a[Tib 96:7-9]

Psalms 29

Te Devitgo asęani balia po me deli dao.

Dago Godigo dogoni te genuai tulubage tulubode, ma wali asobode, te dago odaibao

Dage te boma pai ensel mobo bidi dabe,
dagego te Genuai Bidigo nogi ugwaba sao.
Te agai genuai nogide me bomode
te wiegi yai homu pemene yao.
Te Genuai Bidigo genuai nogi ugwaba sao.
Agai magi sę isąma, wiegi yai mu
bidiyu, tama dagego agaba lotu waiąo. a 

Genuai Bidigo po obadi,
tama augwaligo te tamu ąį pedai
tigidali badu odobo dao.
God aga te genuai nogi me bomo elalu,
tama agai i bomonama wabo
te be kulukulu wabo tiwai ebo dao.
Te agai po te genuai tamu ąį
tigidali badu pedaide te po wabo dao.
Te Genuai Bidigo i wabo bomo te genuai elalubao.
Tigidali bidigo Godigo i wabo odolama,
tama augwali agade wi ebo dao.

Te Genuai Bidigo i wabogo
te genuai ni sida dabe pedaibao,
tama agai te Lebanon bulu du dabede
ni sida dabe me peda sabo dao.
Agai te Lebanon bulu du dabe
te bulmakau wai te sasamano pabo tiwai ilibo dao,
tama te Hermon bulu du te ogwa bidi
bulmakau omai sasamano pabo tiwai yaibao.
Te Genuai Bidigo i wabogo te be sele elibo dao.
Te agai dogonigo te wa pai bulu te gęǫ ilaibao.
Agai te Kedes hanu wa pai bulu te gęǫ ilibo dao.
Te Genuai Bidigo i wabogo
te uni hasa dabego wai sągąnobo tiwai yaibao,
tama te tigidali ni yabe dabe sela sąbo dao.
Tama te Genuai Bidigo wiegi yai bede
tigidaligo te tiwai i weyu,
“Godigo genuai nogi elalubao,” te po wabo dao.

10 Genuai Bidi te king bidiyu,
tama te tigidali genuai tamu ąį tonalubao.
Aga te king sesemane sogo bidibao.
11 Genuai Bidigo bomo
te aga we bidi dabeba mabo dao.
Agai augwaliba te wiegi yai sę yabo
homu kolesaga menama,
tama augwali homu nagame elama, bidibao.
Copyright information for `MPS