a[Ro 3:10-12]

Psalms 14

Te Devitgo asęani balia po me deli dao.

Dwai kolesaga ebo bidi dabede elalubo po

Kolesaga meni yai dwai sę ebo bidi dabe
augwa hasi te po wabo dao,
“God bidibo menio,” wabo dao.
Te bidi dabe augwali te dwai bidi dao.
Augwaligo dwai kolesaga mu naga ebo dao.
Bidi me deligo dwagi yai kolesaga me ebo menio.
Genuai Bidi dagalude bidiyu,
tama agai tǫde bidibo we bidi aiyaba tonalubo dao.
Agai te kolesaga koneai bidi me deli gegeyu,
te God gegebo sę ebowe naga suainu tebo dao.
Tialima, menio. Tigidali augwaligo dwagi yai tų
wali pabo tagalai.
Tigidali tiwai naga yai,
augwali dwai bidi mu pedelai dao.
Tama augwali me deligo dwagi yai kolesaga me ebeo.
Mu menio. a 

Genuai Bidigo te po wai, “Te bidi dabe augwaligo
dwai kolesaga yai,
augwaligo homu kolesaga meni, agawe?
Augwaligo te eno we bidi dabe ela silibao,
te augwaligo te bret tubo tiwai gilama te mu silibao.
Tama augwaligo enaba gedu haluasa
po wabo menio,” wali.

Tialima, te bidi dabe augwali wi mu yaibao.
Magi basowe, God aga te agai
po wali pabo bidi dabe augwali dali bidibao.
Te dwai sę ebo bage augwaligo
te nai meni yai bidi dabego yainogo ebo sę dali
gisugu mabo dao.
Tiali goli, Genuai Bidigo te nai meni yai bidi dabe
augwali bugagia tonalubo dao.

Eno homugo Genuai Bidigo Saion bulu bidi me deli
tagala palama,
Israel we bidi ma somainogo te homu ebao.
Nosali Genuai Bidigo aga hani bidi tau selama,
tama augwali bugagia ma bidimainogo yaibao,
tialima, Israel hani augwali homu dwagi yai emainogo.
Ao. Te Jekop aga hani bage augwaligo
dwagi yai homu mu yaibao.
Copyright information for `MPS