a[Hi 12:13]

Proverbs 4

Dagego wiegi yai homu kolesaga koneama sao

Te wai dabe o, dagego te duga aya eno po bugagia odao. Olo bugagia mubaso da, te dagego wiegi yai homu kolesaga saibao. Te eno nagebolo mabo po, te wiegi yai mu, tama tibaso, dagego munu me sąnamu dao. Te idago gasa wai me ame nabe, te ena deli naga, tama agai homugo ena godolo mu yali. Tama ena dwasianu ogwa bidibadi, te eno ayago ena ola mani. Agai enabolo te tiwai po wali, “Te nago homuba eno po bugagia munama, tama dolo wali pao, tama nage bugagia mu bidaibao,” po wali. “Nago homu wiegi yai elama, te nago wiegi yai kolesaga koneama sao. Nago eno po te munu me sela sąyu, ma homugo gegeda pelama, tagalu me elamuo. Nago wiegi yai homu kolesaga ebo me tagaligio. Menio. Nago aga godolo mu ebaso da, te agai nage tonaluaibao. Te polasa nago sabo nai, te wiegi yai homu ebo kolesaga. Mu tama, te nago gasa nai hauwa sainu ebadi, tiali goli wiegi yai homu kolesaga da, te polalubo hasia nai mu dao. Nago te wiegi yai homu ebo kolesaga godolo homu elama, tama bomonama dąų ola weyu, tola selama, te agai nageba te genuai nogi mawaibao. Te wiegi yai homu kolesaga nago tobolude sawi yai au tiwai pedelama elalu, tama te kingo mubo wiegi yai madi tiwai elaluaibao,” ayago te po ola mani.

Te tobage sunumi si elalubao

10 Ogwao, nago eno po bugagia odoyu, wali pao, tama tiyu da, nage te tǫde sesabi elama bidaibao. 11 Eno nage te wiegi yai homu kolesaga wali pomainu ola mayu, tama eno nage bilibo dodoliyu, tama nage te doloba pai sunumidu pomainu ebo dao. 12 Nage te sunumidu pali da, te magi nai me deligo te sunumi me pania sisąma, tama nage me tulalugobeo. 13 Sesemane sogo nago eno te wiegi yai po dąų ola sao. Te naga bidibo ulago page tiwai da, tama tiyu nago bugagia tonaluao. 14 Nage te dwai bidi dabego sunumide me biligio, tama nago augwaligo kolesaga wali me pigio. 15 Nago te sunumi mu ela solama, tama te digibulu mu bidigi pao 16 Magi baso meni. Te dwai sę ebo bidi dabego te dwai sę me isąbadi da, teda augwali me pigobeo. Te augwali gasa bidiba te dwai sę bolo elama da, teda augwali te bugagia pibaso usu ebo dao. 17 Te dwai kolesaga ebo, me te gasa bidi dolobo kolesaga, te augwa tubo nai me wę tubo tiwai gilama ebo dao.

18 Te dwai sę ebo bidi dabego wali pabo sunumi te be hulia siyu, mu hulia sai dąų mu wabo tiwai ebao. Augwali te tula muyu, tama te magi naigo te augwali sągąde dolali te augwa me konegobeo. Tiali goli, te doloba pai bidi dabego sunumi da, te giliga kigamu nanobo tiwai elama, tama te giliga nanobo sę bomonama pedelama, te giliga tomo yagasoboba usu nubo dao.

20 Ogwa, te eno poba olo bugagia muao. Mu tama, olo sugunama, odao. 21 Nago eno te po bugagia homude kęą selama, tama nago homuba bugagia muao. Tiyu, nago tagalabuo. 22 Magi baso meni. Te nago eno te po sali da, teda te pogo nageba te bidabo ula mawaibao. Te pogo te nage bugagia mu bidimainu yaibao. 23 Te nage bidabo wiegi yai ula dodolabo wiegi yai homu kolesaga, te naga homude pedelaibao, te wę te idu wę gomo pedalubo tiwai ebo dao. Tama tiyu, tigidali sogo nago te naga homude ebo te bugagia mu tonaluao. 24 Nago te tibo po me weyu, me te tobage po dwai dabe me wagio. 25 Nago te naga painu ebo sunumiba dolo si tonalua pao. Nago gasa tedaliba me tonono pigio. 26 Te nage pabo madiba homu kone bugagia palao, tama tiyu te nago kolesaga tigidali te wiegi yai yaibao. a  27 Nago te naga bugagia bilali te wiegi yai sunumi te me tagaligio. Nage te dolo nogoba, me te pobase nogoba me pelamuo. Menio. Nago te tobage dwai kolesaga dabe ebo te edelama pao.

Copyright information for `MPS