a[Hi 5:6; 6:20; 7:17, 21]

Psalms 110

Te Devitgo asęani balia po me deli dao.

Genuai Bidi dali, te aga sa muani king dali side po wali

[Mt 22:44; Mk 12:36; Lu 20:42-43; Tpi 2:34-35; 1 Ko 15:25; Ef 1:20-22; Kl 3:1; Hi 1:13; 8:1; 10:12-13]

Yawe Genuai Bidigo eno genuai bidiba te
tama po wali,
“Nago eno dolo nogode dugulalu, te nago boi bidi dabe
te eno nage dologoba mubo sogoba usu naibao.”
Yawe Genuai Bidi te Saionde bidiyu,
tama agai nago te bulu hauwa tonalumainu
nigilama, tama agai te po waibao,
“Nago naga boi bidi dabe tonaluao,” waibao.
Te nago te boi bidi dabe dali hwįainu ebo sogo,
te naga hani bidi dabego usu da,
pinao po weyu, te nage dali pelama,
tama nage tau somainu yaibao,
tama dage te Godigo bulu duba ugwaba holaibao.
Tigidali sogo hulide tulubage wę segeni te nosade pedalu,
tama te nosago gesi bomo siyu ebo dao.
Tama nage me nage te tigidali sogo bomo saibao.

Yawe Genuai Bidigo nageba po
dąų waliyu, te tiwai wali,
“Nage te pris sesemane bidada peyu,
bidada pagameo,” wali.
“Nage te pris Melkisedek tobage tiwai dao.”
Genuai Bidigo te mu po naga weyu,
tama agai te aga po me
hasegeligobeo. a 

King bidi, Yawe Genuai Bidi nage dali dolalu,
te dąų walainu yaibao.
Te aga haliga sębę ebo sogo
agai te king dabe dali hwįnama,
te agai hwįbo te ugwaba ela holama,
tama augwali aiyaba mu elaluaibao.
Agai te we bidi hani dabego
dwai sę yali wei ponama,
tama te hwįbo pesagede agai
te bidi hauwa ela muaibao.
Agai te tigidali tǫ pedai badu te king
dabe aiyaba elaluyu, agawaibao.
Agai te sunumi pąde elalubo
te dwasianu ąį gamiade elalubo wę tuaibao.
Tama tialima, aga te bomo selama,
tama te hwįbo ugwaba ela holaibao.
Copyright information for `MPS