a[Sai 14:10-12]
b[Sai 14:21-31; 15:1-21]
c[Nam 11:4-34]
d[Nam 16:1-35]
e[Sai 32:1-14]
f[Nam 14:1-35]
g[Prs 26:33]
h[Nam 25:1-13]
i[Nam 20:2-13]
j[Tob 2:1-3; 3:5-6]
k[2 Kin 17:17]
l[Nam 35:33]
m[Tob 2:14-18]
n[1 Sto 16:35-36]

Psalms 106

Godigo wiegi yai kolesaga aga we bidiba yali

[1 Sto 16:34; 2 Sto 5:13; 7:3; Esr 3:11; Tib 100:5; 107:1; 118:1; 136:1; Jer 33:11]

Genuai Bidigo nogi ugwaba sao.
Dago agaba usu da waiyąo,
magi baso meni agai
te wiegi yai kolesaga sesemane ebo dao,
tama agai da sesemane bidada peyu,
bidada pabo wei mu ebo dao.
Dego te agai genuai sę dabe yali po pusaibawe?
Tama dego agai te wiegi yai kolesaga
yalide te agai nogi ugwaba saibawe?
Te agai po wali peyu,
te doloba pai kolesaga ebo bidi dabe
augwa te pemene yao.

Genuai Bidi, nago te naga we bidi
dabe tau sabo sogo,
nago ena me homugo koneao.
Tama nago augwali ma sabo sogo,
nago te ena me ma sao.
Eno te nago hani bage te bugagia dugulama,
tama te wiegi yai nai dabe sabo suabo homu yai,
tama eno augwali dali wiegi yai
pemene yabo homu yali.
Dago te pemene yaibao, magi baso meni,
da te nago hani bidibao.

Dago te dwai sę yalio,
te polobadu dago wąį nǫų dabego
yali tiwai sę yalio.
Dago te dwai sę haniani yai.
Te Isipde te wąį nǫų dabego
te nago yali genuai sę dabe
te bugagia me konesiąwai.
Nago augwali hauwa sogo tau sali,
te nago augwali wei mu ebo homu
te augwaligo koneai.
Tiali goli, augwa te homu tagalu,
tama augwali te nosa elaluali
tamu ąįba sabolali sogo,
augwa te nage Tigidali Bomo
Elalubo Godiba hagoma yai dao. a 
Tiali goli, Genuai Bidigo te aga genuai bomo
augwaliba ola mawainu yali.
Tama tiyu, agai augwali ma selama,
tama augwali me dolobeo,
te agai augwaliba dąų walali po
tiwai gilama yali.
Agai te nosa elaluali tamu ąįba po bomonama obaso,
tama tamu ąį te wa pai tǫ tiwai pedelali.
Tama agai te we bidi dabe peyu,
tama augwa te tamu ąį nogegi pali,
te bidi te wa pai tǫdu pabo tiwai ąǫ yai dao.
10 Agai augwali te augwa boi bidi
dabego nogode ma sali.
Agai augwali tąu selama,
tama te boi bidi dabego augwali me dolobeo.
11 Tiali goli, te węgo te boi bidi dabe mesega selama,
tama augwali isai dao.
Tama me deli te bidibo ula me elalubeo.
12 Genuai Bidigo tama tibaso,
tama aga we bidi dabe augwaligo augwa
te agai dąų walali poba homu kęą pelama,
tama augwa tęąbi wabode
te agai nogi ugwaba sabo po walio.
b 

13 Tiali goli, polo tama mu, te augwaligo
Genuai Bidigo yali sę dabede
homu kone ebo tagalalio.
Tama augwaligo te Godigo po bolo hasia me sabeo.
Augwaligo yali sę dabe te augwa
homugo digi nigilama yalio.
14 Te masigi tǫ wa pai bulude,
augwaligo haliga te tuabo naiba homu hogodalu,
tama augwaligo te God usu sai dao.
15 Augwaligo Godiba te nai po
hanalubaso, tama agai augwaliba
mawai, tiali goli, agai te genuai gasi augwaliba
pedalumainu ilalio. c 

16 Augwali te wa pai bulu pesagede
bidalu, tama bidi mebago
te Moses de Aron sigo ebo sęde
pesa homu yalio, te bidi si
te Genuai Bidigo sę yali sę bidi si dao.
17 Tialima, genuai dedage
te tǫde pedelama,
tama Datan dali, Abiram,
me te augwa si hani dabe dali,
augwali te dedageba tulaluama,
tama te tǫ pania selama,
tama augwali mesega sai dao.
18 Tama augwali wali pali bidi dabeba te sia tulaluama,
tama te siago te dwai sę yali we bidi
dabe ulai dao. d 

19 Augwali te bulu du Horepde bidalu,
tama augwa te bulmakau me deli te golgo nigilama,
tama augwa te tibo godiba lotu wai dao.
20 Augwaligo te nosa tubo bulmakau
piksa selama, tama augwa teba lotu wali.
Te kolesagago augwaligo
te Godigo genuai nogi aiyaba elalubo sę yali.
21 Godigo te Isipde bomai sę mu elama,
tama te Israel dabe te Isip dabego
nogode ma dobola sali.
Tiali goli te Israel dabego te tiali sę
te homu kone me palubeo.
22 Godigo te genuai polalubo bomai
sę dabe te Isipde yali,
tama te nosa yai tamu ąįde
te agai gasagi yai sę mu yalio,
tama te we bidi dabe dwai noma mu sai dao.
23 Tialima, me sogo nosali
Godigo te aga we bidi augwali dolaibao po wali.
Tiali goli, Moses, te Godigo dąį
muani sę bidi, aga te God geduba doligi pelama,
tama agai te Israel dabe tau siyu,
tama Godigo haliga sębę yali togolama panibaso,
tama Godigo augwali me dolobeo. e 

24 Tama nosali augwaligo te wiegi yai
tǫ wei isiąwai, magi baso meni,
augwaligo te Godigo dąų walali poba
homu kęą pabeo.
25 Augwali te ugwa bede bidalu,
tama Godiba wado po weyu yai,
tama augwaligo te Genuai Bidigo po wali me pabeo.
26 Tialima, Godigo bomai po augwaliba
mayu, tama augwali te tǫ wa pai
masigi tǫ bulude isaibao po walio. f 
27 Tama agai te nosali pedalubo
wąį nǫų dabe ela gudulama sela sąyu,
te augwali gasa hani dabe tomoba bidigi pelama,
tama augwali te gasa bulu tǫ pedaide
isaibao, te po wai dao. g 

28 Nosali augwaligo te bulu Peorde
te tibo god Bal dabeba lotu wai dao,
tama augwa te bidibo ula elalusiąbo
te god dabeba ofa mabo nai dabe tuai dao.
29 Te kolesagade te Genuai Bidigo
augwaliba wado yabo sę ilibaso,
tama agai te dwai genuai gasi augwaliba
tagala palai dao.
30 Tiali goli, Finias hogodalu,
tama te dwai sę ebo bidi dabeba
te dwai dene mobaso, tama te genuai gasi silalio.
31 Tama megi sogoba usu nagasu dago
agai te doloba pai kolesaga yali homu kone palubao,
tama nosali nosali me, tigidali we bidigo
te tiwai homu emainu ebo dao. h 

32 Te Israel dabego te Godigo wado
te Meriba węde yabo sę ilali,
tama Moses te augwaligo yali sęde sęgę salio.
33 Augwaligo te Moses haliga dwai mu yabo sę ebaso,
tama te agai te dolo isąbo po wai. i 

34 Te Genuai Bidigo augwalibolo
te gasa hani dabe tigidali ela muao po wali.
Tiali goli, augwaligo te bage tigidali me
ela mubeo. Menio.
35 Te Israel dabego te Godigo po
odisąwani hani bagede we sali,
tama augwaligo ebo dwai kolesaga wali palio.
36 Tama augwa te tibo godiba lotu obaso,
tama tego te Godigo augwa
dolomainu ilai dao. j 
37 Augwaligo te augwa wai ogwa me,
wegi me, ela munama,
te tibo god dabeba ofa yai dao. k 
38 Augwaligo te augwa ogwa me
wegi dabe digi elalio.
Te wai dabego te magi dwai sę me isiąwani,
tiali goli, augwa te augwali elama,
tama augwali te Kenan tibo god dabeba
ofa tiwai elama mawai.
Tama tialima, augwaligo kanemego
te tǫ meda pedelai dao. l 
39 Te kolesagago augwali te God
gedude meda yai pedelalio,
tama augwaligo te God tudiba munama,
tama augwaligo aga wali me pabeo.

40 Tialima, Genuai Bidigo aga we bidi dabeba
te wado mu elama,
tama agai augwali wei ma ebeo.
41 Tama agai augwali tagalama,
te gasa hanigo augwali tonalumainu yali.
Tama tiyu, augwali te boi bidi dabego dologode bidiyu,
tama te boi bidi dabego nogode bidai dao.
42 Te boi bidi dabego augwaliba sęgę hauwa menama,
tama augwali te augwaligo bomo
dologode mu bidalio.
43 Te hauwa sogo mu Genuai Bidigo
te aga hani bage tau sali,
tiali goli, augwa digi te augwa homu wali ma peyu,
tama augwa hagoma elama, tama agai po sela sąyu,
tama augwa te dwai sę ebo kolesaga
tomoba mu palio.
44 Tiali goli, augwa te Genuai Bidiba
i weyu, gedu haluasa po wabo sogo,
agai te augwaligo gedu haluasa po odolama,
tama augwali te dwai bidibo te homu dene yalio.
45 Agai augwali homu dene mu elama,
tama aga dąų walali poba homu kone ma palali.
Tama aga homu ma hasegelalio.
46 Agai te Israel dabe kalabus yali
boi bidi dabego homu hodolobaso,
tama augwaligo te Israel dabe
homu dene yalio. m 
47 God, dena Genuai Bidi, nago da te
gasa hani dabego nogode ma sao.
Tama nago da te dena tǫba ma odasa asao.
Tama tiyu, dago nageba homu kone paliyu,
te nage tedali wiegi yai mu da, te homu elama,
tama dago nago nogi ugwaba siyu,
tama nageba te usu da weyu,
te wiegi yai pemene dali mabo dao po wagameo.

48 Dago te Genuai Bidigo nogi
ugwaba sao, te da Israel dabego God,
megi, me tigidali sogo nosali.
Tama tigidali we bidigo te po waiyąo, “Mu dao,” wao.
Genuai Bidi nogi ugwaba sao po wao. n 
Copyright information for `MPS