Psalms 128

Godigo te aga po wali pabo we bidiba wiegi yai sę bugagia ebo dao

Te Genuai Bidide wi elama, tama agai
po wali pabo we bidi dabe,
augwali te wiegi yai pemene ebo dao.

Tama te naga yali sęde te mone selama,
te nago sǫą pali doado bage abelibaso, te usu yaibao.
Tama nago ebo sę tigidali te wiegi yai
pedelama, tama nage pemene yaibao.

Te nago we da,
te wain bonogo te nai hauwa walubo tiwai yaibao.
Tama nago wai dabego te nago nai tuabo
tebol sai bagua selama,
te gesi ni oliv dugo bagua sabo tiwai yaibao.
Mu tama, te Genuai Bidigo po wali pabo bidi da,
te aga te tiwai wiegi yai nai sabo dao.

Genuai Bidi te Saionde bidibao, eno homugo agai
te nage wiegi yai sę ilaibao.
Me eno homugo te tigidali sogo nage te tǫde bidibo sogo
te nago te Jerusalemde tigidali nai te bugagia mu
pedalubo suaibao.
Eno homugo nage sesabi elama,
bidimainu homu elama, te nago naga wąį nǫų dabe
sumainu ebo dao.
Te Israel dabe bugagia dugulalumainu elama,
tama te hwįbo menia somainu yao.
Copyright information for `MPS