Proverbs 30

Gasa bidi dabego dwagi yai po

(Dąį 30-31)

Agurgo po meba wali

Godigo te po Agurba mawai, te Jakego ogwabolo, agai te Itiel me Ukal te bulu side te sęgę yai po pusumainogo yai dao.

Agurgo te tama po wali, “Ena te bidi tiwai isąwai, magi baso meni, eno homu te bidigo homu tiwai me isąwai. Eno homu kolesaga te mu dwai dao. Eno te wiegi yai homu kolesaga me konea sabeo. God te tedali wiegi yai doloba pai mu dao, tiali goli eno aga me konebeo. De te dagaluba ugwa holama, te tǫba aiya ma dulaliwe? Tama dego te asobo wali te nogogo tola saliwe? Tama dego te pǫde wę muani, te bidigo nai me deli te name ugwade munama, tama halubo tiwai yaliwe? Dego te tǫ habu ununani tigidali dąų walama, tama megi tǫ elalubawe? Aga nogi, me aga ogwago nogi de dawe? Te nago koneba, agawe?”

“Godigo po te mu po naga dao. Te agai yaibao po wali sę tigidali, te mu pedelai. Tama agaba pabo bidi tigidali te agai bugagia obo elaluyu, te hwįbo sogo te ami bidi te sabelego bugagia tigi bea sabo tiwai ebo dao. Naga po digi nago te po weyu, te po te Godigo po dao me wagio. Tiyu, agai nage wado iliyu, tama nosali tigidali we bidigo koneyu, nage te tibo po wabo bidi da po wabuo,” wali.

“God, eno te nai si po nageba hanaluabo homu ebao, tama eno homugo nago enabolo momainu homu ebao, te ena tǫde bidibo tigidali sogo nago ena tau somainu eyu, tama eno te tobage tibo po wabo kolesaga dabe te tudiba munama, tama nago ena te mone hauwa elalubo bidi pedalumainu eyu, ma te magi nai meni ebo bidi tiwai pedalumainu eyu me egio. Menio. Nago te ena usu nama nai tama mobaso, te usu dao. Tiyu, eno doado bage hauwa mu elalubaso, tama eno nage tudiba muyu, tama eno te po waidalio, ‘Genuai Bidi de dawe?’ Tama tiyu, ena te magi nai meni yai bidi pedaluyu, tama eno te nai dabe wi siyu, tama eno God nago nogi aiyaba elaluidalio,” wali.

10 “Nage te sę tonalubo bosman bidiba pelama, tama agai sę ebo bidiba posobo po me wagi pelamuo. Tiyu, te sę bidigo nageba te dwai sę emainu i ola mabo po obaso da, tama te nage sęgę elaluabuo.”

11 “Te meba bidi dabego te po wabo dao, Godigo te augwa aya idabolo te dwai sę emainao wabo dao. 12 Te meba bidi dabego te homu ebo dao, augwa te magi nai me delide te magi dwai sę me ebeo homu yali. Tiali goli, augwa sęgę te elalubadi, tama augwali te God gedude meda mu yai bidibao. 13 Te meba bidi dabego homugo augwali te wiegi yai mu da homu elama, tama gasa bidi dabe te olo bage te olo tiwai da homu ebo dao. 14 Te meba bidigo te magi nai meni yai bidi dabeba te dwai sę mu ilaibao. Te hwą bainat me ge hwą me te augwa pedauwalide pągąnalubo tiwai eyu, tama augwaligo te magi nai meni yai bidi dabe tulama, tama tigidali silabo homu ebo dao.”

15 “Te bidi kaneme sabo dwasianu hasamani te benago te wegi si elalubao. Augwa si nogi sabi si tobage elalubao, te tiwai, Ena Mao.”

“Te nai selago te augwa sabo naide te usu dao po munu me wagobeo. Awe, te nai me si me sigo te augwa homu wei ebo, te siminabo me elalubao. Augwali e dao:
16 Te isali bidi dabego gų page dao, me te bidigo sali te wai ame nisiąwai we, me tama tǫgo te wę sali, tiali digi aga te wę hauwa mu sabo homu ebao, me te siago te nai dabe dela siliyu, tiali digi te nai dabe te agade usu meni yaibao.”

17 “Te aga aya idago po sela sąbo bidigo, tama te posobo po augwali siba obaso da, teda aga te isibo sogo te aga tigi me pubalugobeo. Teda te gedeli dabe, me te genuai kemodage ba dabe aselama, aga gedu gudulama, tama aga tigi mi tuaibao.”

18 “Te ena midigi sabo ilibo nai sela te elalubao. E, sela naga meni, te gasagi yai nai mu me si me si te eno augwali konesiąbo nai te elalubao.

19 Te ugwadu bola soabo kemodage bago kolesaga, tama te mone masigi daide ugwadu soabo hasamanigo kolesaga me, tama te genuai tamu ąįdu bilibo sipgo kolesaga me, tama te bidigo we wei homu ebo kolesaga me, te tama te eno augwali konesiąbo nai me si me si elalubao,” wali.

20 “Te wego te we sabo togobo penani ebo kolesaga te tiwai. Aga nai tulama, tama pedauwali tedelama, tama nosali agai te po wai, ‘Eno te magi dwai sę me ebeo,’ wabo dao.”

21 “Te kolesaga sela, woo, te me si me si te tǫde pedelama elalubao. Te kolesaga dabe te dwai mu elama, tama te tǫ aga digi te kolesaga dabe wei isiąbo homu elama, tama te didibili umabo mu ebao. 22 Te kolesaga dabe te tama telalubao. Te olo sę bidigo aga te king pedalubo sogo ebo kolesaga me, tama te homu kolesaga menisąwai bidigo te aga nai hauwa tubo sogo ebo kolesaga me, 23 tama te bidi me deligo te we bidi dabego wei menisąwai we siyu, te we aga dali bidibo kolesaga ebo, tama te sę ebo wego te aga tonaluali wego sę yali pesage hasegelama sabo sogo ebo kolesaga, te tama telalubao.”

24 “Te e tǫde te tobage hasa me si me si tama dwasianu hasamani me elalubao, tiali goli augwa te homu kolesaga te wiegi yai mu elalubo dao. Augwali e dao.

25 Te sagado dabego bomo me elalubeo, tiali goli augwa te nai sǫą pabo sogo tuabo nai te sabobo dao.

26 Te gesia dabe te masigi gabalode bidibao, augwaligo me te bomo meni yai, tiali goli augwa te genuai masigi dabe tomode te bidabo be nigilama bidibao.

27 Te kuli mano dabe augwa tobolu bidi king te menibadi goli, tiali te augwa lain bugagia wasilama bilibo dao.

28 Te dwasianu yalawai yoganu dabe, dago nogogo sabo usu goli, tiali digi augwa te kingo genuai bede bidibo dao.”

29 “Te gasa boma pai mu bilibo nai te sela, ma me si me si elalubao. Augwali e dao. 30 Te laion dabe te boma pai mu elaluyu, te gasa hasa sibi aiyaba elalubo dao. Te augwali bilibo sogo, augwali te magi nai me delide wi me eyu me egobeo. 31 Me te omai ba kakaruk dabego te tobolu ugwaba dodolama bilibo dao, tama te omai kibu meme dabe me tama tibo dao. Me te kingo te aga bomo mu eyu ebo sogo te boi bidi dabego agai aiyaba elaluainu ebaso, usu me egobeo.”

32 “Te nago dobo sę ebo kolesaga eyu, tama nago hagoma eyu, naga digi nogi ugwaba siyu, ma nago dwai kolesaga yabo homu ebaso da, teda nago pedauwali pania selama, tama te kolesaga tagalao. 33 Te nago bulmakaugo ame tola selama, tama nago pepegane da, teda te ame pę bata pedelaibao. Tama te tiwai me nago te bidi me deligo guniba elibaso da, teda te kaneme pedelaibao. Te tama tiwai naga, te nago te bidi dabe wado po omainu ilibaso da, teda te hwįbo dao,” wali.

Copyright information for `MPS