Proverbs 29

Te bidi me deli augwaligo hauwa sogo dodolali, tiali goli te aga hagoma ebo sę te umabo pedaludubaso da, teda polo tama mu te aga dolama, tama augwaligo aga tau sabo sunumi menia saibao.

Te doloba pai bidi dabe te bomai hani pedalubo sogo, te tigidali we bidi wiegi yai homu pemene yaibao. Tiali goli, te dwai kolesaga ebo bidigo te gavman sę ebo polalubo bidi bidiyu, te tǫ tigidali tonaluali da, teda tigidali we bidi te haliga sęgę mu eyu, tama dwai gela wabo dao.

Te wiegi yai homu kolesaga sainu homu ebo bidi, agai te aga aya wiegi yai homu pemene ilibao. Tiali goli, te penani we wali pabo bidi da, agai te aga mone tigidali besela sąna silaibao.

Te gavman polalubo bidi kingo te doloba pai kolesagago te tigidali we bidi bidibo tǫ tonubaso da, teda te tǫ kantri bomo elaluaibao, tama te we bidi dabe bugagia bidaibao. Tiali goli, te gavman bidi kingo te we bidigo mone sabo homu naga eyu da, teda agai te aga tonalubo tǫde bidibo we bidi te aiyaba mu elaluyu, augwali dolaibao.

Te bidigo tibo homu bega sabo po obaso da, te tiwai agai te wa kekelama, te aga abagi tola somainogo ebo tiwai ebao.

Te dwai kolesaga ebo bidi da, te aga tola somainu te aga digi te wa me deli mubo tiwai ebao. Tiali goli, te doloba pai kolesaga ebo bidi dabe, augwa te wiegi yai pemene elama, tama te balia po dabe wabo dao.

Te doloba pai bidi dabego te magi nai meni ebo bidi dabe tau sabo homu ebo dao. Tiali goli, te dwai kolesaga ebo bidi dabe, augwaligo te kolesaga ebo hagela mu ebo dao.

Te hagoma ebo bidi dabego te taun bidi dabego te hale sębę ilama, tama augwade digi te dwai wado homu emainu yaibao. Tiali goli, te wiegi yai homu elalubo bidi dabe, augwaligo te bidi dabego wado homu ebo te isilama, tama te bidi dabe augwa haliga nagame ma igulubo dao.

Te wiegi yai homu elalubo bidigo te wiegi yai homu elalusiąbo bidi me deli te po tų ilibaso da, teda te wiegi yai homu elalusiąbo bidigo, agai te wado po me weyu, te posobo po naga waibao, tama te pedauwali me pania sogobeo.

10 Te gasa bidi ela mubo bidi, agai te doloba pai kolesaga ebo bidi dabe te wei homu mu me egobeo. Tiali goli, te doloba pai kolesaga ebo bidi dabego homugo da, te gasa doloba pai kolesaga ebo bidi dabe te bugagia bidimainu homu eyu, augwali seselalubo sę ebo dao.

11 Te wiegi yai homu kolesaga meni yai bidigo te aga haliga sębę ebo te hanilama pedalumainu yaibao. Tiali goli, te wiegi yai homu elalubo bidigo da, te aga haligade sębę ebo te palia sabo dao.

12 Te kantri tonalubo tobolu bidi aga te bidi dabego tibo po ola momainu eyu da, teda te dwai kolesaga naga ebo bidi dabe te aga sę ebo ofisa bidi naga bidaibao.

13 Genuai Bidigo te gedu tigidali we bidiba mawai, tama augwa tonobaso, usu yaibao. Agai te magi nai meni ebo bidi dabeba me mayu, tama me agai te magi nai meni ebo bidi dabe aiyaba elalubo bidi dabeba me mayu yalio.

14 Te kingo te magi nai meni ebo te bidi dabego po tų dolo dagalobaso da, teda te sesemane te king te aga hani sibide pedelama elaluaibao wali.

15 Te nago naga wai dodoliyu, te keloago elibaso da, teda aga wiegi yai homu sabo kolesaga koneaibao. Tiali goli, te waigo aga homu kolesaga digi te sesemane sogo wali pidubaso da, teda agai te aga ida hale emainu te ebao.

16 Te dwai kolesaga ebo bidi dabe, augwaligo te bulu tǫ kantri pedai tonalubo sogo, te dwai kolesaga mu ela pabo te i badu mu igi paibao. Tiali goli, te bidi dabe te sesabi sogo elama me bidigobeo, tama te doloba pai kolesaga ebo bidi dabego te augwali dolobo sueibao.

17 Te nago naga ogwa dodolobaso da, te agai wiegi yai kolesaga ebaso, tama nago homu nagame igulama, tama nage wiegi yai homu pemene yaibao.

18 Te Genuai Bidigo po te we bidibolo masiąwai menigi sogo da, teda augwaligo te haniani dwai kolesaga igi da. Tiali goli, te bidigo Godigo bomai po wali pali da, teda aga wiegi yai homu pemene eyu, bugagia bidaibao.

19 Te nago naga sę bidi dali te pogo naga po obaso da, teda nago te agai kolesaga me dodolobaso, usu me egobeo. Agai nago te po odali digi te tagalao, agai wali me pogobeo.

20 Te bidi me deli aga te wiegi yai homu me elalusiąbo bidi yai baso da, teda dago aga tau selama, te aga wiegi yai kolesaga konea somainu homu yao. Tiali goli, te bidigo po homu kone palama, bugagia po wasiąbo bidi yai baso da, teda dago aga tau sabo sę ebo dene mu yaibao.

21 Te nago naga sę bidiba te aga dwasianu elalubo sogo gagalasa, te doado bage madubadi geai baso da, teda nosali te aga nago ogwa mu tiwai pedelaibao.

22 Te haliga sębę polo ebo bidigo te gasa bidi dabego te wado po omainu ilibao, tama aga digi te dwai sę hauwa ebo dao.

23 Te bidigo hagoma homu eyu, tama aga digi aga nogi ugaba sobaso da, te augwaligo aga nogi aiyaba elaluaibao. Tiali goli, te bidi aga digi aga nogi aiyaba elalubo bidi da, te genuai nogi saibao.

24 Te bidigo te nai wi sabo bidi tau sobaso da, teda agaba digi te boi bidi ebao. Te agai te augwali sigo ebo kolesaga hanilibaso da, te augwaligo aga po tų ilaibao. Tiali goli, te agai geme dualubaso da, teda Godigo aga dolaibao.

25 Te aga gasa bidi dabede wi ebaso da, te wa me deli kekelama, tama aga digi te tubo te tiwai ebao. Tiali goli, te bidigo homu Genuai Bidiba bomo elama dąų obaso da, te aga bugagia bidaibao.

26 Te bidi hauwago te bulu tǫ kantri tonalubo tuni bidi dali te homu bega sabo po weyu, te agai augwali wei homu emainogo tebao. Tiali goli, Genuai Bidi agaduba deligo naga te dago po dolo dagaluyu, tama da tau sabo dao.

27 Te doloba pai kolesaga ebo bidi dabego te dwai kolesaga ebo bidi dabe wei homu me egobeo. Tama te dwai kolesaga ebo bidi dabego te wiegi yai doloba pai kolesaga wali pabo bidi dabe wei homu mu me egobeo.

Copyright information for `MPS