Psalms 20

Te Devitgo asęani balia po me deli dao.

Te gedu haluasa po wabo bidi te Godigo aga tau siyu, te boi bidi aiyaba elaluaibao

Devit, te Genuai Bidigo sę bidi, agai te balia po asęani. Agai te po Godiba wali te ula te bubugade Godigo aga tau selama, tama te boi bidigo aga aiyaba me elalusiąyu, tama te Solgo aga me dolobeo. Te po olama, te balia asęai dao.

Dago king bidio, eno homugo
te nage haliga sęgę ebo sogo,
te Genuai Bidigo nage tau somainu yao.
Mu tama, te Jekopgo Godigo nage seselaluaibao.
Awe, agai nogigo bomogo tama tiao.
Aga te aga wiegi yai be mu te Saionde bidibao,
tama agai nage tau selama,
tama nage dąų walomainu yao.
Agai te nago ofa tigidaliba homu koneama,
tama agai te nago tigidali
te siaba ulubo ofa te wei elama, godolo yao.
Eno homugo Godigo te nago wei ebo nai
tigidali momainu yao.
Tama nago yainu homu yali sę tigidali
te agai nage tau sobaso,
tama nago te sę ebo usu yaibao.
Tama nosali nago te hwįani aiyaba elalubaso da,
teda dago nago te yalide
wiegi yai homu pemene eyu, bomonama i waibao.
Tama dago te homu koneama,
tama dili buduama, tama dago
dobuali balia po weyu,
dena Godigo nogi ugwaba saibao.
Dago homugo te Genuai Bidigo
nago te gedu haluasa po wabo po tigidali odaibao.
Te kingo te po wei ponani po wali.
Megi da, eno koneanio,
Genuai Bidigo ena tau sabo da, te king aga digi sa muani.
Aga te aga wiegi yai tedali bulu dagalude bidibao,
tama agai eno gedu haluasa po wabo odobo dao.
Te agai bomode digi agai ena tau selama,
tama eno hwįbo side te eno augwali
aiyaba mu elalubo dao.
Te meba hanigo hagoma eyu,
te hwįbo karis dabeba homu muani,
tama gasa hani mebago te augwa
hos dabeba homu muani.
Tiali goli, dago te dena God Genuai Bidiba,
Godiba, konealubo homu dąų wabo dao.
Te we bidi dabe augwali tulaluama,
tama mu hagawaibao.
Tiali goli, da te hodalu, tama bomonama dolaluaibao.

Genuai Bidi, nago ena king tau sobaso da,
teda eno te hwįbo aiyaba elaluaibao.
Te Genuai Bidigo te dago i wabo sogo te da tau sao.
Copyright information for `MPS