Psalms 25

Te Devitgo asęani balia po me deli dao.

Te bidigo Godiba gedu haluasa po weyu, te aga bilibo dodolama, te tonaluao po wai

Genuai Bidi, megi eno
gedu haluasa po nageba obao,
te eno ofa me deli tiwai mobao.
Nage eno God da, tama eno konealubo homu
nageba naga dąų wabo da.
Nago ena tau sao.
Tiyu, eno konealubo po odolali elama,
tama ena hale idalio.
Nago te boi bidi dabego
ena aiyaba elalumainu elama,
tama augwaligo ena kęnę po omainu me igio.

Awe, nageba te konealubo homu ąų wabo bidi dabe,
te augwaligo konealubo odolali
dąų omainu elama, tama me
tagaliyu me egobeo. Menio.
Te nageba hagoma polo ebo bidi dabe,
augwali naga te dwai dene somainu elama,
tama augwa yali kolesagade hale yaibao.

God, nago te naga kolesaga enaba ola menama,
tama nago sunumi enaba ola mao.
Te nago po mu eno wali pomainu ola mao,
magi baso meni, nage te eno God dao,
tama nago ena ma sabo dao.
Te tigidali sogo nago ena tau somainu tonalubo dao.

Genuai Bidi, nago te naga olo mu
tau sabo wiegi yai kolesaga,
me homu dene ebo kolesaga te homu kone palao.
Nago te kolesaga da dali ebo
te polobadu digi yali te ela asudubadi,
megi sogoba usu nagasobao.
Genuai Bidi, nago eno dwai sęgę sali,
me dwai sę yali kolesagade homu kone me palamuo,
te ena gesi bidide te sę yali.
Nage te da godolo ebo Genuai Bidi God dao,
tama nage te sesemane wiegi yai elalubo da.
Nago enade homu koneama, tama nago ena te olo mu
tau sabo wiegi yai kolesaga yao.
Genuai Bidi te wiegi yai elama,
tama agai te po tų sesemane dolo naga ebo dao.
Tama tiyu, agai te dwai sęgę sabo bidi
dabeba te agai wei eyu, godolo homu yabo kolesaga
wali pomainu ola mabo dao.
Te aga dologode bidibo bidi dabe
te bilibo dodolaibao,
tama augwa te doloba pai kolesaga
wali pomainu ebo dao.
Agai te aga sunumi me te augwaliba ola mabo dao.
10 Godigo te agai da dali dąų wali po,
me bomai po te wali pabo we bidi
tigidaliba te agai homu kęą peyu,
godolo mu ebo dao.
Tama agai homu me hasegeliyu me egobeo.

11 God, nago te naga dąų wali po wali peyu,
tama eno yali dwai sę hauwa sela sąyao.
Nago eno yali dwai sę tigidali sela sąbaso,
tama eno nago nogi ugwaba saibao.
12 Te Genuai Bidigo po wali mu pabo we bidi,
te Godigo augwaliba wiegi yai sunumi ola mayu,
tama augwali te sunumidu pomainu tebo dao.
13 Te tobage bidi dabe augwali da
te wiegi yai mu bidaibao,
tama augwa wai dabe me te tǫde
bugagia bididuaibao.
14 Genuai Bidi God aga
te aga dologode bidibo we bidi dabe
augwaligo abagi mu dao,
tama augwali dali te dąų wali bomai po kontrak
te augwaliba ma ola mabo dao.
15 Tigidali sogo te Genuai Bidigo ena
tau somainu tonalubo da.
Magi baso meni, te ena dolainu yali
nai dabede te agai ena ma sabo dao.

16 Genuai Bidi, eno homugo nage ena ma aselama,
tama nago te olo tau sabo wiegi yai
kolesaga enaba yao,
magi baso meni, enaduba deli tama eno bomo silalio.
17 Nago eno haliga sęgę elalubo tigidali sela sąyao,
tama eno haliga te nagame yai dua bidimainu yao.
Nago ena tau selama,
tama te sęgę dabego ena elalumainu me egobeo.
18 Nago enade te haliga sęgę,
me haliga dene ebo tigidalide
nago homu kone palama,
tama nago eno sęgę tigidali sela sąyao.
19 Nago te eno boi bidi dabe subao,
augwali te hauwa mu tama.
Augwaligo ena dali sębę mu genuai ebao.
20 Nago ena ma selama,
tama ena bugagia seselaluao,
tama te boi bidi dabego ena me dologobeo.
Nago ena tonalumainu eyu, te ena nageba asobao.
21 Eno konealubo homu nageba elalubao,
tama tiyu, nago eno te tigidali wiegi yai
doloba pai kolesaga emainu eyu,
tego te sesemane sogo ena tonalumainu ilao.
22 God, nago te naga we bidi tigidali ma dobola sao.
Tama te tigidali haniani sęgęgo
augwali aiyaba elalumainu me elamu dao.
Copyright information for `MPS