Psalms 142

Te Devit aga te Solde wi pelama, tama ola be tomode geme dualali sogo, te sogo agai e gedu haluasa po wabo balia po asęani. [1 Sml 22:1; 24:3]

Bidi me deligo te Godigo aga tau somainu, gedu haluasa po wali

Eno te Genuai Bidiba bomonama i weyu,
te agai ena tau somainu ebao.
Eno agaba te hanalubo sę bomonama weyu, te agai
homu dene eyu,
ena tau somainu ebao.
Eno agaba te enade elalubo
te homu dogia pabo homu tigidali,
me te enaba pedalubo tigidali sęgę po walali.
Te eno haliga sęgę mu ebo sogo,
tama eno homugo ena dolaiba homu yai, te eno
pabo tų te nago koneanio.
Te eno sunumide te bidi dabego
ena tola sabo bono gągą geme dualama, elalubao.
Eno ena pąde tonono bilali,
tiali goli, te ena tau sabo bidi me
elalubo te eno me subeo.
Ena menaba wi pogowe?
Te enade homu kone palobo bidi meni.
Tama tialima, Genuai Bidi, eno i nageba weyu,
te nago ena tau somainu ebao.
Nage naga te ena tonalubo bidi dao.
Te ena bidibo ula elalubo sogo digi
eno homugo te nagaduba deli naga
te ena dali bidimainu homu ebo dao.
Te nago ena tau somainu, te eno nageba i wabo odao.
Magi baso meni, eno haliga te sęgę mu ebao.
Te enaba dwai sę yainu ebo bidi dabe
augwaligo te bomo mu ebaso,
tama eno augwali aiyaba elaluainu
ebo usu egobeo.
Tama tiyu, nago ena
te augwaligo nogode ma dobola sao.
Awe, nago ena te sęgęde ma selama,
tama ena te bugagia bidimainu yao.
Tama tiyu, te doloba pai we bidi dabe
sisinibo pesagede te eno nago nogi ugwaba saibao.
Magi baso meni, nago enaba wiegi yai sę ebo dao.
Copyright information for `MPS