Psalms 139

Te Devitgo asęani balia po me deli dao.

Godigo da mu konea pelama, tama da bugagia mu tonalubao

Genuai Bidi, nago eno homu osola sulama,
tama nago ena mu konea pai dao.
Nago te eno ebo sę tigidali mu konea pali.
Nage digibulu bidibao,
tiali goli nago eno homu kolesaga
tigidali konea pai dao.
Nago ena te sę ebadi,
me te godege pibo sogo, te subo dao.
Nago eno kolesaga tigidali koneanio.
Tama eno te po me deli wainu ebaso da,
nago te po polo koneanio.
Nago ena tigidali mu bagua selama,
tama te nago bomogo te nago ena tonalubo dao.
Nago te koneani homu kolesaga
te ena daide ugwanu mu elalu,
tama eno homu kolesaga te aiyaba elaluai dao.

Te ena menaba peyu, tama eno
te nago hoboludu ogwa wai taga pogowe?
Tama ena menaba wi pelama,
te nagede geme duala sigi paibawe?
Woo, te duala sigi pabo bulu menio.
Ma, te ena dagaluba ugwaba holama, bidainu ebaso,
nage te dagalude bidibao.
Ma, ena te isali bidi dabego pesageba bidigi pobaso da,
nage te bulude me bidibao.
Te ena te giliga pedalubo badu
te digibulu bola pigi sogo da,
ma ena te giliga dega sigilubo badu
digibulu bidigi peyu da,
10 teda nage te pesagede me bidiyu,
te ena bilibode te sągą dodolu,
tama te ena tau sigi dao.
11 Tama eno te po weyu,
“Te hulia sabogo ena geme duala sao,” po obaso,
“tama te giliga ulago ena bagua selama,
te hulia somainu yao,”
12 tiali goli, tagalao, te nago gedude te be hulia sabo
te be mu hulia sabo tiwai egobeo.
Tama hulide te ula mu eyu,
te giliga ula tiwai yaibao.
Be hulibo, me be posobo, te nago gedude
te deli tigi tiwai naga dao.

13 Nago eno tigi pedai tigidali badu nigali.
Nago ena tigidali te idago haliga tomode nigai dao.
14 Ena nagede wi ebaso,
tama eno nago nogi ugwaba sobao.
Tigidali nai nago nigali, tede eno midigi sabo dao,
te tedali gasagi yai mu elama,
tama te wiegi yai sawi yai mu dao.
Nago te ena mu bugagia koneama,
tama ena mu konebao.
15 Te ena idago haliga tomode
geme dua dua pedalubo sogo,
nago te eno tigi dili ununama,
te deliba dąų wabo te nago tigidali suai dao.
16 Ena te haga piligai wai idago
haligade bidibadi digi, nago ena suai.
Ena te tǫde pedalisiąbadi,
tiali goli, nago te naga bukude asęani
te nago homugo te tigidali sogo ena
te tǫde sesabi elama, bidabo bodolu asęai dao.
17 God, te eno nago homu kolesaga
tigidali koneabo te ena kone tųa pobao.
Iya, tegobao. Nago homu kolesaga
te dwasianu me menio.
18 Te augwali eno nedebaso da, teda nambago
te nabisde wę kemi masigi sane
te aiyaba mu elaluaibao.
Te ena pilama, hodalubo sogo
te ena nage dali me bidibao.

19 God, eno homugo nago te dwai sę ebo bidi dabe
ela mumainu homu ebao.
Tama eno homugo te hwįbo bidi dabego
ena tagalumainu homu ebo dao.
20 Te bidi dabego te nageba po dwai wali.
Tama augwaligo te haniani dwai po
nago nogide wabo dao.
21 Genuai Bidi, eno te nage
wei homu isiąbo bidi dabe
augwali te eno wei homu me ebeo.
Tama eno te nageba hagoma homu ebo bidi dabede
te dwai haliga mu ebo dao.
22 Mu tama, eno haliga augwalide pania selama,
tama eno te bidi dabe wei mu me ebeo.
Eno augwali te ena boi bidi dabe subo tiwai ebao.

23 God, eno homugo nago ena bugagia dagala sulama,
tama nago te enade elalubo
homu kolesaga tigidali koneao.
Ena usu siyu, tama nago te eno homu kolesaga
tigidali bugagia koneao.
24 Nago ena bugagia dagalao,
tiyu te tibo homu meba enade elalu idalio.
Tama nago ena te bidada pabo ula sabo sunumidu
odasa pao.
Copyright information for `MPS