a[Jop 7:17-18; Tib 8:4]

Psalms 144

Te Devitgo asęani balia po me deli dao.

Te Godigo aga te tau selama, te boi bidi aiyaba elalubaso, te kingo usu da po wali

Eno te God nogi ugwaba sobao.
Agai ena bomo elama, tonalubo dao.
Agai enabolo te hwįbo kolesaga bugagia ola mobaso,
tama agai eno te hwįabo sisi elalumainu yalio.
Agai te ena godolo ebo God da, tama ena sesemane
bobegelalubo dao.
Tama aga te geme duala sabo pesage
elalu, te ena ma sali.
Eno konealubo homu agaba kęą pobaso,
tama agai ena bugagia bidimainu ebo dao.
Agai te Israel hani isąwai we bidi dabe aiyaba elaluama,
ena dologoba munama, bidibo dao.

Genuai Bidi, da we bidi te magi nai da weyu,
tama nago dade homu kone ebawe?
Da te olo bage tiwai, tialima magi baso
tama nago dade homu wei ebo dawe?
a 
Da te pedauwalide mobo
deli sogo naga te pedalubo tiwai ebao.
Da te pęwadage sogo naga bidibao,
te giligade noma pedelama,
tama te polo hagabo tiwai ebao.
Genuai Bidi, nago te dagalu
buga sąnama, tama dulao.
Te nago nogo te bulu du dabeba mubaso,
tama te hano genuai pedelaibao.
Te dagalu be sele pedalumainu elama,
tama te boi bidi dabe sela sąyu, tedela palao.
Awe, te nago ene baso, tama te augwali wi pomainu yao.
Nago nogo aiyaba munama,
tama nago ena te Israel hani isąwai
we bidi dabego bomode ma sao,
te bidigo nogo aiyaba munama,
tama gasa bidi ugwaba keka selama,
tama aga te moni wę gede mu bidali
tagalobo tiwai yalio.
Te bidi dabego te mu po me wasiąwai,
augwaligo te nogo guni sisu muyu, mu po da weyu,
tama tibo po dali wabo dao.

God, megi da, eno te gesi balia po nageba waibao.
Te eno gita eliyu,
tama nageba balia waibao.
10 Nago te Israel hanigo king dabe te hwįbode tau siyu,
tama augwaligo te boi bidi dabe aiyaba elalubo dao.
Tama dwai boi bidigo ena
te moni hwągo elidali weyu,
nago naga sę bidi, ena Devit, ma sabo dao.
11 Te dwai sę mu ebo boi bidi dabego
nogode nago ena ma sao.
Tama ena te Israel hani isąwai dabego nogode ma sao.
Augwa te mu po me wasiąma,
tama augwa te nogo guni sisu muyu,
te mu po da weyu, te tibo po dali wabo dao.

12 Dago homugo te dago ogwa dabe
te gesi ogomani te augwali
te bomo yai ni dabe tiwai pedalumainu homu ebao.
Tama dago homugo te wegi dabe
te kingo te genuai be pos au ilibo
wiegi yai piksa noma tiwai pedalumainu homu ebao,
augwali sawi yai wegi dabe pedalumainao.
13 Dago homugo te gi dabede te nai
hauwa walomai homu elama,
tama te nai mubo be mu pągąmainu homu ebao.
Tama te sipsip dabego te wai dabe
umabo umabo mu ame nomainu homu ebo dao.
14 Tama te bulmakau dabego me
te wai dabe hauwa umabo ame nenama,
tama te wai dwai me pedalisiąma,
tama te me deli isiyu, me eyu egobeo.
Dago homugo te dena hanu tomode
bidibo bidi me deligo, ma we me deligo me,
te sęgę me dene te hanu tomode pedelamuo.

15 Te tiwai wiegi yai nai sabo
we bidi hani, augwa te wiegi yai pemene yao.
Awe, te we bidi dabego te Genuai Bidi augwa
God da homu elama bidibo we bidi dabe,
augwali me te wiegi yai pemene yao.
Copyright information for `MPS