Proverbs 7

Ogwao, nago eno po dąų olama, tola selama, tama nago homude munaluao. Te nago eno po bugagia wali pobaso da, teda nage bugagia bidaibao. Te eno po bugagia tonaluao, te nago naga digi te naga gedu tonalubo tiwai gilama yao. Bidigo po pepade asęyu elalubo tiwai eyu, nago te eno po te naga homuba munama, tama te sesemane nage dali elalua pomainao, te nago nogode te ring sesemane elalubo tiwai gilama emainao. Te wiegi yai koneani homu kolesaga te nage dali sesemane bidimainao, te nago abe mu tiwai, ma abagi mu tiwai elalumainu yao. Tama te gasa bidigo wego nage homu bega somainu eyu, te nage aga dali pagela pimainu ebaso, teda te wiegi yai homu kolesagago nage bagua selama, tama nago te wego po wali painu ebaso, usu me egobeo.

Te bidigo sai wego dwai kolesaga meba ebo po wali

Me sogode ena te ena be windo tede dolalu, tama eno te sunumiba tonaluali. Tama eno suali, te gesi bidi dabe te sunumidu iba soyu, oba soyu ebo suali. Augwaligo te wiegi yai koneani homu kolesaga me elalusiąwai. Tiali goli, me deli te agai mu geda muanio. Te gesi bidi te dwai penani sę ebo we me deligo be pąba pelama, bilali. Te giliga dega sigulama, tama pąde be hulia sainu ebadi dao. 10 Te we te sunumide bilibo wego au tiwai elama, tama aga homugo te bidi homu begelabo homu yai. Tama tiyu, te we pelama, te bidi dali deliba gesabidi ununama, po miani. 11 Te we te hagoma ebo we mu da, tama te bede bugagia me dugulalugobeo. Agai po wabo si, po bomonama wabo dao. 12 Sesemane sogo aga te sunumide, me maketde bilidu geyu, te bidi gegebo sę ebo dao. 13 Eno suali, te wego te gesi bidi tola selama, tama agaba te gesabidi nono nabo suali. Tama wego te aga geduba dolo mu tonalu, te tama po wai, 14 “Te megi eno te God dali deli homu ebo ofa me deli yali, te eno polobadu wali po tiwai gilama, tama te ofa yali nai me dage te eno bede munalubao,” wali. 15 “Tama eno te ena be tagalama, tama eno te nage gege asali. Megi da, te eno nage sualio. 16 Tama me eno bede te piabo wiegi yai bet dodolai elalubo. Eno te sawi wiegi yai sitbet te au yai te betde muani. Te sitbet dabe te Isipdu digibulu asai dao. 17 Tama eno te haniani wiegi yai denami ebo pauda te betde gelali. 18 Nage ena dali aselama, tama da si te gagali, me wiegi yai pemene sę ebo homu me idubadi, te be posolaibao,” wali. 19 “Nage te eno bidide wi me igio. Aga te digibulu mu pelama, bidigi palio, 20 tama aga te polo tama me ma asogobeo. Magi baso meni, agai te mone hauwa aga dali sela peyu pai. Te Sande si pelama, tama te polua tomode, te aga ma asabo homu ebao.” Te wego te po wali.

21 Te wego te aga homu bega sabo pusu yai po hauwa agabolo olama, tama aga haliga polo hodolali. 22 Te bidigo te wego po odolama, tama polo tama agai te we wali peyu, te beba pali, te augwaligo te bulmakau te elabo pesageba odasa pabo tiwai yali. Ma, te esela pabo kolesaga meni yai bidi te kalabus beba odasa pabo tiwai ebo dao. 23 Te bidigo te ene me deligo te aga dini homu enabo te agai me konebeo. Aga te ba me deli te wa elalubo pesageba bola pabo tiwai yali. Tama te bago me konesiąyu, te wago aga tola selama, tama aga te isabo te me konebeo.

24 Tialima, te ogomani dabe, dagego eno poba olo bugagia muiąo. 25 Dagego te duga haliga hogodama, te tobage we wali pomainu me igio. Augwali dali subigila pigio. 26 Magi baso meni, te bidi hauwa mu te tobage wego nogode isama, dolobo dao. Awe, augwali da, te genuai hani mu dao. 27 Te agai beba pabo sunumi te gų pageba pabo sunumi tiwai elalubao. Tama dagego te sunumi wali pobaso da, teda dage te isali bidi dabego pesageba paibao.

Copyright information for `MPS