Psalms 145

Te Devitgo asęani balia po me deli dao.

God nogi ugwa sabo balia po dao

God, me eno tuni bidi,
te eno nago genuai nogi po pusaibao.
Tama sesemane sogo bidada peyu,
eno nagebolo usu da po waibao.
Tigidali sogo eno nagebolo usu da po waibao.
Tama sesemane sogo bidada peyu,
eno nago nogi ugwaba saibao.
Genuai Bidigo genuai nogi elalubo,
tama dago agai nogi ugwaba mu sidu geao.
Agai ugwanu mu elaluyu,
tama dago agai genuai nogi tigidali koneainogo ebo
te usu me egobeo.
Magi baso meni, dago homu kolesaga te habuge dao.

Megi bidalubo we bidi hani
augwaligo te gasa nosali pedalubo hanibolo nago
ebo sę po pusuyu,
tama augwaligo nago nogi ugwaba saibao.
Tama augwaligo nago genuai sę yali po miaibao.
Te bidi dabe augwaligo nago bomo elalubo po weyu,
tama nage genuai tuni bidi mu da waibao.
Tama eno digi te eno nago dwagi
dwagi yai sę ebo da homu ebo dao.
Tama te we bidi augwaligo nago
bomo yai sę ebo po weyu,
te bidigo isiąbo sę naga dao,
tama eno nago genuai sę yali po pusaibao.
Te augwaligo nago wiegi yai kolesaga
hauwa ebo po pusuyu,
tama nago olo mu tau sabo kolesaga po olama,
wiegi yai homu pemene eyu, balia po waibao.

Genuai Bidigo da godolo mu eyu,
homu dene eyu, tama da olo tau sabo sę ebo dao.
Agai wado po polo wasiąma,
tama sesemane sogo agai da wei mu ebo dao.
Agai wiegi yai sę tigidali we bidi dali eyu,
tama agai nigali nai tigidali homu dene eyu,
dolo mu tau selama, mabo dao.

10 Genuai Bidi, nago nigali nai
tigidaligo nago nogi ugwaba saibao.
Tama nago we bidi
augwaligo nagebolo usu da po waibao.
11 Te augwaligo nago genuai nogi
te nago tonalubo bulu tigidalide elalubo po weyu,
tama nago genuai bomo elalubo po waibao.
12 Tama tibaso, tigidali we bidi
augwaligo nago genuai sę ebo konemainogo yaibao.
Tama nage bomo yai tuni bidi bidibo
te augwaligo konemainogo,
tama nago nogi genuai mu dao.
13 Tama nage te tuni bidi bidiyu,
tama tigidali we bidi sesemane sogo
nago tonaluyu, bidada peyu, bidada paibao.

Genuai Bidi Godigo agai aga we bidi dali dąų wali po
wali naga pabo dao.
Te agai me deli tagalobo menio.
Agai wiegi yai sę naga eyu, da tau siyu ebo dao.
14 Agai te tigidali sęgę elalubo we bidi,
me te gasa bidi dabego aiyaba elalubo we bidi,
augwali tigidali agai ugwaba siyu, tau sabo dao.
15 Tama te bidibo ula elalubo nai
tigidaligo agaba tonono ebo dao,
tama agai augwali nasi ebo sogo nai mabo dao.
16 Awe, agai augwali usu elama,
bugagia bidimainogo tigidali nai mabo dao.
17 Godigo doloba pai kolesaga naga wali peyu,
tama agai da olo mu tau sabo kolesaga mayu,
te agai tigidali ebo sęde tebo dao.
18 Tigidali we bidigo homu agaba mu
munama, i weyu da,
teda aga augwali pąde bidibo dao.
19 Te agade wi ebo we bidi, te augwali nai meni baso,
teda agai augwali nai mabo dao.
Tama agai augwali gela wabo odolama,
te augwali ma sabo dao.
20 Agai te aga godolo mu ebo we bidi
bugagia tonalubao.
Tiali goli, te dwai kolesaga ebo we bidi,
augwali dolaibao.

21 Te eno Genuai Bidigo nogi
sesemane sogo ugwaba saibao.
Tama tigidali nai agai nigali,
dagego aga wiegi yai olo bugagia
bidibo nogi sesemane bidada pabo
sogo ugwanu mu sao.
Copyright information for `MPS