Psalms 12

Te Devitgo asęani balia po me deli dao.

Te gedu haluasa po wabo bidi da, te Godigo aga tau saibao

God, nago da tau sao.
Te wiegi yai bidi deli me bidibo menio.
Te doloba pai bidi dabe subo me usugobeo.
Te tigidali bidigo te gasa bidi dabeba
tibo po wabo da.
Te homu bega sabo pogo augwali
te geagano bilibo tiwai ebo dao.

Genuai Bidi, nago te homu bega sabo
po wabo bidi dabe pedauwali paniama,
tama te hagoma ebo bidi dabe
pedauwali me paniao.
Te bidi dabego te tama po wai,
“Te dena digi dena homugo po waibao,” wai.
“Te mena bidi mego da me paligobeo,” wali.
“Dego da tonalubo dawe?”

Tiali goli, Genuai Bidigo te tama po wai,
“Te megi da, ena asaibao, magi baso meni,
te magi doado bage meni yai bidi dabe te bidi
dabego aiyaba elaluai.
Tama te dene me sęgę tolali bidi dabe,
te augwaligo gela udali.
Te eno augwali te bugagia bidabo
te augwa sainu tonaluali madi, teba muaibao,” wali.

Godigo dąų walali po te mu po naga dao.
Agai po te wiegi yai mu,
te wiegi yai kapa silva tiwai dao,
tama te silva augwaligo te a naga olama,
nogo me badu si,
te tama sogo siaba ulama, te dwasianu meda
mu meni yai tiwai mu dao.
Genuai Bidi, da bugagia tonaluao.
Te sesemane sogo da bugagia tonaluao,
te tobage bidi dabego da dolomainu me egobeo.
Te dwai sę ebo bidi dabe
te tigidali habu badu bilalubao.
Tama tigidali we bidigo te dwai sę ebo kolesaga
te wiegi yai nai da homu ebo dao.
Copyright information for `MPS