Psalms 101

Kingo dąų walali po dao

Genuai Bidi, eno te nage
wali mu pabo kolesaga,
me te doloba pai kolesagade tęąbi po obao.
Genuai Bidi, eno nageba homu kone palama,
tama eno te tęąbi po obao.
Te eno doloba pai kolesaga naga wali paibao.
Genuai Bidi, mena sogo nago ena tau sagasaibawe?

Eno te doloba pai kolesaga naga ena bede ebo dao.
Eno te dwai sę ebo kolesagade
usu da me wagobeo. Mu menio.
Eno te God tudiba mubo bidi dabego
kolesaga wei me egobeo.
Ena augwali dali me biligobeo.
Eno te tibo po wabo kolesaga me wali pogobeo.
Tama eno te dwai sę ebo kolesaga
dabeba homu kone me palogobeo.

Te eno te gasa bidi dabeba
posobo po wabo bidi dolaibao.
Tama eno te hagoma ebo bidi dabe
bidimainu me sula tagalogobeo.

Te eno te God wei elama, te wali pabo bidi dabe
augwali naga te eno genuai wiegi yai bede
ena dali bidimainu yaibao.
Tama te wiegi yai kolesaga sesemane ebo bidi dabe,
te bidi dabe naga te eno sę emainu yaibao.

Te tibo po wabo bidi dabe,
augwali te eno genuai bede me bidigobeo.
Tama te tibo po wabo bidi dabe ena dali
bidimainu me egobeo. Mu menio.
Tigidali side eno te dwai sę ebo bidi
te dago bulu tǫ pedaide dolaibao.
Eno te dwai sę ebo bidi dabe sela sąyu,
tama augwali te Genuai Bidigo
taunde bidimainu me egobeo.
Copyright information for `MPS