso da, teda agai te aga aya te hale dwai mu ilibo sę ebao.

Te bidigo te bidi dabego agaba te nai negeli somainu elama, tama agai te augwalide gasa ugwadu daganobo profet mone genuai dali sobaso da, teda agai te mone tolalubaso, usu me egobeo. Menio. Te mone te magi nai meni yai bidi dabe tau sabo bidigo nogoba pelama, tama te magi nai meni yai bidi dabe tau somainu ebo dao.

Te bidigo te Godigo bomai po tudiba mubaso da, teda Godigo agai gedu haluasa po wabo me odogobeo. Te Godigo te gedu haluasa po wabo te kukumini ebo nai subo tiwai yaibao.

10 Te bidigo te doloba pai kolesaga ebo bidi dabe geagano bilibo tiwai ebaso da, teda aga te dwai kolesagago te aga digi aga dolaibao. Tiali goli, te bidi te nai me delide magi sę isiąwai bidi da, te aga wiegi yai nai dabe te Godigo nogode saibao.

11 Te mone hauwa elalubo bidi dabego te homu yai, te augwaligo koneani kolesaga te hauwa elalubo homu yai. Tiali digi, te wiegi yai homu elalubo magi nai meni yai bidigo, agai te augwaligo kolesaga page mu konebo dao.

12 Te doloba pai bidi dabe te bulu tǫ pedai tonalubo bidi pedalubo sogo, te tigidali bulu tǫde bidibo bidi hani te bugai haliga elama, wiegi yai pemene mu yaibao. Tiali digi, te dwai bidi te tonalubo bidi pedalubaso da, teda te we bidi dabe augwalide geme wi duala sabo dao.

13 Te bidigo aga dwai sę yali geme dualabo homu ebo bidi da, teda aga bugagia me bidigobeo. Tiali goli, te bidigo aga dwai sę yali tigidali pusulama, tama te dwai sę dabe tudiba mubaso da, teda Godigo te olo mu tau sabo wiegi yai kolesagago aga bugagia tau saibao.

14 Te bidi Genuai Bidide wi eyu, aga dologode sesemane sogo bidibaso da, teda aga wiegi yai homu pemene yao. Tiali goli, te bidigo hagoma elama, tama Genuai Bidigo po sela sąbaso da, te agaba dwai sę agaba gegagasaibao.

15 Te bulu tǫ kantri tonalubo bidi aga te dwai kolesaga ebo bidi, tama te bomo meni yai bidi dabe aiyaba elalubo bidi yai baso da, teda aga te laiongo bomonama te gaa weyu, te i wabo tiwai ebao, tama te boma pai bea hasa me deli te nai gegeyu bilibo tiwai ebo dao.

16 Te bulu tǫ kantri tonalubo bidigo homu te wiegi yai me elalusiąbo bidigo da, agai te bulude bidi hani bage te aiyaba agalama dolaibao. Tiali digi, te bulu tǫ kantri tonalubo bidigo te we bidi dabego nai anoma eyu, kekebo homu te hagela homu ebo bidigo da, teda aga te sesabi sogo elama, te aga bugagia bidaibao.

17 Bidigo te gasa bidi ela mubaso da, teda aga dwai dene mu saibao. Tama aga te bidibo me te bugagia me dugulalusiąyu, te aga isibo sogoba usu naibao. Bidigo aga tau selamuo.

18 Te bidigo doloba pai kolesaga wali peyu da, te Godigo aga tonaluyu, aga bugagia bidaibao. Tiali goli, te bidigo dwai kolesaga yali da, te polo mu tama aga dolaibao.

19 Te bidigo gi sę ebaso da, te agai gide nai hauwa elaluaibao. Tiali goli, te bidigo te aga page elalusiąbo haniani sę yali da, teda aga magi doado bage meni yai dwai mu bidaibao.

20 Te bidigo doloba pai kolesaga wali pobaso da, teda te Godigo agaba wiegi yai sę mu yaibao. Tiali goli, te bidi aga polo mu tama te mone hauwa elalubo bidi pedelabo homu ebaso da, teda te Genuai Bidigo aga odolali me pomainu egobeo. Menio. Te agaba te dwai dene mabo sę yaibao.

21 Te bidigo bidi me deli te po tųde tau siyu, te gasa bidi aiyaba elalubo te dolo sę me ebeo. Tiali goli, te dwasianu homu bega sabo monego naga te bidi meba te dwai kolesaga ebo sęba kekebo dao.

22 Te aga doado bage yogo ela sabo bidigo, aga te mone hauwa elalubo bidi pedalubo sę bomo polo yaibao. Tiali goli, aga te magi nai meni yai dwai mu pedelabo te agai me konebeo.

23 Nago te bidi me deligo kolesaga dodolobaso da, teda agai nagede wiegi yai pemene mu yaibao. Te kolesagago agabolo te homu bega sabo ili po wabo kolesaga te aiyaba mu elaluaibao.

24 Te bidigo aga aya idago doado bage wi selama digi, tama te po weyu, “Eno te dwai kolesaga me ebeo,” po obaso da, teda aga te doado bage dabe dolobo tobage bidi tiwai dao.

25 Te bidigo homugo te doado bage hauwa sabo homu ebo bomo ebaso da, teda agai kolesagade te bidi hauwago te wado po omainu ilibao. Tiali goli, te Genuai Bidiba konealubo homu bomo eyu dąų wabo bidi da, te aga bugagia bidiyu, tama doado bage hauwa elaluaibao.

26 Te bidigo te homu eyu, te aga koneani kolesagago digi te aga tau selama, te tigidali sę ebo usu yaiba homu yali da, teda agade te wiegi yai homu kolesaga me elalubeo. Tiali goli, te bidigo te wiegi yai homu ebo kolesaga wali pobaso da, teda aga bugagia mu bidaibao.

27 Te magi doado bage meni yai bidi dabe nai mabo bidi da, te agade te doado bage dabe te munu me sǫą pogobeo. Tiali goli, te bidigo te magi doado bage dabe meni yai bidi dabe sulama, tama augwali tau sabo homu meni yai da, teda te bidi dabego te aga dwai bidi da po waibao.

28 Te dwai kolesaga ebo bidi dabe te bulu kantri tǫ pedai tonaluabo tobolu bidi te pedalubo sogo, te we bidi dabe augwalide geme duala saibao. Tiali goli, te bidi dabe isai madigi da, te doloba pai bidi dabego hani te genuai bidi pedelaibao.

Copyright information for `MPS